ኣሞጼ ቲንቢቴ 3 - Geeshsha Maxaafa

Isra7eele Asaa Bolla Gakkana Hanqo

¹ Isra7eele asawu! Gibxeppe kezida Isra7eele asaas inttes GODAY yootida qaala hayssa siyite.

² Xoossay, «Kumeththa alamen diza dere ubbaafe ta inttena xalla dooradis; intte ooththiza nagara ubbaa gishshas ta inttena qaxxayays» gees.

³ Nam7u asati oge issife baana giidi qachchontta aggiko issife baanaas dandayzoo?

⁴ Gaammoy wora giddon aykko miza miish shankkati demmontta dishe coo mela xaaggi erizee? Wodalla gaammoy aykko miza miish demmontta dishe ba dizason coo mela ba qaala sissi erizee?

⁵ Yardey woykko gitey bayndason coo mela gaden kafoy oyketti erizee? Woykko diizay issi miishshi bana bochchontta dishin coo mela piri erizee?

⁶ Katama giddon olas zayey punettishin babon kokkorontta asi di erizee? GODAA sheney baynda dishin katama bolla iita miishshi gakki erizee?

⁷ GODAY ba xuura ba oosanchcha nabetas koyrotti yootontta dishe aykkoka ooththenna.

⁸ Gaammoy xaaggiin siyidi dagammonttay oonee? GODAY ba xuura izas yootiin tinbite haasayonttay oonee?

Samaariya Kundeth

⁹ Ashdoodeninne Gibxen diza miixatan diza ubbaas, «Samaariya zumata bolla shiiqite; heen isttan oosettiza gene oosonne bul7aketizayssa xeellite» gi awajjite.

¹⁰ GODAY, «Hayti dereti lo7o ooso erettenna. Makkallaninne genen ekkida miishshan ba miixa kunththeettes.

¹¹ Hessa gishshas intte dere morkkey worajjana; intte miixata laallidi intte keeththaaka bonqqana» gees.

¹² GODAY, «Heenththanchchay gaammo doonappe dors woththi ekkiza wode dorsas nam7u gedata woykko duuxa hayththata woththi ekkiza mala Samaariya biittan ishalon uttida Isra7eele asaappe guuththati xalla attana» gees.

¹³ Salo GODAY, «Hekko ane hayssa siyite! Yaaqoobe zereththa bolla markkattite.

¹⁴ Istti ooththida nagara gishshas tani Isra7eele asaa qaxxayiza wode Beetelen diza yarsho yarshizasohota tani laallana; yarshizasohota bolla diza kaceti meqeretti kundana.

¹⁵ Istti izan bonenne balgo diza keeththata ubbaa ta laalla dhayssana; danggarsa zaalen lo7eththi alleqissida keeththati wurikka laalettana; gita keeththati wurikka dhayana» gees.