ኤራንቻታ ማጻፋ 7 - Geeshsha Maxaafa

De7o Gishshas Qofa

¹ Lo7o shittofe lo7o sunththi aadhdhees; yeleta gallassafe hayqo gallassi lo7o.

² Gibira keeth buussafe yeeho keeth buussi lo7o; gaasoykka hayqoy as ubbaas wurseththa; shemppora paxa diza asi ubbay hessa ba wozinan woththanaas bessees.

³ Miichchafe kayoy kiya; gaasoykka kayoy sinth kareththikokka wozina poo7isees.

⁴ Aadho eranchcha wozinay kayo keeththan dees; eeyata wozinay gidikko ufayssa keeththan dees.

⁵ Eeyati sabbishe yexxiza yeth siyanaappe aadho eranchchay seeriza seera ezgoy lo7o.

⁶ Eeyata miichchi oto garsan eexxishe dhuuqettiza agunththa mala; hessika hada.

⁷ Gene oosoy aadho eranchcha eeya kessees; maganxoy asas wozina moorees.

⁸ Issi miishshas doomeththafe wurseththi kiya; qasse otoranchchafe dandayanchchay kiya.

⁹ Eeyata hanqoy istta ki7o garsan diza gishshas neni hanqos eesotoppa.

¹⁰ Neni, «Ha wodey kase aadhdhida wodetappe ays lo7idee?» ga oychchofa; heytantta mala oyshata oyshoy aadho erateth gidenna.

¹¹ Aadho erateththi lo7o xinxxo mala; iza go7ay poo7o be7iza as ubbaassa.

¹² Miishshi as iitappe kammi ashshiza mala aadho erateththi ashshees. Hessafe bollarakka aadho erateththi keeththa aawa shemppo naagees.

¹³ Ane Xoossay ooththidayssa wozinan woththa! Izi bokkasidayssa ooni luulisana dandayzee?

¹⁴ Nees wodey lo7ishin ufayetta; gido attiin wodey iitishin hayssa wozinan woththa; Xoossi issaa ooththida mala harakka ooththides; hessa gishshas asi sinththafe hanana miish aykkoka pilggidi erana dandayenna.

¹⁵ Nagaranchchay ba nagaraara adussa layth de7ishin, xilloy ba xilloteththara eeson hayqqishin hada gidida ta de7o layththatan hayta be7adis.

¹⁶ Hessa gishshas ne dhayontta mala keeha xillo, woykko keeha aadho eranchcha gidoppa.

¹⁷ Qasse keeha iita as, woykko ubbaa eeya as gidoppa; ne ays wodey baynda hayqqay?

¹⁸ Issaa oykkidi hankkoyssaka yeddontta agoy lo7o; Xoossas yayyiza asi shikkalateth ixxees.

¹⁹ Aadho erateththi aadho eranchchas immiza wolqqay issi kataman dere haariza tammatappe aadhdhees.

²⁰ Nagara ooththontta mulera suure oosoninne xilloteththan xalla kanththiza asi biitta bolla deenna.

²¹ Haasayettiza qaala ubbaa hayth yegga siyoppa; ne histtontta aggiko ne ashkaray nena qanggishin ne siyandasa.

²² Qasse nenikka ne hu7en harata qanggoyssa ne wozinay erees.

²³ Hayssa ubbaa tani aadho erateththan pilgga xeellada, «Tanikka aadho eranchcha gidanaas qachchadis» gadis. Gido attiin tani gida mala hanibeenna.

²⁴ Aadho erateththi ay gidikkoka keehi ciimmanne haako; histtiin ooni gakki erana dandayzee?

²⁵ Hessa gishshas aadho erateththinne yo7oti hanizayssa pilgga eranaas, xanna7anaas nagara iitateththinne eeyateththi gooshshateth gididayssa akeekanaas ta wozinan yuushsha qoppadis.

²⁶ Izis wozinay woximade mala, izi kusheti agrimooqe malanne yarde mala gidida hayqoppe iita maccas be7adis; izippe kessi ekkanay Xoossas yayyiza as xalla; nagaranchcha as gidikko yarden oykkawus.

²⁷ Aadho eranchchazi, «Tani kaalla pilgga xeellada demmida hara miishshi hayssafe kaallizayssa. Yo7oti hanizayssa hiillateththan pilggidi demmanaas issaa issaa bolla gujjo;

²⁸ Hessika tani hach gakkanaas pilggashe dhaydayssa shii attumasappe issi suure as demmadis. Gido attiin haytantta giddofe issi suure maccas demmabeekke.

²⁹ Tani hayssa ubbaafe issi miish tamaaradis; Xoossi as suure histti medhdhides; gido attiin asi daro gitettidaaz giigsides» gides.