ኤራንቻታ ማጻፋ 1 - Geeshsha Maxaafa

Ubbayka Hada

¹ Hayssi Dawite naa Yerusalaamen kawotida eranchchaza qaala.

² He eranchchay, «Ubbaa miishshi hada; hadappeka aadhdhida hada; ubbaa miishshika hada» gees.

³ Alame bolla asa nay daaburza daabura ubbaas ay wodhey dizee?

⁴ Yeletay aadhdhi bishin hara yeletay yees; gido attiin biittaya mernaaskka minna de7awus.

⁵ Arshey mokkeessinne wullees; qasseka ba mokkizaso baanaas eesotees.

⁶ Carkoy dugeha bagga carkees; hara wode pudeha bagga simmees; qasse yuuyi yuuyi aadhdhidi ba losida ogen gelees.

⁷ Shaafa haath ubbay biidi abban gelees; gido attiin abbay mulekka kumi erenna; shaafa haaththati kase ba yidaso simmi beettes.

⁸ Asi haasayanaas dandayzaazappe bollara yo7oti ubbay saleththizaaza; ayfey xeellidi kalli erenna; hayththika siyidi, «Taas gidides» gi erenna.

⁹ Kase haniday simmi izi hanana; qasse ha7i hanishe dizaykka kase hanidayssa. Hessa gishshas salo gufanththon aykkoyka ooraththa miishshi deenna.

¹⁰ Oonikka, «Be7ite! Hayssi ooraththa miishsha» giikko hessi ooraththa miish gidenna; hessi nuni yelettanaappe kasekka diza miishsha.

¹¹ Beni wode hanida hanota zaaridi hassa7issiza miishshi deenna; sinththafe yaanaytikka isttafe kaalli yaanaytan qofettettenna.

Eranchchazi De7o Loseppe Demmida Timirte

¹² Tani eranchchazi Yerusalaamen Isra7eeles kawo gidada de7adis.

¹³ Tani salo gufanththon diza ubbaa shaakka eranaassinne aadho erateththan pilgga xeellanaas ta qofaa qachchadis; Xoossi asa nayta toossida toohoy ay mala deexoo!

¹⁴ Salo gufanththon hanida hanota ubbaa ta be7adis; gido attiin ubbayka hada; carko oykkana yedeththiza mala.

¹⁵ Geellattida miishshi sitti gaanawu dandayenna; qasse baynda miishshi qoodettana dandayenna.

¹⁶ Tanikka ta wozinan, «Taappe kase Yerusalaame haarida ubbatappe tani gitanne aadho eranchcha gidadis; tani aadho erateththaninne eran keeha loohadis» ga qoppadis.

¹⁷ Qasse tani aadho erateth, gooshshateththinne eeyateth shaakka eranaas keeha baaxetadis; gido attiin wurseththan hessika carko oykkanaas yedeththiza mala hada gididayssa eradis.

¹⁸ Aadho erateththi darshin ceecey darees; eray dariza wodekka metoy darees.