ኣሞጼ ቲንቢቴ 9 - Geeshsha Maxaafa

Isra7eele Bolla Yaana Pirda

¹ GODAY yarsho yarshizasoza millen eqqi dishin ta beyadis; izikka tana, «Xoossa Keeththaa yochchay qaaxxana gakkanaas keeththa qustte shoca laalladanne asaa bolla kundana mala ooththa; hessafekka attidayta tani istta mashshara wodha dhayssana; isttafe oonikka baqatenna; baqatikkoka taappe kessi ekki attenna.

² Istti duufo bookki gelidaakkoka ta kushey istta heeppe shoddi haa kessana; istti pude salo kezidaakkoka tani istta heeppe haa duge goochcha woththana.

³ Istti pude Qarmeloose zumaa bolla kezi qotettidaakkoka ta kaaletta baada istta heeppe woththana; istti duge ciimma abba giddo gelidi taappe qotettizaakkoka heen istta shooshshi dukkana mala ta azazana.

⁴ Istti ba morkketa kushen di7etti biikkoka heen istti mashshan hayqqana mala ta azazana; tani istta bolla ta ayfe lo7os gidontta iitas zaarana» gi azazides.

⁵ Ubbaa Haariza GODAY izi biittayo bochchees; izakka seerawus; izin diza ubbay yeekkees; Nayle shaafay kixxi guummiza mala biitta ubbay qaaxxees; qasse zaaridi kixa haaththi wodhdhiza mala wodhdhana.

⁶ Ba duussaso salo ooththiday, salokka sa7appe bollan minththiday, abba haath azazidi biitta bolla gogissizay izas sunththay GODAA.

⁷ GODAY, «Isra7eele asawu! Intte taas Tophphiya asa mala gidekketii? Tani inttena Gibxeppe kessoyssaththo Filisxeeme asaa Qarxeeseppe qasse Sooriya as Qiireppe kessabeekkinaa?

⁸ Tani Ubbaa Haariza GODAY gede nagaranchcha Isra7eele asaa kawoteththaako xeellays; ta iza biittafe mulera dhayssana; gido attiin Yaaqoobe zereth ubbaa dhayssike» gees.

⁹ «Be7ite kath zayzaren zayzariza mala Isra7eele asaa Ayzaabe kawoteththa giddon zayzarana mala ta azazana; gido attiin isttafe issaadeyka wora wodhdhi dhayenna.

¹⁰ ‹Nu bolla aykko iitaykka gakkenna woykko nuna bochchenna› giza ta dere asaa garsan diza nagaranchchati ubbay olan hayqqana» gees GODAY.

Isra7eele Asaa Simo Hidota

¹¹ «Coo kundi laalettida keeththa mala gidida Dawite zereththata kawoteththas tani zaara essana wodey yaana; tani gimbeza zaara gimbana; laalettidayssaka ooraxissana; kaseyssaththo zaara ooththana.

¹² Hessaththoka Eedoome deren attidaytanne ta sunththan xeygettida dereta ubbaa istti laattana» gees GODAY.

¹³ «Kath maxizayti maxi wursontta dishin goshsha wodey gakkees; woyne ayfe gum7izaadey gum7i giigontta dishin woyne puute tokkiza wodey gakkees; he wode mal7iza lo7o woyne ushshi zumaappe pulttana; zumbullatappeka goggana.

¹⁴ Di7etti bida Isra7eele asaa haa istta dere zaara ehana; laalettida katamata zaari keexxidi izan de7ana; istti woyne tokkidi izappe agettida ushshu uyana; dumma dumma ayfiza mith tokkidi iza ayfe maana.

¹⁵ Ta dere Isra7eele asaa tani kase istta biittan zaarada tokkana; tani isttas immida biittafe istti nam7anththo dhoqalletti dhayettenna» gees GODAY salo Xoossay.