ኣሞጼ ቲንቢቴ 5 - Geeshsha Maxaafa

Isra7eele Asaa Maareteth

¹ Isra7eele asawu! Intte gishshas ta zilaliza zilas siyite.

² «Geela7oya Isra7eeley kundadus; nam7anththo dendanaas dandayukku; izo maaddi denththanay baynda gishshas iza barkka ba deren kunda attana.»

³ Ubbaa Haariza GODAY, «Isra7eele katama issineyppe 1,000 olanchchati olas baanashin isttafe hayqqontta paxa attanay 100 asata xalla gidana; hara katamappeka 100 ola asati olas baanashin isttafe 10 asi xalla simmi yaana» gides.

⁴ GODAY Isra7eele asaas, «Isra7eele asawu! Haa taakko simmite; intte hayqqontta de7ana.

⁵ Intte Bersaabehe boopite; Beeteley laalettada mulera dhayana; Gelgelan diza asay di7ettana; hessa gishshas Beetele gidiin woykko Gelgela boopite» gides.

⁶ Haa Xoossaako simmite; histtiko intte shemppora paxa de7ana; akkay giikko Xoossi tama mala Isra7eele deraa maana; Beetelen dizaytakka tamay maana; he tama toyssanay isttas beettenna.

⁷ Intteno pirda geellasizaytoo! Tumakka gede wordon laammizayto inttes aayye ana!

⁸ Piliyaadise geetettiza laappun xoolinttetanne Oryoone geetettiza issi bolla diza xoolintteta medhdhiday gallassaa omarsan, omarsa gallassan laammizay, abba haath azazidi biitta bolla gogissizay,

⁹ wolqqamatanne istta miixata laalli dhayssizay iza; izas sunththayka Xoossa.

¹⁰ Intte qasse inttena pirdason hanqizaade ixxeeta; tumu haasayzaadekka kadheeta.

¹¹ Manqota un7eththeeta; istta wolqqara kath giiriseeta; inttes masettida shuchchafe keeth keexxideta shin he keeththan deekketa. Aradda biittan woyne miththa tokkideta shin izappe agettida woyne ushshu uyekketa.

¹² Intte qohoy ay mala darokkonne intte nagaray ay mala deexokko ta erays; intte xillo asata un7eththeeta; matta7e ekkidi pirdason manqotas geella pirdeeta.

¹³ Hessa gishshas he wode wodey iita gidida gishshas akeekay diza asi co7u gees.

¹⁴ Intte shemppora paxa de7ana mala lo7oppe attiin iita ooththofte; intte hessaththo ooththiko intte gida mala GODAY Salo Xoossay inttenara gidana.

¹⁵ Iita miish ixxite; lo7o gididaaz dosite; pirda pirdizason tumu pirda geellasopite. GODAY Salo Xoossay attida Isra7eele asaa maaranaakko oonee erizay?

¹⁶ Hessa gishshas GODAY Salo Xoossay, «Oge bollanne dubbushay dizason ubbaan waasoynne yeehoy siyettana; goshshanchchati koyssas zilalizayti yeehos xeygettana.

¹⁷ Woyne miththi tokettizason ubbaan yeeho xalla gidana; hessika wuri hananay ta intte giddora aadhdhiza gishshassa» gees.

Xoossa Pirda Gallassa

¹⁸ Intteno GODAA gallas naagizaytoo! Inttes aayye ana! He gallassay dhumappe attiin poo7o gallas gidontta gishshas intte ays he gallassa koyeetii?

¹⁹ He gallassay asi gaammofe attanaas qotettishe zardora gaaggiza mala woykko kessi ekki baso gelidi ba kushen keeththa goda oykkiin shooshshi dukkida mala hanana.

²⁰ GODAY pirdiza gallassay inttes dhumappe attiin poo7o gidenna; he gallassay izan aykko poo7oykka baynda girdi gida dhuma gidana.

²¹ «Tani intte layththan layththan bonchchiza ba7aaleza kadhayssinne ixxays; intte goynos shiiqiza shiiqoykka tana ufayssenna.

²² Taman xuugettiza yarshonne kaththa yarsho intte taas shiishshikokka ta hessa inttefe ekkike; dhiikettida intte mehetappe intte taas issifeteththa yarshos shiishshiko ta iza ayfenka xeellike.

²³ Intte yexxishe ta hayththan kaccofte; intte diiththa giiris ta siyanaas koykke.

²⁴ Gido attiin tumu pirday goggiza haaththa mala; xilloteththika miccontta pultto mala goggo.

²⁵ «Isra7eele asawu! Tumappe intte oyddu tammu layth bazzo biittan diza wode tumu yarshonne kaththa xeera taas shiishshidetii?

²⁶ Intte inttes ooththida, ‹Kawo Zakute› geetettiza eeqa xoossaza; qasseka, ‹Kewene› geetettiza intte medhdhi kessida xoolintte misatiza eeqa xoossata tookkideta.

²⁷ Tani inttena Damasqofe gede haassa gooddana» gees GODAY Salo Xoossay.