রোমানরাংনা 8 - Garo New Testament

গিসিক রংথালগিবানি হন·গিবা জাংগি

¹ জেরাং খ্রীষ্ট যীশুমুং নাংরিমজক বিসংখো ইসল শাস্তি মা·ন্না খ্রা ইন্নে চানচিজানুয়া।

² জাংগি হন·গিবা গিসিক রংথালগিবানি নিয়ামান আংখো খ্রীষ্ট যীশুও পাপ আরো সিয়ানি নিয়ামওনি জক্কেৎজক।

³ মান্দিনি পাপ-বেওয়ালনি হা·সেল নিয়াম বিলগ্রি হং·জকমিং, আরো উনি গিম্মিন নিয়াম জেখো দাকনা মান·জাজক ইসল আন·থাং উখো দাকজক। পাপখো হা·রিকেতনা বিয়া আন·থাংনি দোসগ্রি দেফান্থিখো মান্দিনি গিসিকখো হ·ন্নে ওয়াত্তেতজক আরো বিনি দেফান্থিনি সিয়াও পাপখো বিচাল দাক্কে উনি বিলখো হা·রিকজক।

⁴ বিয়া ইনি গিম্মিনান ইন্দাকে দাকজক জেদাক্কে পাপ-বেওয়ালনি নিং·আও রি·গিজা গিসিক রংথালগিবানি নিং·আও রি·য়ানি গিম্মিন আনচিংও নিয়াম চু·সকনা মা·ন্না।

⁵ জেরাং পাপ-বেওয়ালনি নিং·আও দংআ বিসংনি গিসিক পাপ-বেওয়াল জেখো হা·ম্মা উখোন দাকনা হা·সিকা; আরো জেরাং গিসিক রংথালগিবানি নিং·আও দংআ বিসংনি গিসিক রংথালগিবা গিসিক জেখো হা·ম্মা উখোন দাকনা হা·সিকা।

⁶ পাপ-বেওয়ালনি হা·ম্মা গিত্তা দাকগিবানি বিথি হং·জক সিয়া, আরো গিসিক রংথালগিবানি হা·ম্মা গিত্তা দাকগিবানি বিথি হং·জক জাংগি আরো থম·থমা।

⁷ জে গিসিক পাপ-বেওয়ালনি হা·ম্মা গিত্তা দাকনা হা·সিকা, উয়া গিসিকদে ইসলনা চাকজা, মুয়ানা উয়াদে ইসলনি নিয়ামখো মানিনা হাম·জা মানিনাবা মান·জা।

⁸ উনি গিম্মিন পাপ-বেওয়ালনি নিং·আও দংগিবারাং ইসলখো খুসি দাকনা মান·জা।

⁹ ইন্দিবা ইসলনি গিসিক না·সংনি খা·থংও দংওদে না·সং পাপ-বেওয়ালনি নিং·আও হং·জা ইন্দিবা গিসিক রংথালগিবানি নিং·আওসা হং·আ। জেনি খা·থংও খ্রীষ্টনি গিসিক দংজা বিয়া খ্রীষ্টনি হং·জা।

¹⁰ ইন্দিবা খ্রীষ্ট না·সংনি খা·থংও দংওদে পাপনি হা·সেল না·সংনি বে·এন সিয়ানি নিং·আও দংওবা না·সংনি গিসিকদে থাংআ, মুয়ানা ইসল না·সংখো দোসগ্রি ইন্নে রা·চাকজক।

¹¹ যীশুখো সিয়াওনি থাংচাএতগিবা উয়া ইসলনি গিসিক না·সংনি খা·থংও দংওদে ইসল উয়া গিসিকচা সিয়ানি নিং·আও দংগিবা না·সংনি বে·এনখোবা থাংচাএতনুয়া।

¹² উনি গিম্মিন জংআদারাং, আনচিং গ্রো নাংগিবা, ইন্দিবা পাপ-বেওয়ালচাদে হং·জা। পাপ-বেওয়ালনি নিং·আও দংএ আনচিংনি রি·না নাংজানুয়া।

