2ሳሜላ ማጻፋ 22 - Geeshsha Maxaafa

Dawiti Yexxida Galata Mazamure

¹ GODAY Dawite iza morkketa ubbaa kusheppenne Sa7oole kusheppe ashshida wode Dawiti hayssafe kaalliza mazamure GODAA bonchchos yexxides;

² «GODAY taas zaalla, taas miixanne tana ashshizaade.

³ Ta Xoossay ta geemettiza zaalla, taas gondallenne atoteththa kace; izi taas mino miixa; taas zempponne tana ashshizaade; ne tana makkallanchchatappe ashshaasa.

⁴ Galatay bessiza GODAA ta xeygays; tani ta morkketappekka attays.

⁵ «Hayqo dambalay tana giddoththides; dhayssiza di7oy tana mittides.

⁶ Si7oole wodoroy ta bolla xaaxettides; hayqo woximadey taas waaxettides.

⁷ Ta ceecida wode GODAA xeygadis; ta Xoossaako waassadis. Izi ba Keeththan dishe ta cenggurssaa siyides; ta waasoy iza hayththan gelides.

⁸ «Izi hanqettida gishshas biittaya kokkoradussinne shirotadus; salota yochchi za7idessinne qaaxxides.

⁹ Iza siidheppe hanqo cuway cuwattides; iza doonappe xuuggiza tamay eexxides; tama bonqoyka kezides.

¹⁰ Salota daakki wodhdhides; iza toho garsan dhippi gida shaaray dees.

¹¹ Izi kirube bolla uttidi piradhdhides; carko qefe bolla uttidi pude paallides.

¹² Dhumay iza giddoththides; dhippi gida ira shaaray iza genththides.

¹³ Iza sinththan diza poo7ozappe wawaci giza wolqqanththi kezides.

¹⁴ GODAY salotappe guummides; Ubbaafe Dhoqqa Xoossaa cenggurs sissides.

¹⁵ Ba yiishshaa dukkidi ba morkketa laallides; wolqqanth yeddidi istta shirosides.

¹⁶ GODAA seerappenne iza siidheppe keziza hanqo cuwaappe dendidayssan, abba giddon diza zulleti beettida; sa7a yochchati qonccida.

¹⁷ «Bollafe ba kushe yeddidi tana oykkides; ciimma haaththata giddofekka tana kessides.

¹⁸ Mino morkketappe, tani isttara eqettana dandayontta baaligaaratappe tana ashshides.

¹⁹ Ta metotida gallas ta bolla yida; gido attiin GODAY tana kaafides.

²⁰ Izi tana aakoso kessides; tanan ufayettida gishshas izi ashshides.

²¹ «GODAY taas ta xilloteththa mala ooththees; ta xilloteththa mala taas kushe zaarides.

²² GODAA oge ta naagida gishshas tani Xoossafe sher7i gaada iita ooththabeekke.

²³ Iza woga ubbay ta sinththan dees; iza maarappeka haraso simmabeekke.

²⁴ Iza sinththan borey baynda de7adis; tanakka nagarappe naagadis.

²⁵ GODAY ta xilloteththa mala, iza sinththan diza geeshshateththaa mala taas kushe zaarides.

²⁶ «Ammanettidaytas nekka ammanettidayssa, suuretas neni suure gididayssa bessaasa.

²⁷ Geeshshatas neni geesh gididayssa, makkalla asas neni makkalla gididayssa bessaasa.

²⁸ Neni qohettida deraa ashshaasa; gido attiin ne ayfey kawushshanaas otoranchchata xeellees.

²⁹ Abeet GODAWU! Neni taas xomppe; GODAY ta dhumaa poo7isees.

³⁰ Ne maadon morkketa ola sinth suga suga baana; tani ta Xoossaa wolqqan gimbeza bollara xaallays.

³¹ «Xoossa ogey kumeththa; GODAA qaalay muuruta; izan ammanettidayta ubbaas izi gondalle.

³² GODAAPPE attiin hara Xoossi oonee? nu Xoossaafe attiin zaallay oonee?

³³ Taas wolqqa immizayssi, ta ogekka suurisizayssi izi ta Xoossa.

³⁴ Ta tohota genessa toho mala pilatisees; dhoqqasohotan tana minththi essees.

³⁵ Ta kusheta ola tamaarssees; ta qeseti xarqimala wondafe zinqqeettes.

³⁶ Ne atoteththa gondalle taas immadasa; ne kaafoy tana gitasides.

³⁷ Ta tanggo aassadasa; ta tohotikka dhuphettibeettenna.

³⁸ «Ta morkketa yedeththa dhayssadis; istti dippi gaanaashe gakkanaas guye gabeekke.

³⁹ Mulera ta istta dhayssadis; simmidikka eqqanaas dandaybeettenna; ta toho garsankka kundida.

⁴⁰ Olas taas wolqqa immadasa; tanara eqettizayta ta toho garsan ne gulbatissadasa.

⁴¹ Ta morkketi guye simmi baqatana mala ooththadasa; tana ixxizayta dhayssadasa.

⁴² Istti maado demmanaas waassida; gido attiin istta maaddiday deenna; istti GODAAKKO waassida; gido attiin izi isttas zaaribeenna.

⁴³ Gudulla mala istta liiqisa gaaccadis; ogen diza urqqa mala istta gindadissinne yedhettadis.

⁴⁴ «Ta derey qoppida daafaappe tana ashshadasa; kawoteththatas tana hu7e histtadasa. Ta erontta asay taas haarettides.

⁴⁵ Allagati tana shoobbanaas yida; istti tana siyida mala taas azazetteettes.

⁴⁶ Allagati babbida; bantta miixappe kokkorishe yida.

⁴⁷ «GODAY de7o Xoossa; ta zaallay izi anjjetto; ta atoteththa zaallay ta Xoossay dhoqqu dhoqqu go.

⁴⁸ Ta gishshas halo kessiza Xoossay, kawoteththata taas haarisizay iza.

⁴⁹ Izi ta morkketa kusheppe tana kessees; ta morkketappe tana dhoqqu dhoqqu histtadasa; menxe iitatappe tana ashshadasa.

⁵⁰ Abeet ta GODAWU! Kawoteththata giddon ta nena galatana; ne sunththaas galata mazamure ta yexxana.

⁵¹ Izi kawozas gita xoono immees; ba tiyda Dawitesinne iza zereththas, ba mernaa kiyateth bessees.»