ኤራንቻታ ማጻፋ 9 - Geeshsha Maxaafa

Ubbaas Diza Wurseththa Qaada

¹ Hessa gishshas ha ubbaa yo7ota ta wozinan qoppada aadho eranchchatinne xilloti ooththiza oosoy Xoossa kushenna; gido attiin asi sinththafe bana naagizayssi siiqo gidiin woykko ixo gidiin erenna.

² Xillota woykko nagaranchchata gidiin, suureta woykko iitata gidiin, geeshshata woykko tunata gidiin, yarsho shiishshizayta woykko yarsho shiishshonttayta gidiin ubbatasikka wurseththa qaaday issino. Lo7o asas hanzayssa mala nagaranchchaska hanees; caaqqizayssas hanizayssa malakka caaqos babbizaytas hanees.

³ Salo gufanththon ubbaa bolla gakkiza iitateththi hayssa; ubbaas wurseththa qaaday issino; hessafe bollarakka asa wozinay iitateththan kumidessinne gooyides; wurseththankka hayqqida asan gayttees.

⁴ Hayqqida gaammofe paxa diza kanay kiya; hessaththoka shemppora paxa dizayta giddon diza asas hidotay dees.

⁵ Shemppora paxa diza asi ba hayqqanayssa erees; gido attiin hayqqidayti aykkoka erettenna; istta qofsiza miishshi ubbay dogettees; istti go7ettana miishshika deenna.

⁶ Istta siiqoy, ixoynne qanaatey ubbay isttara issife dhaydes. Hessa gishshas salo gufanththon haniza miish ubbaan aykko qaadaykka isttas deenna.

⁷ Baada ne kath ufayssan ma; ne woyne ushshaaka ne wozinay ufayettishin uya; ays giikko Xoossi ne ooththida ooson ufayettees.

⁸ Ubbaa wode ne may7oy booth gido; ne hu7eykka zayten tiyetto.

⁹ Salo gufanththon Xoossi nees immida guuth gidida ne de7o layththata ubbaan ne siiqiza ne machcheyra ufayssan de7a; ays giikko salo gufanththon ne de7oninne ne daaburda daabura ubbaan hayssi nees qaada.

¹⁰ Ne kushey ooththanaas demmidayssa ubbaa ne kumeththa wolqqan ooththa; ays giikko neni baana duufon oosoy, halchchoy, erateththinne aadho erateththi deenna.

¹¹ Tani salo gufanththon hara miish be7adis; woththan xoonoy pilatatas olan xoonoy wolqqamatas gidenna; kaththi aadho eranchchatas, dureteththi kiphatanchchatas, sabay eranchchatas gidenna; gido attiin ubbatikka wodeynne qaaday gaththida mala haneettes.

¹² Qasseka ba wode eriza asi deenna; kafoy yarden geliza mala, moley giten oykettiza mala, asikka qoppontta dishin yiza iita wodetan oykettees.

Aadho Erateththinne Eeyateth

¹³ Hessaththoka tana keehi malalisida hayssa aadho leemiso salo gufanththon be7adis.

¹⁴ Hessika issi biittan amarda asati de7iza qeeri katamay dawus; he katamayo olanaas issi wolqqama kawoy worajji dooddides; izi yuushon miixa giigsides.

¹⁵ He katamayn aadho eranchcha gidida issi manqo asi dees; izi ba aadho erateththan he katamayo ashshides. Gido attiin he manqozas oonikka qoppibeenna.

¹⁶ Hessa gishshas tani, «Aadho erateththi wolqqafe aadhdhees» gadis. Gidikkoka he manqozas diza aadho erateththazi kadhettides; iza qaalaykka siyettibeenna.

¹⁷ Eeyata ayssiza daanna waasoppe aadho eranchchay liiqon haasayza qaalay seetettees.

¹⁸ Aadho erateththi ola miishshafe aadhdhees; gido attiin issi nagaranchchay daro lo7o miish dhayssees.