2ሳሜላ ማጻፋ 23 - Geeshsha Maxaafa

Dawiti Wurseththan Yootida Qaala

¹ Dawiti wurseththan haasayda qaalay hayssafe kaallizayssa; «Yaaqoobe Xoossaan tiyettidayssi, Ubbaafe Dhoqqa Xoossay dhoqqu dhoqqu histtida asi, Isra7eelen dosettida yeththanchchay, Isseye naa Dawite tinbite qaalay hayssa;

² «GODAA Ayanay ta baggara haasaydes; iza qaalay ta doonan dees.

³ Isra7eele Xoossi haasaydes; Isra7eele zaallay taas, ‹Asaa xilloteththan haarizay, Xoossa yashshateththan ayssizay,

⁴ izi shaaray bayndason, maalado xalqqey keziza wode diza poo7o mala; izi biitta bolla maata purccisiza xalqqe mala, iray bukki aadhdhishin ke7iza awa mala› gides.

⁵ «Ta keeththi Xoossa matan likke gidennee? Ubba miish giigsidinne naagidi, tanara mernaa caaqo qaala geliday iza gidennee? Ta atoteththa polo gaththanay ta amo ubbaa taas immanay iza gidennee?

⁶ Gido attiin iita asati ubbay, kushen shiishshana dandayettontta agunththa mala wora wodhdhana.

⁷ Agunth bochchiza ubbaas, birata woykko toora tooma koshshees; istti ba dizason mulera taman xuugettana.»

Erettida Qara Asata

⁸ Dawites erettida qara asata sunththi hayssafe kaallizayssa; koyroyssi Tahikimoone dere as Yoshebi-Baashebete gidishin izi heedzdzu halaqatas halaqa; izikka issi olan ba toora xongidi 800 as wodhida qara.

⁹ Nam7anththozi Ahihohe dere as Doode naa El7ezeere; olettanaas issi bolla shiiqida Filisxeeme asay eqettiza wode Isra7eele asay baqatides; Dawitera diza heedzdzu qarata garsafe issoy iza.

¹⁰ Izi gidikko ba eqqidaso yeddibeenna; iza kushey argacanaashenne mashshara issife oykettanaashe gakkanaas Filisxeemeta olides; he gallas GODAY izas gita xoono immides. Baqati bida olanchchati hayqqida asaappe ola miishshinne may7o xalla qaaratanaas Ele7eezerekko guye simmida.

¹¹ Heedzdzanththozi Harare dere as Aage naa Shaama; Filisxeemeti Leehan kumeth misiray zerettida gaden istti issi bolla shiiqi dishin Isra7eele olanchchati Filisxeemeta sinththafe baqatida.

¹² Shaamay gidikko ba eqqidaso yeddibeenna; he olaa eqettidi Filisxeemeta wodhides; he gallas GODAY gita xoono immides.

¹³ Kaththa shiisho wode Filisxeeme olanchchati Erafayme zullen dunkaani uttidaashe heedzdzu tammu halaqatappe heedzdzati Dawiti dizaso Adulaame gongolo yida.

¹⁴ He wode Dawiti miixa giddon dees; Filisxeeme olanchchati Beeteliheemen deettes.

¹⁵ Dawiti laamotidi, «Beeteliheeme penge achchan diza olla haaththaafe taas oonee ehanay!» gides.

¹⁶ Hessa gishshas erettida ola qara heedzdzati Filisxeeme olanchchata giddora kanththi biidi Beeteliheeme penge achchan diza haaththa ollafe duuqqi Dawites ehida; izi gidikko GODAA sinththan yarsho histti gussides attiin uyibeenna.

¹⁷ «Abeet GODAWU! Hayssa mala ooso ta wostta ooththoo? Hayssi taappe haakko! Hayssi bantta shemppo bolla pirdida asata suuth deennee?» giidi Dawiti uyana koyibeenna; hekko erettida heedzdzu ola qarati ooththida goobateththa oosoy hessa.

¹⁸ Xuriya naa Iyo7aabe ishaa Abisayey heedzdzu erettida ola qaratas halaqa; heedzdzu xeetu asaa bolla ba toora xongidi wodhidanne ha heedzdzu qarata mala erettida gooba asa.

¹⁹ Abisayey heedzdzatappe bollara keehi erettida as gidennee? Izi isttafe gidontta aggikokka izi isttas halaqa.

²⁰ Hara erettida qaray Qabxi7eele dere as Yoodahe naa Bannayay gita erettida ooso ooththides. Izikka nam7u erettida Mo7aabe asata wodhides; qasseka shachchi bukkida gallas olla giddo gelidi gaammo wodhides.

²¹ Hessaththoka issi gita Gibxe as wodhides; he Gibxe addezi ba kushen toora oykkides; gido attiin Bannayay izara olettanaas guufe oykkidi izakko bides; Gibxe addeza kusheppe iza toora woththi ekkidi iza tooran iza wodhides.

²² Yoodahe naa Bannaya goobateththi hessa; izikka erettida heedzdzu qara asata mala erettida gooba asa.

²³ Izi he heedzdzu tammu asatappe aadhdhi bonchchettidaade; gido attiin erettida heedzdzu qara asata mala sabettenna. Dawiti Bannaya ba bonchcho zabeta bolla shuumides.

²⁴ He heedzdzu tammatappe baggayta sunththi hayssafe kaallizayssa. Iyo7aabe ishaa Asaheele, Beeteliheeme dere as Doode naa Elyaane,

²⁵ Harare dere as Shammaha, Harare dere as Eliqa,

²⁶ Palixe dere as Heleexe, Tequhe dere as Iqesha naa Ira,

²⁷ Anatoote dere as Abi7eezere, Huushe dere as Mebunaye,

²⁸ Ahihohe dere as Xalmoone, Naxoofe dere as Mahiraye,

²⁹ Naxoofe dere as Ba7aana naa Helebe, Biniyaame baggafe Gibi7a dere as Eribaye naa Ittaye,

³⁰ Piraatoone dere as Bannaya, Ga7aashe zulle as Hidaaye,

³¹ Arabe dere as Abi-Elboone, Barhume dere as Azimoote,

³² Shaalboone dere as Eliyaahibe, Yashene nayta, Yoonataane,

³³ Harare dere as Shammaha naa, Harare dere as Sharare naa Ahi7aame,

³⁴ Ma7ikate dere as Ahasiba naa Elfaleexe, Gilo dere as Akxofeele naa El7aame,

³⁵ Qarmeloose dere as Hexiro, Arabe dere as Paaraye,

³⁶ Xoobba dere as Naataane naa Yigi7aale, Gaade dere as Baane,

³⁷ Amoone dere as Zallaqa, Xuriya naa Iyo7aabes gondalle oykkiza Bi7eroote dere as Nahiraye,

³⁸ Yatire dere as Ira, Yatire dere as Gaareebe,

³⁹ Hessaththoka Hiite dere as Ooriyo, istti issi bolla heedzdzu tammanne laappuna.