রোমানরাংনা 3 - Garo New Testament

¹ ইন্দাকেন হং·ওদে যিহূদীরাং মুয়াখো মান·দাপজক? বিগিল রাত্তানিবা গামচাতানি মুয়া দংআ?

² গিম্মিক গিত্তান চু·ওংএ মান·দাপজক। স্খাং: ইসল বিনি খাৎথাখো যিহূদীরাংনান হ·ন্নামিং।

³ বিসংনি গিসেপো মিত্তাম মান্দিরাং বিবিরা·গিজাগিবা হং·জক, ইন্দিবা উনাদে মুয়া হং·আ? বিসং বিবিরা·গিজাগিবা হং·জক ইন্নে ইসলবা বিবিরা·গিজাগিবা হং·নুয়ামা?

⁴ হং·জানুয়া। মান্দি গিম্মিক বু·এ আগানগিবা হং·ওবা ইসল ফাংনানান বিবিগিবা হং·আ। রংথালগিবা শাস্ত্রও চক্কা দংআ, “নাং·নি খাৎথান থিক, নাং·নি বিচাল দাক্কান খাকখেৎ।”

⁵ ইন্দিবা আনচিংনি খ্রাগিজা কামরাংনিখো ইখো আরোসা থাল্লে হা·আইনা মা·ন্না, ইসল ফাংনানান খাকখেৎ কামখো দাক্কা। ইন্দাকোদে আনচিং ইন্দাকে আগান্নুয়ামা, জেনসালো বিয়া আনচিংখো শাস্তি হ·ন্না উনো বিয়া খ্রাগিজাখো দাক্কা? ইয়া খাৎথাখোদে আংআ মান্দি গিত্তাসা আগানিংআ, চং·মতান বিয়া মামুং সালোবা খ্রাগিজাখো দাকজা।

⁶ ইসল নামগিজাখো দাক্কোদে বিয়া বাদিকে দাক্কে মান্দিখো বিচাল দাকনুয়া?

⁷ সাবা আগান্নাবা দংআ, “আংনি বু·এ আগানানি গান্দা আরোসা ইয়া নাম্মেদাক্কে ফারাকা ইসল বিবিখো আগানগিবা হং·আ। ইনি গিম্মিন ইসল রাসং চা·আখো মা·ন্নোদে পাপী ইন্নে আংখো মুয়ানা দোস হ·ন্নিংআ?”

⁸ দে নাম্মান, ইন্দাকোদে আনচিং ইন্দাকে আগান্নুয়ামা, “হাই, আনচিং নামগিজা কামখো দাক্কে দংনাজক জেগিত্তা দাক্কোদে উয়া নামগিজাচান নাম্মা রি·বানা মা·ন্না”? আনচিং ইন্দাকেন আগানে দংআ ইন্নে মিত্তাম মান্দিরাং আনচিংখো জিএ আগানিংআ। বিসংনি মা·ন্নাগিবা শাস্তিখো বিসং মা·ন্নুয়া।

দারাংবা দোসগ্রি হং·জা

⁹ দা·আও আনচিং মুয়াখো আগান্নুয়া? যিহূদী হং·এ আনচিংনি অবস্থা যিহূদী হং·গিজারাংনা বাত্তে নাম্মামা? হং·জাস্রাং। চিংআদে স্খাংআন ইখো আগানজক, যিহূদী-যিহূদী হং·গিজাগিবা গিম্মিকান পাপনি নিং·আও দংআ।

¹⁰ রংথালগিবা শাস্ত্রও চক্কা দংআ: দোসগ্রি দারাংবা দংজা, সাকসাবা দংজা;

¹¹ সাকসাবা হা·আইএ রি·জা, সাকসাবা ইসলনি হা·সিকা গিত্তা কাম দাকজা।

¹² গিম্মিকান খাকখেৎ রামাওনি জিত্তাংজক, গিম্মিকান আপসান হা·মিকব্রাং হং·জক। নাম্মা কামখো দাকগিবা দারাংবা দংজা, সাকসাবা দংজা।

¹³ বিসংনি খু·সুক বাংবাং দাকগিবা গোপরাম গিত্তা দাক্কা, স্রিবাকচা বিসং রাসং দাকব্রুএ আগানা। বিসংনি খু·চিলনি নিং·আও চিপ্পুনি বিসি দংআ।

