2ሳሜላ ማጻፋ 1 - Geeshsha Maxaafa

Dawiti Sa7oole Hayqo Sis

¹ Sa7ooli hayqqidaappe guye Dawiti Amaaleeqe asaa oli xoonidi simmides; Xigilaagenkka nam7u gallas gam7ides.

² Heedzdzanththo gallas daakettida may7o may7idi ba hu7e bolla gudulla laallidi issi naateththa naa dayssi Sa7oole gutappe yides. Dawitekko gakkida mala zaqulth zirxxi giidi bonchchos kushe denththides.

³ Dawitikka iza, «Ne awappe yadii?» giidi oychchides. Izi qasse, «Tani Isra7eele asay dizasoppe kessa ekka yadis» gides.

⁴ Dawiti qasse iza, «Aazee waaniday ane taas ubbaa yoota» giidi oychchides. Izikka Dawites, «Asazi olasoppe baqatides; daroy kundides; Sa7oolinne iza naa Yoonataaney hayqqida» gides.

⁵ Hessafe guye Dawiti woreza izas yootida naaza, «Sa7oolinne iza naa Yoonataaney hayqqidayssa aazan eradii?» gi oychchides.

⁶ Woreza izas yootida naateththa naazi izas zaaridi, «Toorontta dashe tani pude Gilbo7a zuma bolla kezadis; Sa7ooli heen ba toora bolla zemppi dishin para-gaaretinne toga asay goodereththishe iza bolla gakki wodhdhida.

⁷ Izikka guye simmi xeellidi tana be7idi xeygides; tanikka, ‹Ta nees ay ooththoo?› gadis.

⁸ «Izikka tana, ‹Ne oonee?› gi oychchides. Tanikka izas, ‹Tani Amaaleeqe asa› gaada yootadis.

⁹ «Izikka taas, ‹Ta hayqqanaas toqqays; gido attiin taas shemppoy kezontta ixxides; zay haa ya; tana shempisa› gides.

¹⁰ Histtiin tani izi kundichchidaappe guye izi attonttayssa erada ta izakko shiiqada iza wodhadis. Iza hu7e bolla diza kallachchazanne iza qese sagayoza ekkada hekko ta godaas ehadis» gides.

¹¹ Hessafe guye Dawitinne izara diza asay ubbay bantta may7o daakkida.

¹² Istti mashshan siifettida gishshas Sa7oolessinne iza naa Yoonataanes, GODAA olanchchatassinne kumeththa Isra7eele asaas kayottida, yeekkidanne omars gakkanaas xoomida.

¹³ Dawiti qasse he woreza izas ehida naateththaza, «Ne awappe yadii?» gi oychchides. Naazikka, «Tani ne deren beti diza Amaaleeqe asa naa» gides.

¹⁴ Dawiti qasse, «Histtiin neni GODAY tiydayssa dhayssanaas ne kushe waana xala denththadii?» gi oychchides.

¹⁵ Hessafe guye Dawiti naateththatappe issaa xeygidi, «Neni izakko shiiqada iza wodha» gides. He naateththazi Amaaleeqeza caddi wodhides.

¹⁶ Dawitikka Amaaleeqeza, « ‹GODAY tiydayssa tani wodhadis› gaada ne bolla nerkka ne markkattida gishshas ne suuththaa gomey ne bolla gido!» gides.

Sa7oole Gishshassinne Yoonataane Gishshas Shiiqida Zilassa Ginxo

¹⁷ Dawiti Sa7oole gishshassinne Yoonataane hayqo gishshas zilalishe yeekkides.

¹⁸ Qasseka, «Wondafe milas» geetettiza zilasaa Yuhuda deraa tamaarsana mala azazides. Hessi Yashaare Maxaafan xaafeti uttides.

¹⁹ «Haysso Isra7eelee! Ne bonchchoy zumbullata bolla cadetti hayqqides; ola qarati waani hayssaththo kundidoo!

²⁰ «Filisxeeme macca nayti ufayettontta mala, qaxxarettontta asaa macca nayti ililontta mala, hayssa Geeten woresopite; Asqeloonankka awajjofte.

²¹ «Intteno Gilbo7a zumatoo! Intte bolla iray bukkofo; xaazaykka intte bolla dooppo; yarshos gidiza kaththi intte goshsha biittan mokkofo. Heen ola qaraza gondalley tunides; Sa7oole gondalley hayssafe guyen zayten qucettenna.

²² Yoonataane wondafey wodhontta simmi erenna; Sa7oole mashshayka morkke qanxxereththi yeggees; Wolqqamatakka menththereththi yeggees; iza morkketakka wodhides.

²³ «Sa7oolinne Yoonataaney shemppora paxa dishe siiqettizaytanne qofan gayttizayta. Hayqqisheka shaakettonttayta; golle kafoppe pilatizayta; gaammofekka minnizayta.

²⁴ «Intteno Isra7eele maccassatoo! Ochcha teera misatiza al7o qamisa inttena mayzida; intte may7oza worqqa xibaben alleqissida; Sa7ooles yeekkite.

²⁵ «Ola qarati waani hayssa mala olason kundidoo! Yoonataaney ne zumbullata bolla cadetti hayqqides.

²⁶ Ta isha Yoonataanee! Tani ne gishshas kayottadis; ne taas keeha al7okoshin; ne siiqoy tana malalisizaazakkoshin macca siiqoppeka keehi aadhdheeskoshin.

²⁷ «Ola qarati waani kundidoo! Ola massaratikka waani hada gidanee!»