রোমানরাংনা 7 - Garo New Testament

বিয়াওনি স্খিয়া

¹ জংআদারাং, না·সংদে নিয়ামখো হা·আইয়ান। মান্দিনি থাংএ দংআ দিপ্পাৎসান মান্দিনি সাক্কাও নিয়ামনি বিল দংআ ইন্নে না·সং হা·আইজামা?

² সেগিবা থাংএ দংআ দিপ্পাৎসান জিকগিবা বিমুং নিয়ামচা খাআ দংআ। ইন্দিবা সেগিবানি সিয়ানি জা·মানো উয়া নিয়ামওনি জিকগিবা জক্কাখো মা·ন্না।

³ উনি গিম্মিন সে থাংএ দংমিত্তিংও জিকগিবা সাকগিপ্পিনখো বিয়াওদে বিখো থি·ল্লেকগিবা ইন্নে আগানা। ইন্দিবা বিনি সেগিবা সিয়োদে বিয়া উয়া নিয়ামওনি জক্কাখো মা·ন্না। আরো উনো বিয়া সাকগিপ্পিনখো বিয়াওদে বিয়া থি·ল্লেকগিবা হং·জা।

⁴ উয়ানদাক্কেন আংনি জংআদারাং, খ্রীষ্টনি বে·এনো মোশিনি নিয়ামরাংচা না·সংবা সিজক। উনি গিম্মিন সিয়াওনি জেখো থাংচাএতজক না·সং উয়া যীশু খ্রীষ্টনিন হং·আ, জেগিত্তা ইসলনি গিম্মিন না·সংনি জাংগি বিথিগ্মাং হং·আ।

⁵ জেনসালো আনচিং পাপ-বেওয়ালনি নিং·আও দংআমিং উনসালো নিয়াম আনচিংনি গিসেপো পাপ দাকনা হা·সিকেতনুয়ামিং আরো উয়া হা·সিকারাং আনচিংনি বে·এনো কাম দাকনুয়ামিং; উনি গিম্মিন আনচিংনি জাংগি সিনা বিথি নাংনুয়ামিং।

⁶ উনো আনচিংখো জে খায় রা·রিকনুয়ামিং উনি দাবিচা আনচিংদে সিজক। উনি গিম্মিন দা·আও আনচিং নিয়ামওনি জকজক। উনি গিম্মিন আনচিং দা·আও চকগিবা নিয়ামনি উয়া গিৎচাম রামানি নকখল হং·জা, ইন্দিবা গিসিক রংথালগিবানি হন·গিবা গিত্তাল রামানি নকখল হং·জক।

নিয়াম আরো পাপ

⁷ ইন্দিদে নিয়াম নামজা ইন্নে আনচিং আগান্নুয়ামা? হং·জাস্রাং; ইন্দিবা ইয়া খাৎথাদে থিক, নিয়াম দংজাওদে পাপখো আংআ হা·আইজানুয়ামিং। “দা·আ মাদ্দুয়া,” ইয়া খাৎথাখো নিয়াম আগানজাওদে মাদ্দুয়া মুয়া হং·আ উখো আংআ হা·আইজানুয়ামিং।

⁸ ইন্দিবা পাপ উয়া গি·য়েতানি হা·সেল আংনি গিসেপো মাদ্দুয়াখো মিকরাকেতজক, মুয়ানা নিয়াম দংজাওদে পাপ সিয়া গিত্তা গা·আকে দংআ।

⁹ আংনি জাংগিও নিয়াম রি·বানা স্খাং আংআ থাংএন দংআমিং, ইন্দিবা উয়া গি·য়েতা রি·বাওন পাপবা থাংচাজক,

¹⁰ আরো আংআবা সিজক। জে গি·য়েতানি গিম্মিন জাংগিখো মা·ন্নুয়ামিং উয়া আংনা সিয়াখো রা·বাজক,

¹¹ মুয়ানা উয়া গি·য়েতানি চলখো রা·এ পাপ আংখো থকাইজক, আরো উয়া গি·য়েতাচান পাপ আংখো সিয়েতজক।

