ሂዚቄላ ቲንቢቴ 19 - Geeshsha Maxaafa

Isra7eele Daannata Gishshas Zilalettida Zilas

¹ GODAY, «Isra7eele daannata gishshas zilas zilalana mala taas yootides;

² izikka taas, « ‹Ne aaya kase gaammota giddon ay mala gaammoo! Wodalla gaammota giddon ichchadus; ba maratakka heen dichchadus.

³ Ba maratappe issaa iza dichchiin, izi mino gaammo gidides; izi shankkateth tamaaridi as mides.

⁴ Kawoteththati ubbay iza hano siyida; istti bookkida ollan gelidi oykettides; isttika iza siidhen dafo aaththi goochchidi Gibxe biitta efida.

⁵ « ‹Iza hidota ooththidayssi calqamidayssa, iza naagidayssi polettonttayssa be7ida wode, ba marata giddofe nam7anththoza dichchada, mino gaammo kessadus.

⁶ Izi gaammota giddon noochu gides; minni minnika bides; wodhi muus eridi asaakka mides.

⁷ Izi istta miixa menththereththides; istta katamatakka kayzisides; Biittaynne biittan diza asay ubbay iza xaagoppe dendidayssan kokkorida.

⁸ Iza yuushon diza kawoteththati ubbay iza bolla dendida; bantta dere ubbaafe iza bolla shiiqida; bantta gite iza oykkana yeggida; izi istta ollan gelidi oykettides.

⁹ Siidhen dafo yeggidi kooththa giddon gelththida; Baabiloone kawookko efida; Nam7anththo iza cenggurssi Isra7eele zumata bolla seetettontta mala, istti iza qasho keeth gelththida.

¹⁰ « ‹Ne aaya haaththa doonan tokettida woyne tura mala; goshsha gaden daro haaththi diza gishshas, daayida ayfida woyne tura misatadus.

¹¹ Izi haggati kawoteththas bessiza mino guufeta. Cippi gida hayththata giddon, ba adussateththaninne ba cora haggatan lo7a beettadus.

¹² Gido attiin hanqon dhoqallettadus; duge biittan olettadus; arshey mokkiza bagga carkoy izo melissides; iza ayfida ayfeza qoqofides; mino izi haggati dagammida; tamaykka istta mides.

¹³ Ha7i haath saamettida mela biittan bazzon tokettadus.

¹⁴ Izis wogga haggata issaafe tamay kezides; iza ayfida ayfeza mides; kawoteththas gidiza issi mino haggayka attibeenna; hayssi zilassa; ceece gallas milassas gidana› ga» gides.