1ታሪኬ ማጻፋ 27 - Geeshsha Maxaafa

Isra7eele Olanchchata Kaaleththizayta

¹ Bantta butten butten layth kumeth aginan aginan kawozasinne deraas taran taran ooththiza Isra7eele keeththa asata halaqati, shaalaqatinne mato halaqati, ola gadawati hayssafe kaallizayta; issi issi butten 24,000 asi dees.

² Koyro aginan ooththiza buttezas alaafey Zabdi7eele naa Yashobi7aame; iza buttezan 24,000 asi dees.

³ Yashobi7aamey Paareese zare; izi koyro aginan olas ke7iza halaqatas gadawa.

⁴ Nam7anththo aginan ooththiza buttezas alaafey Ahihohe dere as Doodeya; iza buttezan 24,000 asi dees; ha butteza izappe garsara kaaleththizay Miqiloote.

⁵ Heedzdzanththo aginan ooththiza buttezas alaafey qeese Yoodahe naa Bannaya; iza buttezan 24,000 asi dees.

⁶ Bannayay 30 asatappe aadhdhi erettida mino as gidida gishshas izi istta bolla halaqa gidides; iza naa Amizabaadey izappe garsara azazizaade gidides.

⁷ Oydanththo aginan ooththiza buttezas alaafey Iyo7aabe isha Asaheele; iza buttezan 24,000 asi dees; izasohon alaafetiday iza naa Zabaadiya.

⁸ Ichchashanththo aginan ooththiza buttezas alaafey Yixira as Shamihuute; iza buttezan 24,000 asi dees.

⁹ Usuppunththo aginan ooththiza buttezas alaafey Tequhe as Iqesha naa Ira; iza buttezan 24,000 asi dees.

¹⁰ Laappunththo aginan ooththiza buttezas alaafey Efreeme zareppe Piloone dere as Heleexe; iza buttezan 24,000 asi dees.

¹¹ Osppunththo aginan ooththiza buttezas alaafey Huushe as Sibikaye; izi Zaraahe zareppe yides; iza buttezan 24,000 asi dees.

¹² Uddufunththo aginan ooththiza buttezas alaafey Biniyaame zareppe Anatoote as Abi7eezere; iza buttezan 24,000 asi dees.

¹³ Tammanththo aginan ooththiza buttezas alaafey Zaraahe zareppe Naxoofe dere as Mahiraye; iza buttezan 24,000 asi dees.

¹⁴ Tammanne issinththo aginan ooththiza buttezas alaafey Efreeme zareppe Piraatoone as Bannaya; iza buttezan 24,000 asi dees.

¹⁵ Tammanne nam7anththo aginan ooththiza buttezas alaafey Otin7eele zareppe Naxoofe dere as Heldaye; iza buttezan 24,000 asi dees.

Isra7eele Asaa Garsan Qommota Qommota Kaaleththiza Ola Gadawata

¹⁶ Isra7eele asaa garsan qommota qommota bolla shuumettida ola gadawati hayssafe kaallidi xaafettidayta. Oroobeele qommo bolla summiday Zikire naa El7ezeere. Simoona qommo bolla summiday Ma7ika naa Shafaaxiya.

¹⁷ Lewe qommo bolla summiday Qamu7eele naa Hashaabiya. Aaroone zarkke bolla summiday Saadooqe.

¹⁸ Yuhuda qommo bolla summiday Dawite isha Eelihu. Yisakoore qommo bolla summiday Mika7eele naa Omire.

¹⁹ Zaabiloone qommo bolla summiday Abdiyu naa Yishima7e. Niftaaleme qommo bolla summiday Azari7eele naa Yarmoote.

²⁰ Efreeme qommo bolla summiday Azaaziya naa Hose7e. Yordaanoose shaafappe arshey wulliza baggan diza Minaase qommo baggata bolla summiday Paddaya naa Iyu7eele.

²¹ Yordaanoose shaafappe arshey mokkiza baggan Gala7aaden diza Minaase qommo baggata bolla summiday Zakaraasa naa Iddo. Biniyaame qommo bolla summiday Abineere naa Ya7isi7eele.

²² Daane qommo bolla summiday Yirohaame naa Azari7eele. Hayti Isra7eele asaa garsan qommota qommota kaaleththiza ola gadawata.

²³ GODAY, «Tani Isra7eele asaa salo xoolintte mala corasana» giidi hidota qaala immida gishshas Dawiti nam7u tammanne hessafe garsara gidida asaa qoodibeenna.

²⁴ Xuriya naa Iyo7aabey asaa qooda doommides shin polibeenna; asaa qoodida gaason GODAY Isra7eele asaa bolla hanqettides; hessa gishshas istta qooday Kawo Dawite taarike mazgaban xaafettibeenna.

Kawo Aqota Bolla Aawateththan Summidayta

²⁵ Kawo keeththan buqura woththiza minjja keeththa alaafey Adi7eele naa Azimoote. Gaxaretan, katamatan, mooththataninne naageso miixatan diza minjja keeththata alaafey Ooziya naa Yoonataane.

²⁶ Goshshanchchata alaafey Kaalube naa Eezire.

²⁷ Woyne mith tokkizasohota alaafey Eramaate dere as Shim7e; woyne ushshu minjjizasota alaafey Shafaame dere as Zabde.

²⁸ Shaara menththotan zumbullata xaphon diza wogara miththinne wola miththata naaganaas alaafeteththi Gadeere dere as Ba7aali-Hanaanes imettides; zayte minjjiza keeththa alaafeteththi Iyo7aasas imettides.

²⁹ Lasharoone demban heemettiza wude meheta alaafeteththi Saaroone as Shiixirayas imettides; shoobban heemettiza wude meheta alaafeteththi Adilaya naa Saafaaxes imettides.

³⁰ Gaamellata bolla alaafeteththi Isma7eele as Obilas imettides. Hareta bolla alaafeteththi Meronoote as Yehidayes imettides.

³¹ Dorsa wudetanne deysha wudeta naagana alaafeteththi Aggaari zareppe gidida Yaazizes imettides; hayti ubbay kawo Dawite aqota naaganaas alaafeteth ekkida.

Kawo Dawite Zorizayta

³² Dawite aawaa ishay Yoonataaney xaafe, akeekanchcha asanne zoriza asa; Hakimoone naa Yihi7eeley kawo nayta dichchizaade.

³³ Akxofeeley qasse kawoza zorizaade; Arkke dere as Hushey kawos siiqo lagge.

³⁴ Akxofeeleppe guye Bannaya naa Yoodaheynne Abiyaataarey kawo zoranchcha gidida; Iyo7aabey kawo olanchchata halaqatas gadawa gidides.