ዛሬ ማጻፋ 32 - Geeshsha Maxaafa

¹ Salotoo! Tani yootizayssa ezgi siyite; Sa7azoo ta doonappe keziza qaala siya.

² Ta immiza timirtey ira mala bukko; ta haasayaykka xaaza mala xoketto; maata bolla loddi gi bukkiza ira mala bukko; kaththa caarechcha bolla puuse mala wodhdho.

³ Tani GODAA sunth awajjays; nu Xoossaa gitateth intte yootite.

⁴ «Izi nuus miixa; iza oosotikka kumeththa; Iza ogeti wurikka suure; izi balettontta ammanettida Xoossa; izi suurenne xillo Xoossa.

⁵ «Istti iza sinththan iita ooththida; istti bantta iitateththaafe dendidayssan hayssafe guye iza nayta gidettenna; istti bokkanne geella yeletata.

⁶ «Intteno eeyatoo! Qasseka wozinay bayndaytoo! Intte GODAAS immiza zaaroy hayssee? Inttena medhdhida intte aaway iza gidennee? Inttena medhdhidi hayssas gaththiday iza gidennee?

⁷ «Kase beni wodeza yuushshi qoppite; daro yeletata layththaaka akeekite; Intte aawata oychchite; istti inttes yootana; kase cimatakka oychchite; istti inttes qonccisi yootana.

⁸ «Ubbaafe Dhoqqa Xoossay kawoteththatas biitta gishechchida wode, asa nayta istta zaren zaren shaakkida wode, Isra7eele asaa qooda keena kawoteththatas dhas woththides.

⁹ «Isra7eeley GODAAS gisha; Yaaqoobeykka izas buzo miishsha.

¹⁰ «Aykkoyka baynda bazzon carkoy punniza biittaan iza demmides; izas gondalle gidides; ba ayfe ciro mala iza naagides.

¹¹ Golle kafoy ba ciyeta piradho tamaarsiza mala, ba qefe miccada gakka oykka ashshiza mala, GODAY ba qefen haphphidi istta ashshides.

¹² Hara eeqa xoossati izara baynda GODAY iza barkka kaaleththides.

¹³ «Dhoqqa sohon iza woththides; biittafe mokkida kaththa ayfe iza mizides; zaallafe beettida ees ushshides; shuchcha biittan mokkida wogara zayte mizides.

¹⁴ Miizappe dorsafenne deysha wudeppe beettiza maaththaninne oys Baasaane dereppe beettiza ohala laaqqata, modhdho dharshota, wofanotanne deyshata, lo7o gistte daabbora istta mizides. Intte iza dereti zo7o woyne miththa ayfeppe, giigida woyne ushshu uyideta.

¹⁵ «Isra7eele asay ordidessinne makkallides. Daro miidi modhdhidessinne moollattides; bana medhdhida Xoossaa aggides; bana ashshidayssaka kawushshides.

¹⁶ Istti eeqa xoossatas goynnidi Xoossaa mishisida; bantta iita oosonkka iza hanqeththida.

¹⁷ Hayssafe kase ba eronttaytas, Xoos gidontta daydanththatas, mata wode yida xoossatas, beni istta aawati isttas goynnontta eeqatas, istti yarsho shiishshida.

¹⁸ Istti baas de7o immida zaallaa dogida; bana medhdhida Xoossaaka balida.

¹⁹ «GODAY hessa be7idi istta bolla hanqettides; istta macca naytanne istta attuma nayta diggides.

²⁰ ‹Tani ta ayfeso isttafe genththana; istti geellanne ammanettontta dere gidida gishshas istta wurseththi ay gidanaakko ta co7u ga beyana.›

²¹ Tumu gidontta xoossatan tana mishisida; go7ay baynda ba eeqa xoossatan tana hanqeththida. Tanikka istta kadhettida kawoteththata istti miigettana mala ooththana. Ta istta akeekontta deretan hanqeththana.

²² Ta hanqoy tama mala eexxana; biittanne biitta bolla diza ubbaa xuuggana; he tamay si7oole ciimmaa gakkanaas eexxana; tamazi zumaas yoch gakkanaas maana.

²³ Tani istta bolla zaareththa zaareththa bosha ehana; Taas diza wondafe ta istta bolla wursana.

²⁴ Ta ubbaa wursiza kosha istta bolla yeddana; issaafe issaan aadhdhiza iita hargeninne boshan istti wurana; meto gaththiza iita do7atanne dukkiza marzera diza shooshshata ta istta bolla yeddana.

²⁵ Oge ubbaan istta nayta olay wursana; keeththa giddonkka hirgay kumana; panththatinne geela7oti, guuththa naytinne cimati ubbay wurana.