¹⁴ বিসংনি খু·সুক শাপ আরো খা·আ খাৎথাও গাপ্পা।

¹⁵ স·ওতনা বিসংনি জা·চক গং·রাক্কা,

¹⁶ বিসংনি রামাও বন·খিমা আরো নাসিয়া দংআ।

¹⁷ থম·থমানি রামাখো বিসং হা·আইজা,

¹⁸ বিসং ইসলনাবা খেনজা।

¹⁹ আনচিং হা·আইয়া মোশিনি নিয়াম বিসংনান জেরাং উয়া নিয়ামনি নিং·আও দংআ। উনি গিম্মিন যিহূদী-যিহূদী হং·গিজা সাকসানিবা মামুংখো আগানানি দংজা, গিম্মিক মান্দিন ইসলচা দোসগ্মাং হং·এ দংআ।

²⁰ নিয়ামখো মানিজোকনোন ইসল মান্দিখো দোসগ্রি ইন্নে রা·চাকনুয়া ইন্দাকে হং·জা, ইন্দিবা নিয়ামচান মান্দি আন·থাংথাংনি পাপরাংখো হা·আইনা মা·ন্না।

মান্দিখো দোসগ্রি ইন্নে রা·চাকা

²¹ ইসল মান্দিখো নিয়ামগ্রি বাদিকে দাক্কে দোসগ্রি ইন্নে রা·চাকা উয়া ফারাকজক। মোশিনি নিয়াম আরো আগানসোগিবারাং উনি গিম্মিন সাক্ষি হ·ন্নাংজক।

²² যীশু খ্রীষ্টখো বিবিরা·গিবারাংনি উয়া বিবিরা·আচান ইসল বিসংখো দোসগ্রি ইন্নে রা·চাকা। যিহূদী আরো যিহূদী হং·গিজা গিম্মিকান আপসান হং·আ,

²³ মুয়ানা গিম্মিকান পাপ দাকজক আরো ইসলোনি মিৎথেলাখো মা·ন্না খ্রাজাজক।

²⁴ ইন্দিবা খ্রীষ্ট যীশু পাপনিখো মান্দিখো জক্কেৎনা দাকচাকজক আরো উয়া জক্কেতাচান খা·সাচাক্কানি হ·ন্না গিত্তা বিবিরা·গিবারাংখো দোসগ্রি ইন্নে রা·চাকা।

²⁵ ইসল ইন্দাকে ফারাকামিং, জেরাং বিবিরা·আ বিসংনা যীশু খ্রীষ্ট বিনি হান·চিচা, ফি·এ ইন্নোদে বিনি জাংগিথাংখো হন·চাকে বিখো খা·নাম্মেতজক। ইন্দাকেন ইসল ফিন্নিকজক, বিয়া বিনি চাকচিকানি গিম্মিন মান্দিরাংনি স্খাংনি পাপনি শাস্তিখো হন·জাওবা বিয়া দোসগ্রি হং·আ।

²⁶ বিয়া দোসগ্রি হং·আ উখো বিয়া দা·আও ফিন্নিকজক জেদাক্কে ইখো হা·আইনা মা·ন্না, বিয়া আন·থাং দোসগ্রি আরো যীশুখো বিবিরা·গিবাখোন বিয়া দোসগ্রি ইন্নে রা·চাকা।

²⁷ ইনি জা·মানো মান্দিনি রাসং দাক্কানি মুয়া দংআ? মামুংবা দংজা। ইন্দিবা মুয়ানা দংজা? মান্দি নিয়ামখো মানিয়া ইন্নে বিনি রাসং দাক্কানি মামুং দংজামা? ইন্দাকেদে হং·জা। চং·মত খাৎথা হং·জক, বিবিরা·আও রাসং দাক্কানি হা·দাম দংজা,

²⁸ মুয়ানা আনচিং হা·আইয়া, ইসল মান্দিখো বিনি বিবিরা·আনি হা·সেলো দোসগ্রি ইন্নে রা·চাকা, নিয়ামখো মানিয়ানাদে হং·জা।

²⁹ ইসল যিহূদীরাংনিসান হং·আমা, গিপ্পিন জাতরাংনিদে হং·জামা? হো·এ বিয়া গিপ্পিন জাতরাংনিবা ইসল হং·বিবিয়ান,

³⁰ মুয়ানা ইসলদে সাকসাসান। বিয়া যিহূদীরাংখো জেদাক্কে বিবিরা·আচা দোসগ্রি ইন্নে রা·চাকনুয়া উয়ানদাক্কে গিপ্পিন জাতরাংখোবা রা·চাকনুয়া।

³¹ ইয়া বিবিরা·আনি গিম্মিন আনচিং নিয়ামখো গাল্লিংজকমা? মামুং দাক্কেবা গালজা, বাত্তেসা নিয়ামনি খাৎথারাং বিবি হং·আ উখোন আনচিং ফিন্নিকিংআ।