ኤራንቻታ ማጻፋ 4 - Geeshsha Maxaafa

Qoho, Dafeteth, Bizzateth

¹ Tani qasseka salo gufanththon diza qoho ubbaa be7adissinne akeekadis; qohettidayta afunth be7adis; istta minththeththiza asikka deenna; wolqqay istta qohiza asata kushen dees; istta minththeththiza asikka deenna.

² Hessa gishshas tani, «Ha7i shemppora paxa dizaytappe kase hayqqidayti kiya» gadis.

³ Gido attiin ha nam7atappeka bollara mulekka yelettonttayta qaaday lo7o; gaasoykka istti salo gufanththon oosettiza qohoza mulekka be7ibeettenna.

⁴ Hessaththoka asay ba amottidayssa demmanaas keehi daaburdi ooththees; gido attiin he daaburay ba lagge bolla qanaateteththan dendon gididayssa tani akeekadis. Hessika hada; carko oykkanaas yedeththiza mala.

⁵ Azallay ba kushe idimmi uttees; barkka bana wodhees.

⁶ Coo daaburaninne carko kaalon nam7u kushe demmanaappe woppan beettiza issi kuphphay kiyees.

⁷ Qasseka tani salo gufanththon diza miishshi hada gididayssa be7adis.

⁸ Yeloy woykko ishay baynda bizza asi dees; iza dafeteththaas zaway deenna; iza ayfey izas diza aqota kallibeenna; izikka, «Tani hayssa oosi daaburazinaa? Tani ta hu7e ufayssanayssa ays uuzettazinaa?» gides. Hessika hadanne tugga de7o.

⁹ Istta oosoy lo7o ayfe immanaas dandayza gishshas issino gidanaappe nam7u gideththi lo7o.

¹⁰ Qasse nam7aafe issoy kundiko issoy denththees; gido attiin kundiko denththiza laggey bayndaadey ay mala qadheththizee!

¹¹ Nam7ay issife ichchiko ho7ees; gido attiin barkka ichchidaade waani ho7ana dandayzee?

¹² Asi bizza qohana dandayees; nam7u gidikko izara eqettana dandayeettes; Heedzdzan dooqettida wodoroy elle duuxxenna.

¹³ Zore ekkontta eeyanne cima kawo gidanaappe aadho erateththi diza naateththa manqoy lo7o.

¹⁴ Ays giikko izi he hiyeesa gidida sohoppe dendidi woykko qasho keeththafe kezidi ba biittan kawotanaas dandayees.

¹⁵ Tani salo gufanththon dizaytinne simerettizayti ubbay kawo araata laattiza yelagaa kaallizayssa be7adis.

¹⁶ Iza sinththan qooday baynda derey dees; kawoteththafe izi kichchiza wode izi ooththidayssas oonikka iza galatenna. Hessika hada; carko oykkanaas yedeththiza mala.