রোমানরাংনা 5 - Garo New Testament

দোসগ্রি ইন্নে রা·চাকানি বিথি

¹ বিবিরা·আচান আনচিংখো দোসগ্রি ইন্নে রা·চাকজক আরো উনি গিম্মিনান গিত্তেল যীশু খ্রীষ্ট গিত্তা ইসল আরো আনচিংনি গিসেপো থম·থমানি হং·জক।

² ইসলনি ইন্দাকা জে খা·সাচাক্কানি রামাও আনচিং দা·আও রি·ইংজক আনচিং খ্রীষ্টও বিবিরা·এ উয়ো সকজক। ইসলনি রাসংখো মা·ন্না খা·দংএ আনচিং খুসি হং·ইংআ।

³ ইয়াসান হং·জা, দুকরাংও দংএবা আনচিং খুসি হং·ইংআ, মুয়ানা চাকচিকা দুকনি বিথি হং·আ ইন্নে আনচিং হা·আইয়া,

⁴ চাকচিকানি বিথি খাকখেৎ গিসিক-বেওয়াল আরো খাকখেৎ গিসিক-বেওয়ালনি বিথি খা·দংআ।

⁵ ইয়া খা·দংআ আনচিংখো খ্রাচা·এতজা, মুয়ানা ইসল বিনি হন·গিবা গিসিক রংথালগিবাচা আনচিংনি খা·থংখো বিনি খা·সাচাক্কাচা গাপ্পেতজক।

⁶ জেনসালো আনচিং বিলগ্রিমিং উনসালো খ্রীষ্ট ইসলনা খা·ফাকগিজা মান্দিনা, আগানস্খাওদে আনচিংনা সিচাকজক। খাকখেৎগিবা মান্দিনা সাকসাবা সিচাকজা ইন্নে আগানোন চলিয়া।

⁷ গিপ্পিননা দাকচাকগিবা মান্দিনা সাবা খেনচাকগিজা সিচাকনাবা দংআ।

⁸ ইন্দিবা ইসল আনচিংনা খা·সাআ, উখো খ্রীষ্ট আনচিংনি পাপী দংমিত্তিংওন সিচাকে ফিন্নিকজক।

⁹ ইন্দিদে খ্রীষ্টনি হান·চিচা আনচিংখো দোসগ্রি ইন্নে রা·চাকোদে আনচিং খ্রীষ্টওন ইসলনি শাস্তিওনি জক্কাখো মান·বিবিনুয়া।

¹⁰ আনচিং ইসলনি বোবিল দংমিত্তিংও বিনি দেফান্থিনি সিয়াওন বিমুং আনচিং নাংরিমজক। ইন্দাকে নাংরিমজক ইন্নে খ্রীষ্টনি সিচাকানা আনচিং পাপওনি জক্কাখো মান·বিবিনুয়া।

¹¹ ইয়াসান হং·জা, জেনি গিম্মিন ইসলমুং আনচিং নাংরিমজক উয়া গিত্তেল যীশু খ্রীষ্টও ইসলখো রা·এ আনচিং খুসি হং·ইংআ।

আদম আরো খ্রীষ্ট

¹² সাকসা মান্দি গিত্তা হা·গিলসাকো পাপ রি·বামিং আরো উয়া পাপ গিত্তা সিয়াবা রি·বামিং। মান্দি গিম্মিক পাপ দাকজক ইন্নে ইন্দাকে গিম্মিকচান সিয়া সকবাজক।

¹³ মোশিনি নিয়ামখো হ·ন্না স্খাংআন হা·গিলসাকো পাপ দংআমিং, ইন্দিবা নিয়াম দংজাওদে পাপখো পাপ ইন্নে চানজা।

¹⁴ ইন্দাকোবা আদমওনি মোশিনি সময়ওনা দিপ্পাৎ গিম্মিকনি সাক্কাওন সিয়া শাসন দাক্কামিং। ইসলনি গি·য়েতাখো মানিগিজা জেরাং আদম গিত্তা পাপ দাকজা বিসংনি সাক্কাওবা সিয়া শাসন দাক্কিংআমিং। আদম উয়া রি·বানা আগানগিবা যীশু খ্রীষ্টনি মিকখাং বিমাং হং·আমিং।

¹⁵ ইন্দিবা ইসলনি ইন্দিনারি হ·ন্না আদমনি পাপ গিত্তা হং·জা। সাকসা মান্দিনি পাপনি হা·সেল বাং·এন সিজক উনোন ইসলনি খা·সাচাক্কা আরো দা·আও সাকসা মান্দিনি খা·সাচাক্কা গিত্তা জে হ·ন্নানি রি·বাজক, উয়াদে গিপ্পিনরাংনা বাদিকে বাং·বাৎজক! উয়া দা·আও সাকসা মান্দি হং·জক যীশু খ্রীষ্ট।

¹⁶ ইসলনি হ·ন্না আদমনি পাপনি বিথি গিত্তা হং·জা, মুয়ানা মিংসা পাপখো বিচাল দাক্কানি গিম্মিন গিম্মিক মান্দিন শাস্তি মা·ন্না খ্রাগিবা হং·জক, ইন্দিবা দোসগ্রি দাক্কে ইসলনি রা·চাকাখো মা·ন্না খ্রাগিবা হং·না খা·সাচাক্কানি ইয়া হ·ন্না, ইয়াদে বাং·আ পাপনি হা·সেলো রি·বাজক।

¹⁷ সাকসা মান্দিনি পাপ দাক্কানি গিম্মিন সিয়া উয়া সাকসাওন শাসন দাকনা হা·বাচেংআমিং। ইন্দিবা জেরাং বাং·এ ইসলনি খা·সাখো আরো দোসগ্রি দাক্কে বিনি রা·চাকাখো মা·ন্না খ্রাআখো মা·ন্না, বিসং উয়া সাকসা মান্দিনি, আগানস্খাওদে যীশু খ্রীষ্টও জাংগিনি চু·সকাচা শাসন দাকবিবিনুয়া।

¹⁸ ইন্দাকোদে মিংসা পাপচা জেদাক্কে গিম্মিক মান্দিখোন শাস্তি মা·ন্না খ্রা ইন্নে চানজক, উয়ানদাক্কে মিংসা খাকখেৎ কামচা গিম্মিক মান্দিখোন দোসগ্রি ইন্নে রা·চাকনাবা থারিজক আরো ফাংনাজলনি জাংগি উনি বিথি হং·আ।

¹⁹ জেদাক্কে সাকসা মান্দিনি মানিগিজানি গিম্মিন বাং·আখোন পাপী ইন্নে চান্নামিং, উয়ানদাক্কে সাকসা মান্দিনি মানিয়াচা বাং·আখোন দোসগ্রি দাক্কে রা·চাকনুয়া।

²⁰ খ্র্রাগিজা কাম বাং·খানা ইন্নে নিয়ামখো হন·জক, ইন্দিবা খ্রাগিজা কাম জেও বাং·জক উয়ো ইসলনি খা·সাচাক্কা বাং·জক।

²¹ ইনি গিম্মিনান উয়া খা·সাচাক্কা বাং·জক জেগিত্তা সিয়াও পাপ শাসন দাক্কামিং, উগিত্তা মান্দিখো দোসগ্রি ইন্নে রা·চাকে দা·আও বিনি খা·সাচাক্কা শাসন দাকনা মা·ন্না; আরো আনচিংনি গিত্তেল যীশুও ফাংনাজলনি জাংগিখো মা·ন্না উনি বিথি হং·আ।