¹³ না·সং পাপ-বেওয়ালনি নিং·আও রি·ওদে না·সং ফাংনাজলনা সিনুয়া। ইন্দিবা গিসিক রংথালগিবাচা বে·এননি গিম্মিক খ্রাগিজা কামখো ব·ন্নেতোদে ফাংনাজলনা থাংএ দংনুয়া,

¹⁴ মুয়ানা জেরাং ইসলনি গিসিকনি রি·দিলাচা রি·য়া বিসংআন ইসলনি দেদ্রাং হং·আ।

¹⁵ না·সংদে নকখলনি গিসিকখো মান·জা জেনি হা·সেল খেন্নুয়া; জে না·সংখো দেদ্রাং হং·খানা বিল হন·জক না·সং উয়া ইসলনি গিসিকখো মান·জক। উনি গিম্মিনান ইসলখো আনচিং আপফা ইন্নে রিক্কামা।

¹⁶ আনচিং ইসলনি দেদ্রাং ইন্নে গিসিক রংথালগিবা আন·থাংবা আনচিংনি খা·থংও সাক্ষি হ·ন্নিংজক।

¹⁷ আনচিং দেদ্রাং হং·এ দংওদে ইসল বিনি দেদ্রাংনা জেখো হ·ন্না খু·রাচাকজক আনচিং উখো মা·ন্নুয়া। খ্রীষ্টন ইসলচাখো উখো মা·ন্নুয়া আরো আনচিংবা বিমুং উখো মা·ন্নুয়া, মুয়ানা আনচিং খ্রীষ্টমুং দুক চাক্কোদে বিমুং রাসংখোবা মা·ন্নুয়া।

আনচিংনি মা·ন্নাগিবা রাসং

¹⁸ আংআ হা·আইয়া, আনচিং জা·মানো জে রাসংখো মা·ন্নুয়া উখো থসুসাওদে আনচিংনি দা·আওনি দুক চাক্কা মামুংবা হং·জা।

¹⁹ ইসলনি দেদ্রাং বাসোকো উয়া রাসংও ফারাকনুয়া উনি গিম্মিন থারিগিবা গিম্মিক খা·দংআখো রা·এ নিচাকসোএ দংআ,

²⁰ মুয়ানা থারিয়ানি মিকসংআন নাসিনাদা হং·আরিজক। আন·থাংনি হা·সিকাও ইয়া হং·জা, ইসলান বিখো বিথিগ্রি হং·আনি জাক্কো ওয়াত্তেতজক। উমুং ইখোবা খা·দংএতজক,

²¹ গিম্মাওনি জক্কে ইয়া থারিগিবারাং সালসাদে ইসলনি দেদ্রাংনি রাসংনি জাকগিত্তেলখো মা·ন্নুয়া।

²² আনচিং হা·আইয়ান থারিগিবা গিম্মিকান দা·আওবা বিল্লংএ হান·ফাকানি সা·দিকানা দাক্কিংজক।

²³ ইয়াসান হং·জা, ইন্দিবা জে রাসংখো জা·মানো মা·ন্নুয়া উনি স্খাংগিবা বিথি গিত্তা গিসিক রংথালগিবাখো মা·ন্নে আনচিং আন·থাংবা খা·থংও মা·আমিংআ। আরো উয়া সালনা সেংএ দংআ জেনসালো আনচিংখো ইসলনি দেদ্রাং গিত্তা ফারাকনুয়া, আগানস্খাওদে ব·ন্নাংআনি জাকওনিখো আনচিংখো জক্কেৎনুয়া।

²⁴ পাপওনি জক্কে আনচিং ইয়া খা·দংআখোন মান·জক। জেনা আনচিং খা·দংএ দংআ উখো মা·ন্নোদে খা·দংআনি মুয়াবা দংআ। জেখো মান·জক, উনা সা খা·দংএ দংআ?