²⁶ Tani istta ubbaa laallana; Hessafe guye istta hassa7ana asi deenna.

²⁷ Gido attiin istta morkketi, ‹Nuni nu wolqqan istta xoonidos attiin Xoos gidenna› giidi otoreteththan ceeqettidi tana hanqeththanaakko gaada qoppays.

²⁸ Isra7eele asay yuushshi qoppontta kawoteth; isttas akeekay deenna.

²⁹ Istti erata gididaakko hayssa istti kasetidi qoppana; bantta wurseththankka hananayssa yuushshi qoppanashin!

³⁰ Istta medhdhidayssi istta aaththi immonttaako, GODAY istta yeggi aggonttaako, Issaadey 1,000 as wostti gooddandee? Woykko nam7ati 10,000 as wostti gooddanee?

³¹ Haray attoshin nu morkketi istta xoossay laafa gididayssanne Isra7eele Xoossaa mala gidonttayssa ereettes.

³² Nu morkketi Sodoomenne Gamoora dere asaa mala tuna; isttika camonne marzera diza ayfe ayfiza woyne miththa mala.

³³ Istta woyne ushshay shooshsha marze mala; qasseka haso shooshsha marze mala.

³⁴ «Hayssa tani dogadinaa? Ta mazgaban xaafetti uttides.

³⁵ Istta morkketa bolla halo kessanay tana; ubbaasikka ta istta ooso ooso mala immana; isttas dhayo gallassi gakkida gishshas istti dhuphettana; eesonkka dhayana.»

³⁶ Isttas wolqqay daaburdayssanne isttaka maaddizay bayndayssa be7idi, GODAY ba asaas pirdana; ba aylletaskka qadhettana.

³⁷ GODAY ba asaa, «Istti ammanettiza istta xoossati awan dizoo? Istti baqati attiza zaallati awan dizoo?» gi oychchana.

³⁸ Istti yarshos shiishshiza tolthoza midayti, istta woyne ushsha yarshoza uyida istta eeqa xoossati ane ha7i inttena dendi maaddetto; qasseka inttes duussaso immetto.

³⁹ «Tani xalla Xoos gididayssa erite; taappe hara Xoossi deenna; wodhizaykka paxa woththizaykka tana; tani madunththayssinne paththays; ta kusheppe oonikka inttena ashshenna.

⁴⁰ Tani ta kushe pude salo denththada, ‹Ta mernaas de7ays.

⁴¹ Wawaci giza ta giththa mashshaa leefana; ta kushey pirdas oykkana; ta morkketa bolla halo kessana; tana ixxizaytas ta istta ooso mala isttas immana.

⁴² Morkketa halaqata, madunxidaytanne di7ettidayta suuththan ta wondafeta ta maththosana; ta giththa mashshatikka ta morkketa asho maana› ga caaqqana.

⁴³ «Intteno kawoteththatoo! GODAY ba oosanchchata suuth accana; morkketa bolla halo kessana; bana ixxizayta qaxxayana; ba dereza nagara wursana; biittayokka tunateththafe geeshshana; hessa gishshas intte iza asaara issife ufayettite» giidi,

⁴⁴ Museynne Nawe naa Iyaasoy derezi siyishin ha mazamureza yootida.

Wurseththan Musey Immida Zore

⁴⁵ Musey hayta ha qaalata kumeththa Isra7eele asaa sissidaappe guye,

⁴⁶ izi, «Hayssa woga qaala ubbaa intte nayti lo7eththi naagana mala, istti ooththana malanne intte nayta intte azazana mala hach ta inttes markkattiza qaala ubbaa intte wozinan woththite.

⁴⁷ Ha qaalay inttes de7oppe attiin coo mela qaalaa gidenna; ha qaala naagikko intte Yordaanoose pinnidi laattana biittankka adussa layth intte de7ana» gides.

Muse Hayqo Gishshas Yootettida Tinbite

⁴⁸ He gallas GODAY Muses hizgides,

⁴⁹ «Mo7aabe deren Iyarkko katama ginara diza Abaarime zumata giddofe Nebo zuma bolla keza; histtada tani Isra7eele asaas immana gida Kanaane biitta he pinththan xeella.

⁵⁰ Ne isha Aarooney Hoore zumaa bolla hayqqidi kase hayqqida ba asatan gayttida mala nekka he zumaa bolla hayqqada ne asatan gayttana.

⁵¹ Intte nam7ayka Isra7eele asaa sinththan taas ammanettibeekketa; Xiine bazzon Qaadeese katamaa matan diza Mariiba haaththa achchan ta geeshshateththaa Isra7eele asaa bessibeekketa.

⁵² Hessa gishshas neni he biittayo haahon dashe be7ana attiin tani Isra7eele asaa laatissana biittayo neni gelakka.»