¹² ইন্দাকোবা ইয়া খাৎথাদে থিক হং·আ, নিয়াম রংথালা আরো উনি গি·য়েতাবা রংথালা, খ্রাগিবা আরো নাম্মেতগিবা হং·আ।

¹³ ইন্দিদে দাকচাকানি হং·গিবাচান আংআ সিজকমা? মামুং দাক্কেবা হং·জা, ইন্দিবা নাম্মেতগিবাচান পাপ আংখো সিয়েতজক, জেগিত্তা পাপ হং·বিবিয়াখো হা·আইনা মা·ন্না। পাপ বাসিকিন নামজাস্রাং উখো গি·য়েতাচান হা·আইনা মা·ন্না।

মান্দিনি রকমগ্মি গিসিক-বেওয়াল

¹⁴ আনচিং হা·আইয়া নিয়াম গিসিকনি, ইন্দিবা আংআ পাপ-বেওয়ালনি নিং·আও দংআ ইন্নে পাপনি নকখল হং·জক।

¹⁵ আংআ মুয়াখো দাক্কিংআ উখো আংআ আন·থাংআন হা·আইজা, মুয়ানা আংআ জেখো দাকনা হা·সিকা উখোদে দাকজা বাত্তেসা জেখো মিৎচিয়া উখোন দাক্কা।

¹⁶ দাকনা হা·সিকগিজাখো আংআ দাক্কোন নিয়াম নাম্মা ইন্নে আংআ খু·রাচাক্কা।

¹⁷ ইন্দাকোদে নিকনা মা·ন্না, আংআ আন·থাংআন ইখো দাকজাংআ, ইন্দিবা আংও জে পাপ দংআ, উয়ান আংখো ইখো দাক্কেতিংআ।

¹⁸ আংআ হা·আইয়া, আংনি পাপ-বেওয়ালও নাম্মানি মামুংবা দংজা। নামবিবিয়াখো দাকনা আংআ হা·সিকা ইন্দিবা বিল দংজা।

¹⁹ জে নাম্মা কামরাংখো আংআ দাকনা হা·সিকা উখোদে দাকজা, ইন্দিবা দাকনা হা·সিকজা উয়া নামগিজা কামরাংখোন আংআ দাক্কিংআ।

²⁰ দাকনা হা·সিকগিজাখো আংআ দাক্কোদে উখো আংআ আন·থাংদে দাকজা, ইন্দিবা আংও দংগিবা পাপআন আংখো উখো দাক্কেতা।

²¹ ইন্দাকোদে আংআ আন·থাংও নিয়াম মিংসাখো কাম দাক্কাখো নিক্কিংআ। ইয়ান উয়া নিয়াম- আংআ নাম্মাখো দাকনা হা·সিকজোকনোন নামগিজা আংও দংফাংআ।

²² আংনি খা·থং ইসলনি নিয়ামনা হান·সেংআ;

²³ ইন্দাকোবা আংআ নিকনা মা·ন্না, মিংসা দিংথাং দাকগিবা নিয়াম আংনি বে·এনো কাম দাক্কিংআ। নামগিবাখো নাম্মা ইন্নেন আংনি গিসিক রা·চাকা, ইন্দিবা দিংথাং দাকগিবা ইয়া নিয়াম আংনি গিসিকনি সাক্কাও দাকগ্রিকিংআ আরো আংখো বন্দি দাক্কে দন্নিংআ। আংও দংগিবা পাপ ইয়া নিয়ামনিন হং·আ।

²⁴ বাদাকগিবা রাসংগ্রি মান্দি আংআ! আংও দংগিবা ইয়া সিয়েতগিবা পাপ-বেওয়ালনি জাক্কোনি সা আংখো জক্কেৎনুয়া?

²⁵ ইসল আংখো জক্কেৎজক ইন্নে আনচিংনি গিত্তেল যীশু খ্রীষ্টও আংআ ইসলখো মিৎথেলা। ইন্দাকোদে নিকনা মা·ন্না, গিসিকওনি আংআ ইসলনি নিয়ামনি নকখল, ইন্দিবা পাপ গিসিকওনি আংআ পাপনি নিয়ামনি নকখল।