1ካዎታ ማጻፋ 4 - Geeshsha Maxaafa

Solomooney Sunththida Shuumeta

¹ Kawo Solomooney Isra7eele biitta ubbaa bolla kawotides.

² Izi shuumida alaafeti hayssafe kaalli xaafettidayta. Saadooqe naa Azaariyaasi qeese.

³ Shiisha nayti Elihorefinaynne Akayay waanna xaafeta; Ahiluude naa Iyoosaafixey taarike xaafe;

⁴ Yoodahe naa Bannayay ola gadawa; Saadooqeynne Abiyaataarey qeeseta;

⁵ Naataane naa Azaariyaasi dere ayssizaytas alaafe; Naataane naa Zaabudey qeesenne kawos mata zoranchcha;

⁶ Ahishaarey kawo keeththa alaafe; Abida naa Adooniraami un7ettidi wolqqa ooso ooththizayta alaafe.

⁷ Qasse Solomoones Isra7eele biitta ubbaan tammanne nam7u dereta ayssizayti deettes; istti kawossinne kawoson diza asaa ubbaas miza kath shiishshizayta; istti taran taran layththa giddon issi issi aginas gidiza kath eheettes.

⁸ Istta sunththinne istta ayssiza zooneti hayssafe kaallidi xaafettida. Beeni-Huurey Efreeme gezze ayssees.

⁹ Beeni-Diqaarey Maqaxa, Sha7albime, Beeti-Shemishenne Eeloonenne Beeti-Hanaane dereta ayssees.

¹⁰ Beeni-Heseedi Arubboote deren diza Sookonne Hefeere dere ubbaa ayssees.

¹¹ Beeni-Abinadaabi Naafoti-Doore biitta ayssees; izikka Solomoone nayo Xaafiti azina.

¹² Ahiluude naa Ba7aanay Ta7inaakenne Magiddo dere, Phartaaneppe duge biidi Izra7eelen diza Beeti-Sha7aane gakkanaas, heeppeka biidi Yoqima7aame pinnidi Aabeeli-Mahoole dere gakkanaas dizayssa ayssees.

¹³ Beeni-Gebeeri Gala7aaden diza Eramoote dere, Gala7aaden Minaase naa Ya7ire dereta, iza yuushon gimbenne gimbe pengetan xarqimala birata kolatati diza 60 gita katamatanne Baasaane biittan diza Argoba dere ayssees.

¹⁴ Iddo naa Ahinaadaabi Mahanayme dere ayssees.

¹⁵ Ahima7aasi Niftaaleme dere ayssees; izi Solomoone nayo Baasemaati azina.

¹⁶ Hushe naa Ba7aanay Aaseerenne Ba7aaloote dere ayssees.

¹⁷ Paaruhe naa Iyoosaafixey Yisakoore dere ayssees.

¹⁸ Eela naa Shim7ey Biniyaame dere ayssees.

¹⁹ Uure naa Gebeeri Gala7aade biittan diza Amooreta kawo Sihoone derenne Baasaane kawo Aage dere ayssees. He dereta ubbaa ayssizayta bolla alaafeteththi diza issi asi dees.

Dureteththi Kumida Solomoone Kawoteth

²⁰ Yuhuda asaa qoodaynne Isra7eele asaa qooday abba shaamintta mala corattides; istti mishenne uyishe ufayssan de7ida.

²¹ Solomooney Efiraaxise Shaafaappe doommidi Filisxeeme biittaa gakkanaas, hessafekka bollara Gibxe zawa gakkanaas diza kawoteththata ubbaa haarides; he biitta asati izas giira giirida; istti izi diza layth ubbaan izas haarettida.

²² Solomoones hach hach qumas 50 konttaale muuruta dhiille, 100 konttaale dhiille,

²³ dhiikettida 10 boorata, yeda miza 20 booratanne 100 dorsata, istta bollaka cofoshota, gaarata, genessatanne lo7o kafota koshshees.

²⁴ Solomooney Efiraaxise Shaafappe arshey wulliza baggara diza kawoteththata ubbaa Tifisa katamappe doommidi Gaaza katama gakkanaas haarides; ba yuushon diza ubbaa deretarakka saron de7ides.

²⁵ Solomooney de7ida layth ubbaan Daaneppe biidi Bersaabehe gakkanaas Yuhuda asaynne Isra7eele asay ubbay ba woyne tura kuwaninne ba eththaa kuwan woppan uttida.

²⁶ Solomoones para-gaareta goochchiza 40,000 paratinne 12,000 toga asati deettes.

²⁷ He zooneta ayssizayti bana gakkida aginan taran taran kawo Solomoonessinne iza maaddafe maanaas yida asaas ubbaas aykkoka pacisontta shiishsheettes.

²⁸ Qasseka gaare goochchiza paratinne hankko parati bangganne harqqo ehidi woththizason woththeettes.

²⁹ Xoossay Solomoones aadho erateth, keehi gita akeekanne zaway baynda erateth immides.

³⁰ Solomoones diza aadho erateththay arshey mokkiza baggara dizayta aadho erateththafenne Gibxetas diza aadho erateththa ubbaafekka aadheththa.

³¹ Izi asa ubbaafe aadho eranchcha; qasse izi Ezirahe as Etaaneppe, Maahola naytappe Hemaaneppe, Kalkoleppenne Daridaappeka aadho eranchcha; iza goobateththi iza yuushon diza kawoteth ubbaan siyettides.

³² Izi 3,000 leemisota haasaydes; qasseka 1,005 yeththata yexxides.

³³ Solomooney Libaanoose zigappe biidi keeththa gimbe bolla mokkiza hisophphe mith gakkanaas diza doozata gishshas yootides; hessaththoka meheta, do7ata, kafota, sa7ara gooshettiza medheteththata gishshassinne moleta gishshas tamaarsides.

³⁴ Iza aadho erateththaa siyida sa7a kawota ubbaafe kiitettidayti iza aadho erateththaa siyanaas yida.