ኣሞጼ ቲንቢቴ 2 - Geeshsha Maxaafa

¹ GODAY Mo7aabes, «Mo7aabe asay zaari zaaridi ooththida nagara gishshas ta istta qaxxayontta aggike; istti Eedoome kawo meqeththi Bidinth gidana gakkanaas xuuggida.

² Hessa gishshas tani Mo7aabe bolla tama yeddana; he tamay Qiriyaate miixata maana. Olanchchati maggulth, waasonne zaye giiris sissishe Mo7aabe asaa wodhi wursana.

³ Tani istta haariza kawozanne daannata ubbaa dhayssana» gees.

⁴ GODAY Yuhuda, «Yuhuda asay zaari zaaridi ooththida nagara gishshas ta istta qaxxayontta aggike; istti ta woga kadhida; ta azazotakka naagontta ixxida; kase istta aawati goynnida eeqa xoossata kaallidi istti balettida.

⁵ Hessa gishshas tani Yuhuda bolla tama yeddana; he tamay Yerusalaame miixata maana» gees.

⁶ GODAY Isra7eeles, «Isra7eele asay zaari zaaridi ooththida nagara gishshas ta istta qaxxayontta aggike. Xillo asata biras, metotidayssa toho caammas bayzida.

⁷ Istti manqota gudulla bolla genderisidi istta hu7e yedhetteettes; qohettidaytas geella pirdeettes; aawaynne nay issi maccassayra laymateettes; istti hessaththo ooththi ooththidi ta sunth tuniseettes.

⁸ Asappe oyso ekettida may7o hiixxidi Yarsho yarshizasoza garsan aqeettes; istti bantta xoossa keeththan edasi ekkidi woyne ushshu izan uyeettes.

⁹ «Isttas adussateththay ziga miththa mala; minoteththayka xiidda mala gidida Amoore asaa tani intte sinththafe dhayssadis; ayfontta mala xaphoppe shodda diggadis.

¹⁰ Tani inttes Amoore dere biitta immanaas inttena Gibxeppe kessadis; oyddu tammu layth kumeth bazzora kaaleththa ehada laatissadis.

¹¹ Qasseka tani intte attuma nayta garsafe nabeta, naateththata giddofe naaziraaweta denththadis. Isra7eele derezoo! Hessi tumu gidennee?» gees.

¹² Xoossay, «Intte gidikko Naaziraaweta woyne ushshu ushshideta; nabetakka tinbite yootontta mala azazideta.

¹³ Be7ite daro kath deexetti caanettida gaarey garsara diza miish liiqisiza mala tanikka inttena liiqisana.

¹⁴ Pilata asi kessi ekki attenna; minoykka ba minoteththan maadettenna; wolqqamaykka ba shemppo ashshenna.

¹⁵ Wondafe oykkidaadey ba dizason minni eqqidi ola zaarenna; pilata olanchchayka woxxi attenna; toganchchayka ba shemppo ashshenna.

¹⁶ Ola qaratikka he gallas gooro kallo baqatana» gees.