ሂዚቄላ ቲንቢቴ 15 - Geeshsha Maxaafa

Woyne Tura Leemiso

¹ GODAA qaalay taakko yiidi,

² «Haysso asa nawu! Woyne turay woran diza hara miththata ubbaa haggafe aazan aadhdhizee?

³ Go7iza miish ooththanaas iza anoppe eketti erizee? Issi miish kaqqanaas kocay izappe eketti erizee?

⁴ Izi eexxana mala taman yeggidaappe guyen nam7u bagga xeera tamay miidi giddoza labikko hessi go7anaas dandayzee?

⁵ Lo7o gidi uttidi ay go7akka immontta aggiko tamay xuuggidaappenne labidaappe guye keehi go7ay bayndaaz gidana.

⁶ «Hessa gishshas Ubbaa Haariza GODAY, ‹Tani wora miththa giddon diza woyne ano taman eexxana mala ta aaththa immidayssaththo Yerusalaamen dizaytakka aaththa immana.

⁷ Tani ta ayfeso iitateththan istta bolla zaarana; istti tamappe kessi ekki attidaa gidikkoka buro istta tamay maana; tani ta sinth iitateththan isttako zaariza wode tani GODAA gididayssa intte erana.

⁸ Istti ammanettontta aggida gishshas tani biittayo asi baynda bula kessadis› gees» gides.