1ታሪኬ ማጻፋ 16 - Geeshsha Maxaafa

¹ Istti Xoossa Taabotaa ehidi Dawiti Taabotaa woththanaas tolida dunkaaneza giddon woththida; histtidi xuugettiza yarshonne issifeteththa yarsho Xoossas yarshida.

² Dawiti xuugettiza yarshozanne issifeteththa yarsho yarshidaappe guye GODAA sunththan dereza anjjides.

³ Hessafe guye Isra7eele asa ubbaas, maccassaassinne attumasaas, hu7en hu7en issi issi guuththa uketh, issi issi qanxxo ashonne issi issi zabibe kompa gishides.

⁴ GODAA Taabotaa sinththan ooththana malanne GODAA Isra7eele Xoossa woossanaas, sabbanaassinne galatanaas Dawiti Lewe qommotappe guuththata sunththides.

⁵ Leweta halaqay Aasaafe; izappe garsara Zakaraasa; Zakaraasara dizayti Yi7i7eele, Shamiramoote, Yihi7eele, Matitiya, Elyaabe, Bannayanne Obeed-Eedoomenne Yi7i7eele; heyti maasinqonne diith diixxana mala summida; Asaafi gidikko daala qaaththanaas summides.

⁶ Qeese Bannayaynne Yahazi7eeley Xoossaa Taabotaa sinththan ubba wode zaye punnana mala summida.

Galata Yeththa

⁷ He gallas Dawiti kasetidi Aasaafessinne izara ooththiza laggetas GODAA galatiza mazamure immides.

⁸ GODAA galatite; iza sunththaa xeygite; izi ooththida ubbaa kawoteththatas yootite.

⁹ Iza sabbite; galata mazamurekka izas yexxite; izi ooththida malalisiza ooso ubbaa yootite.

¹⁰ Iza geeshsha sunththaan bonchchite; GODAA koyzayta wozinay ufayetto.

¹¹ GODAANNE iza wolqqa xomosite; ubba wode iza koyite.

¹² Izi ooththida malalisiza oosota, malaatatanne iza pirdaa akeekite.

¹³ Intteno Xoossa aylle Isra7eele zereththatoo! Intteno doorettida Yaaqoobe naytoo!

¹⁴ Izi GODAY nu Xoossa; iza pirday ubbaa bollanna.

¹⁵ Ba caaqqida qaalaa mernaas, ba azazidayssaka shii yeleta gakkanaas qoppees.

¹⁶ Abrahaames caaqqida caaqaa, Yisaaqas immida hidota qaalaa,

¹⁷ Yaaqoobes woga gidana mala, Isra7eelesikka mernaa caaqo qaala gidana mala minththides.

¹⁸ «Kanaaney nees xinxxo gidana mala ta nena laatissana» gides.

¹⁹ Istti qoodan guuth gidi diza wode, deraasikka imath gidi diza wode,

²⁰ issi dereppe hara dere, issi kawoteththafe hara kawoteth toylattida.

²¹ Oonikka istta un7eththana mala aaththi immibeenna; istta gishshas kawota seerides;

²² «Ta tiydayta bochchofte; ta nabeta qohopite» gides.

²³ Biitta ubbay GODAAS yexxite; izi ashshizayssa hach hach yootite.

²⁴ Kawoteththatas iza bonchcho awajjite; izi ooththida malalisiza miishshata dere ubbaas yootite.

²⁵ GODAY gita; izas bessiza galataykka dhoqqa; xoossata ubbaafe aadhdhees; izas yayyanaas bessees.

²⁶ Ayzaabeta xoossati ubbay eeqa xoossata; GODAY gidikko salota medhdhida Xoossa.

²⁷ Bonchchoynne teemay izas dees; minoteththinne ufayssi iza Keeththan dees.

²⁸ Intteno asa zare ubbatoo! GODAA sabbite; «Bonchchoynne wolqqay GODAASSA» gi yootite.

²⁹ GODAA sunththaas bessiza bonchcho immite; yarsho ekkidi iza sinth shiiqite; iza geeshshateththa bonchcho gishshas GODAAS goynnite.

³⁰ Biittan diza as ubbay iza sinththan kokkorite; Sa7ay minni eqqides; mulekka qaaxxenna.

³¹ Saloti ufayetetto! sa7aykka hashshu go! Kawoteththata giddon isttas, «GODAY kawotides!» getto.

³² Abbaynne iza giddon diza ubbay guummetto; dembatinne istta bolla diza ubbati ufayetetto.

³³ Izi biitta bolla pirdanaas yaana. He wode wora miththati Godaa Xoossaa sinththan ufayssan yexxana.

³⁴ GODAY kiya; iza maaroteththayka mernaassa; hessa gishshas GODAA galatite.

³⁵ «Abeet nuna ashshiza GODAWU! Nuna ashsha; ne geeshsha sunththaa nu galatana mala, nu nena galatan bonchchana mala kawoteththata giddofe nuna shiishshada ashsha» giite.

³⁶ GODAA Isra7eele Xoossay mernaappe mernaa gakkanaas galatetto! Hessafe guye dere ubbay, «Amiin» giidi GODAA galatides.

Yerusalaameninne Geba7oonen Hanida Goyno Maara

³⁷ GODAA Taabotaa sinththan hach hach goynos koshshizaaz ubba wode istti ooththana mala Dawiti Aasaafenne iza dabbota woththides.

³⁸ Qasseka Obeed-Eedoomenne iza dabbota usuppun tammanne osppunata isttara ooththana mala woththides; Edotaane naa Obeed-Eedoomenne Hoosa dirsaa penge naagana mala woththides.

³⁹ Qeese Saadooqenne izara ooththiza qeeseti Geba7oonen dhoqqasohon diza GODAA Dunkaaneza sinththan ooththana mala heen woththides.

⁴⁰ Gaasoykka GODAY Isra7eeles immida wogaa mala istti ubba wode xuugettiza yarshoy yarshettizason maaladonne omars xuugettiza yarsho yarshanaassa.

⁴¹ Iza maarotay mernaas gidida gishshas GODAA galatana mala Hemaane, Edotaanenne doorettida harata Dawiti isttara issife essides.

⁴² Hemaanessinne Edotaanes xurumba punnanaas, daala giirissanaasinne mazamure yexxishe go7ettiza hara massarata bolla aawateththi isttas imettides; Edotaane nayti dirsa penge naagana mala alaafeteththi imettides.

⁴³ Hessafe guye ubba asay baso baso bides; Dawitikka baso asaa anjjanaas soo simmides.