ኤራንቻታ ማጻፋ 12 - Geeshsha Maxaafa

¹ Meto gallassati yontta dishin neni, «Tana ufayssettenna» giza wodeti gakkontta dishin ne yelagateththa layththan nena Medhdhidayssa qoppa.

² Awaynne poo7oy, aginaynne xoolinttey dhumontta dishin, iray bukki simmiin shaaray kichchontta dishin nena Medhdhidayssa qoppa.

³ Keeth naagizayti kokkoriza wode, minoti kuunniza wode, gaaccizayti qoodan guuth gidida gishshas gaachche aggiza wode, maskootera xeellizayti doljumiza wode,

⁴ dubbushaso efiza ogeti gordettiza wode, woxay loocetidi giireth aggiza wode, kafo waasoy as denththiza wode, istta yeththika daaburza wode,

⁵ pudunth kessi xooniza wode, oge buussi babisiza wode, ochcholooney ciiyiza wode, booley barkka bana goochchiza wode, asappe amoy dhayza wode asi ba mernaa keeth baana; yeekkizaytikka balen yuuyana.

⁶ Bira sansalatay duuxxontta dishin, worqqa saaney meqqontta dishin, haaththa otoy pultto achchan meqqontta dishin, haath ollafe kessiza waagumboy meqerettontta dishin,

⁷ biittay duge biittan simmontta dishin, shemppoy immida Xoossako simmontta dishin, nena Medhdhida Xoossako simma.

⁸ Eranchchazi, «Hada! Hadappeka hada! Ubbayka hada!» gees.

Kuushsha Qofa

⁹ Eranchchazi ba hu7es aadho eranchcha xalla gidontta asaakka erateth tamaarsides. Daro leemisota pilggi xeellidaappe guyen maaran maaran giigsides.

¹⁰ Eranchchazi suure qaala demmanaas pilggides; izi xaafidayssi suurenne tuma.

¹¹ Aadho eranchcha qaalay cikka mala hoxe; qasse iza tossetikka addafe dhishkettida dhishke mala; heytikka issi heenththanchchafe imettidayta.

¹² Ta naazoo! Ha ubbaafe bollara ay miishshafekka naagetta; aykkoka gujjofa; daro maxaafata xaafikkoka wurseththi deenna; xinaate daroy bolla daaburssees.

¹³ Hekko ubbaa miishshi yootettides; yo7o ubbaas kuushshi hayssa; Xoossas yayya; iza azazo naaga; hessika asa naas imettida kumeththa ooso.

¹⁴ Xoossay ooso ubbaa bolla, geemmida yo7o ubbaa bolla, lo7o gidiin iita gidiinkka pirdana.