²⁵ ইন্দিবা মান·গিজাগিবানা আনচিংনি খা·দংআ দংওদে উনা আনচিং চাকচিকে সেং·এ দংআ।

²⁶ ইনা আগ্রেবা আনচিংনি বিলগ্রিও গিসিক রংথালগিবা আনচিংনা দাকচাকা। মুয়াখো আগানে বি·নুয়া আনচিং উখো হা·আইজা, ইন্দিবা খু·সুকচা জেখো আগান্না মান·জা গিসিক রংথালগিবা আন·থাংআন আনচিংনি হং·এ মল·মলা।

²⁷ মান্দিনি খা·থংখো সান্দিয়ে নিগিবা গিসিক রংথালগিবানি খাৎথাখোবা হা·আইয়া, মুয়ানা গিসিক রংথালগিবা ইসলনি হা·সিকা গিত্তান ইসলনি মান্দিরাংনা মল·মলচাকা।

²⁸ আনচিং হা·আইয়া ইসলনা জেরাং খা·ফাকা, আগানস্খাওদে ইসল আন·থাংনি মিকসংআ গিত্তা জেরাংখো রিক্কামজক বিসংনি নাম্মানা গিম্মিকান আপসান দাক্কে কাম দাক্কিংজক।

²⁹ ইসল জেরাংখো স্খাংআন বাচ্ছিয়ে রা·আমিং বিসংখো বিয়া বিনি দেফান্থি গিত্তা হং·খানা স্খাংআন থারিসোএ দন্নামিং, জেদাক্কে উয়া দেফান্থি বাং·আ জংআদারাংনি গিসেপো দেজাক্রা হং·না মা·ন্না।

³⁰ জেরাংখো বিয়া স্খাংআন থারিসোজক বিসংখো বিয়া রিক্কামজক; রিক্কামগিবারাংখো দোসগ্রি ইন্নেবা রা·চাকজক; জেরাংখো দোসগ্রি ইন্নে রা·চাকজক বিসংনা বিয়া রাসংখোবা হন·জক।

ইসলনি খা·সাআ

³¹ ইন্দাকোদে ইরাংনি গিম্মিন আনচিং মুয়াখো আগান্নুয়া? ইসল আনচিংনা চাক্কোদে আনচিংনা নামগিজাখো দাকনা সাবা দংআ?

³² ইসল আন·থাংনি দেফান্থিখোবা ওয়াতজাজক ইন্দিবা আনচিং গিম্মিকনা বিখো সিয়ানি জাক্কো হন·চাকজক। ইন্দাকোদে বিয়া দেফান্থিমুং আরোবা গিম্মিকখোবা হন·চাকজানুয়ামা?

³³ ইসল জেরাংখো বাচ্ছিয়ে রা·জক বিসংখো সা নালিশ দাকনুয়া? ইসল আন·থাংআন বিসংখো দোসগ্রি ইন্নে রা·চাকজক।

³⁴ সা বিসংখো দোসি দাকনুয়া? জে সিজকমিং আরো জেখো সিয়াওনি থাংচাএতজক উয়া খ্রীষ্ট যীশু দা·আও ইসলনি জাক্রাচাবাক্কা দংআ আরো আনচিংনা মল·মলিংজক।

³⁵ ইন্দাকোদে খ্রীষ্টনি খা·সাওনি আনচিংখো চে·ল্লেতনা গিত্তা মুয়া দংআ? গিসিকনি সা·দিকা? গিচ্চিয়েতা? অকখ্রিয়া? বা·রাচলানা দিল্লা? হং·সিয়া? সিয়া?

³⁶ রংথালগিবা শাস্ত্রও চক্কা দংআ, নাং·নি হা·সেল ফাংনান চিংখো স·ওতে গাল্লিংজক; মান্দিরাং চিংখো রাসতে গালগিবা মেষ গিত্তান চানচিয়া।

³⁷ ইন্দিবা না·সংনা জে খা·সাআ বিচা আনচিং চু·গিম্মিক দাক্কে হামজক।

³⁸ আংআ ইখো নাম্মেদাক্কেন হা·আইয়া, সিয়া বা জাংগি, সালগিনি সা·গ্রে বা শয়তাননি সা·গ্রে, দা·আওরোরোনি বা জা·মানোনি মামুং বা দিংথাং দাকগিবা বিল,

³⁹ বা সিলগা সাক্কানি বা হা·গিলসাক হা·নিংআনি মামুং, আরোবা থারিয়া গিম্মিকোনি মামুংআন আনচিংখো ইসলনি খা·সাওনি জিত্তেতনা মান·জানুয়া। ইসলনি ইয়া খা·সা আনচিংনি গিত্তেল খ্রীষ্ট যীশুও দংআ।