রোমানরাংনা 14 - Garo New Testament

জংআদানি দোসখো দা·আ রি·ম্মাবো

¹ বিবিরা·আও বিলগ্রিগিবাখো আন·থাংনি দাক্কে রা·বো; বিনি চানচিয়ারাংখো রা·এ দা·আ জিগ্রিকাবো।

² সাবা চানচিয়া বিয়া গিম্মিকখোন চা·না মা·ন্না, ইন্দিবা বিবিরা·আও বিলগ্রিগিবাদে সামবিজাকরাংখোসান চা·আ।

³ বে·এন চা·গিবা চা·গিজাগিবাখো চন্নিকজাখানা আরো বে·এন চা·গিজাগিবা চা·গিবানি দোসখো রিম·জাখানা, মুয়ানা ইসল উয়া সাকগ্মিখোন আন·থাংনি দাক্কে রা·জক।

⁴ গিপ্পিননি নকখলখো বিচাল দাকনা না·আ সা? বিয়া চাদেংএ দংআমা গা·আকাংআ উখো বিনি নকগিবান হা·আইনুয়া। ইন্দিবা বিয়া চাদেংএন দংনুয়া, মুয়ানা গিত্তেলান বিখো চাদেংএতি দন্না মা·ন্না।

⁵ সাবা সালসাখো গিপ্পিন সালনা বাত্তে দাল·নিকা। দা·আবা সাবা গিম্মিক সালখোন আপসান দাক্কে চানচিয়া। ইনি গিম্মিনো সা মুয়াখো দাকনুয়া বা দাকজানুয়া উয়োন বিনি গিসিক চু·গিম্মিক দাক্কে মানিখানা।

⁶ মংসংগিবা সালখো মানিগিবাদে গিত্তেলখো খুসি দাকনান উখো দাক্কা। গিম্মিকখো চা·গিবা গিত্তেলখো খুসি দাকনান চা·আ, মুয়ানা ইসলখো বিয়া মিৎথেলা। মামুংখো চা·গিজাগিবা ইসলখো খুসি দাকনান চা·জা, আরো বিয়াবা ইসলখো মিৎথেলা।

⁷ আনচিংওনি দারাংবা আন·থাংনা থাংজা আরো দারাংবা আন·থাংনা সিজা।

⁸ আনচিং থাংওদে গিত্তেলনান থাংআ, আরো সিয়োদে গিত্তেলনান সিয়া। ইন্দাকোদে আনচিং থাংওবা সিয়োবা আনচিং গিত্তেলনিন হং·আ।

⁹ খ্রীষ্ট সিয়ামিং আরো দা·আবা থাংচামিং জেদাক্কে বিয়া থাংআনি আরো সিয়ানি ইয়া মিংগ্মিনিন গিত্তেল হং·না মা·ন্না।

¹⁰ ইন্দাকোদে মুয়ানা না·আ নাং·নি জংআদানি দোসখো রি·ম্মিংজক? আরো মুয়ানি হা·সেল নাং·নি জংআদাখো চন্নিকিংজক? বিচালনা আনচিং গিম্মিকান ইসলনি মিকখাংও চাদেংনুয়া।

¹¹ রংথালগিবা শাস্ত্রও চক্কা দংআ, “গিত্তেল আগানা, ‘আংআ আন·থাংনি বিমুংচা আগানিংজক, আংনি মিকখাংও গিম্মিকান জা·স্খু দেম·নুয়া আরো আংখো ইসল ইন্নে খু·রাচাকনুয়া।’ ”

¹² ইন্দাকোদে নিকনা মা·ন্না, আনচিং গিম্মিকখোন আন·থাংনি গিম্মিন ইসলচা হিসাব হ·ন্না নাংনুয়া।

জংআদাখো পাপনি রামাওনা দা·আ রিম্মাংআবো

¹³ ইনি গিম্মিন আনচিং জেদাক্কে সাকসা সাকগিপ্পিননি দোসখো রিম·জা, বাত্তেসা ইন্দাকগিবা কামখো দাকজানুয়া ইন্নে থিক দাকনা, জেখো নিক্কে জংআদা গিসিকো চাংফেংআখো মান·জা বা পাপও গা·আকনা মান·জা।

¹⁴ গিত্তেল যীশুমুং আপসান হং·জক ইন্নে আংআ নাম্মেদাক্কেন হা·আইয়া, মামুং চা·আন মারাং নাংআনি হং·জা, ইন্দিবা সাবা চা·আনি মামুংখো মারাং নাংআ ইন্নে চানচিওদে বিনান উয়া মারাং নাংআনি হং·আ।

¹⁵ মামুং চা·আনি গিম্মিন না·আ নাং·নি জংআদানি গিসিকখো সা·দিকেতোদে না·আ খা·সাখো রা·এ রি·জাংজক। জে জংআদানা খ্রীষ্ট সিয়ামিং, চা·আনি গিম্মিন বিনি নামগিজাখো দা·আ দাক্কাবো।

¹⁶ না·সংচা জেআন নাম্মা, দারাংবা উখো জিজাখানা।

¹⁷ ইসলনি সংনকো চা·আ-রিংআদে দাল·জা; গিসিক রংথালগিবাচা খাকখেৎ রামাও রি·য়া আরো থম·থমা আরো হান·সেংআ ইয়ান দা·ল্লা হং·আ।

¹⁸ জেআন ইন্দাকে খ্রীষ্টনা দাকচাকে হ·ন্না বিনি সাক্কাও ইসল খুসি হং·আ আরো মান্দিরাংবা বিখো নাম্মা ইন্নে চানচিয়া।

¹⁹ ইনি গিম্মিন জেখো দাক্কোদে থম·থমানি হং·আ আরো জেচা আনচিং সাকসা সাকগিপ্পিনখো থারিনা মা·ন্না, হাই, আনচিং উখোন দাকনা খ্রেংনা।

²⁰ চা·আনি হা·সেল ইসলনি কামখো দা·আ নাসিয়েতাবো। গিম্মিক চা·আন রংথালা, ইন্দিবা সাবা মামুংখো চা·এ গিপ্পিননি গিসিকো চাংফেংএতোদে উখো চা·আ বিনা খ্রাগিজা হং·আ।

²¹ বে·এনখো চা·আ, আংগুর বিৎচিখো রিংআ বা ইন্দাকগিবা মামুংখো দাকনা নাংজা জেনি হা·সেল নাং·নি জংআদা গিসিকো চাংফেংআখো মা·ন্না।

²² ইনি গিম্মিন না·আ জেখো নাম্মা চানচিয়ে বিবিরা·আ উখো ইসল আরো নাং·ওন রা·রিকবো। নাম্মা চানচিয়ে মামুং দাকমিত্তিংও সানিবা গিসিক বিখো দোস হন·জাওদে বিয়া রাসং মান·গিবা হং·আ।

²³ ইন্দিবা সাবা গিসিকো জাজাএ মামুংখো চা·ওদে বিয়া দোসি হং·আ, মুয়ানা বিয়া বিনি বিবিরা·আ গিত্তা কাম দাকজাংআ। বিবিরা·আনি সাক্কাও মামুং দাক্কান পাপ হং·আ।