ኣሞጼ ቲንቢቴ 1 - Geeshsha Maxaafa

¹ Ooziyay Yuhuda kawo; hessaththoka Iyo7aasa naa Iyorba7aamey Isra7eele kawo gidi dishin hessika biittay qaaxxanaappe nam7u layththafe sinththan Isra7eele gishshas Tequhen mehe heemmizayta giddofe Amoxey be7idi yootida qaalay hayssafe kaalli dizayssa;

² Amoxey, «GODAY Xiyooneppe ba qaala dhoqqu histti sissees; Yerusalaameppe giirees; mehey heemettizasoti melana; Qarmeloose zuman diza cililati shullana» gides.

Isra7eele Heeran Diza Dereta Bolla Yaana Pirda

³ GODAY Aaraames, «Damasqo asay zaari zaaridi ooththida nagara gishshas ta istta qaxxayontta aggike; istti Gala7aade asaa birata achchara diza kath bukkiza lodan bukkida.

⁴ Kawo Azaheele keeththan tama yeddana; he tamay Kawo Beeni-Hadaade miixata maana.

⁵ Damasqo katama pengeta ta menththereththana; Beeti-Edene dere kawozanne Awe zullaan diza asaa ta dhayssana; Aaraame dere asaykka di7ettidi gede Qiire dere baana» gees.

⁶ GODAY Filisxeemes, «Gaaza asay zaari zaaridi ooththida nagara gishshas ta istta qaxxayontta aggike; istta dereza ubbaa di7i efidi Eedoomes bayzida.

⁷ Izi gimbeta maana mala Gaaza miixan tani tama yeddana.

⁸ Asqeloona dere kawozanne Ashdoode dere asaa ta pitta dhayssana; Filisxeemen dizayti wuri wurana gakkanaas tani ta kushe Aqaroone bolla denththana» gees.

⁹ GODAY Xirooses, «Xiroose asay zaari zaaridi ooththida nagaraa gishshas ta istta qaxxayontta aggike; istti ba ishateththa caaqo qaala laallidi ba di7ida dereza ubbaa Eedoomes bayzida.

¹⁰ Hessa gishshas tani Xiroose katama gimbeta bolla tama yeddana; he tamay izi miixataka maana» gees.

¹¹ GODAY Eedoomes, «Eedoome asay zaari zaaridi ooththida nagara gishshas ta istta qaxxayontta aggike; istti ba ishata Isra7eele naytas qadhettontta mashshan gooddida; ba hanqo doshisontta eexxidi isttas mishettontta ubbaa dippi histtida.

¹² Hessa gishshas tani Temaane gimbeta bolla tama yeddana; he tamay Booxira miixataka maana» gees.

¹³ GODAY Amoones, «Amoone asay zaari zaaridi ooththida nagara gishshas ta istta qaxxayontta aggike; istti dere zawa aassanaas Gala7aade dere shaara maccassata ulo daakkida.

¹⁴ Hessa gishshas Eraaba katama gimbeta bolla tani tama yeddana; he tamay istta miixata maana. Hessafe guye ola gallassan waasoy darana; olazikka gote carko mala eesotana.

¹⁵ Istta kawoynne daannati di7ettana» gees.