রোমানরাংনা 10 - Garo New Testament

¹ জংআদারাং, ইস্রায়েলনি মান্দিরাংনা আংনি খা·থংও হা·সিকবিয়া আরো ইসলচা আংনি বি·আনি ইয়ান হং·আ, জেদাক্কে বিসং পাপওনি জকনা মা·ন্না।

² বিসংনি গিম্মিন আংআ ইন্দাকে সাক্ষি হ·ন্নিংজক, ইসলনা বিসং খা·দংবিয়া, ইন্দিবা বাদিকে দাক্কে ইসলনি রা·চাকাখো মা·ন্নুয়া উখো বিসং হা·আইজা।

³ ইসল বাদিকে দাক্কে মান্দিখো দোসগ্রি ইন্নে রা·চাকা উয়া খাৎথাও গিসিক হন·গিজা বিসং আন·থাংথাংআন বিনি রা·চাকাখো মা·ন্না হা·ম্মিংআমিং। উনি গিম্মিনান ইসল জেদাক্কে মান্দিখো দোসগ্রি ইন্নে রা·চাকা উখো বিসং মানিয়ে রা·জাজক।

⁴ খ্রীষ্টআন নিয়ামরাংখো চু·সকেতি উনি বিলখো দি·গালজক, জেদাক্কে বিখো বিবিরা·গিবারাং ইসলনি রা·চাকাখো মা·ন্না।

গিম্মিকান জকনুয়া

⁵ নিয়ামরাংখো মানিয়ে ইসলনি রা·চাকাখো মা·ন্নানি গিম্মিন মোশি চকজক, “জে মান্দি নিয়াম গিত্তা রি·য়া বিয়া উচান জাংগি মা·ন্নুয়া।”

⁶ ইন্দিবা বিবিরা·আচা বাদিকে দাক্কে মান্দি ইসলনি রা·চাকাখো মা·ন্না উনি গিম্মিন রংথালগিবা শাস্ত্রও আগানা দংআ, “গিসিকথাংও ইয়া খাৎথাখো দা·আ ইন্নাবো, ‘সালগিচা সা রি·য়াংনুয়া?’ ” বা সালগিওনি খ্রীষ্টখো হং·ওনেতে রা·বানা সালগিচা সা রি·য়াংনুয়া?

⁷ “হং·জাওবা দা·আ ইন্দাকে আগানাবো, ‘সা খা·মাচানা সিগিবারাংনি হা·দামচা রি·য়াংনুয়া?’ ” আগানস্খাওদে সিয়াওনি খ্রীষ্টখো চাখাত্তেতি রা·বানা সিগিবারাংনি হা·দামচা সা রি·য়াংনুয়া?

⁸ ইসলনি রা·চাকনা খ্রাগিবা হং·আনি বিদিংও শাস্ত্র আরোবা আগানা, “ইসল জেখো আগানজক উয়া নাং·মুংআন দংআ, আগানস্খাওদে নাং·নি খু·সুকো আরো নাং·নি খা·থংও দংআ।” জে বিবিরা·আনি খাৎথাখো চিংআ আগানফ্রাকিংআ উয়াদে ইসলনি উয়া খাৎথা হং·আ।

⁹ উয়া খাৎথা হং·জক, না·আ যীশুখো গিত্তেল ইন্নে খু·সুকচা খু·রাচাকোদে আরো খা·থংও ইসল বিখো সিয়াওনি থাংচাএতজক ইন্নে বিবিরা·আওদে উনোন না·আ পাপওনি জক্কেতাখো মা·ন্নুয়া;

¹⁰ মুয়ানা খা·থংও বিবিরা·আনি গিম্মিন ইসল মান্দিখো দোসগ্রি ইন্নে রা·চাকা আরো খু·সুকচা খু·রাচাক্কানি গিম্মিন পাপওনি জক্কেতা।

¹¹ রংথালগিবা শাস্ত্র আগানা, “জেআন বিখো বিবিরা·আ বিয়া খা·দংআগ্রি হং·জানুয়া।”

¹² যিহূদী আরো যিহূদী হং·গিজারাংনি গিসেপো দিংথাংগ্রিকানি দংজা, মুয়ানা গিম্মিকনি গিত্তেল আপসান। জেরাং বিখো রিক্কামা বিসংনা বিয়া বাং·এন ফাত্তিয়াখো হ·ন্না।

¹³ রংথালগিবা শাস্ত্রও দংআ, “জক্কেতাখো মা·ন্না গিত্তেলখো জেআন রিক্কামা বিয়া জক্কেতাখো মা·ন্নুয়া।”

¹⁴ ইন্দিবা জেখো বিসং বিবিরা·জাজক বিখো বাদিকে দাক্কে রিক্কামনুয়া? জেনি গিম্মিন বিসং খিন্নাখুজা বিখো বিসং বাদিকে দাক্কে বিবিরা·নুয়া? আগানফ্রাকগিবা দংজাওদে বিসং বাদিকে দাক্কেবা খিন্নানুয়া?

¹⁵ ইনাআগ্রেবা সাবা ওয়াত্তেতজাওদে বাদিকে দাক্কে আগানফ্রাকগিবারাং আগানফ্রাকনুয়া? রংথালগিবা শাস্ত্রও চক্কা দংআ, “রাসং দাকনা বিসংনি জা·চকনা জেরাং নাম্মা খাৎথাখো আগানফ্রাকনা রি·বাআ।”

¹⁶ ইন্দিবা গিম্মিকান উয়া নাম্মা খাৎথাখো খিন্নাচাকজা। আগানসোগিবা যিশাইয় আগানজক, “গিত্তেল, চিংনি হন·গিবা নাম্মা খাৎথাখো সা বিবিরা·জক?”

¹⁷ ইন্দাকোদে নিকনা মা·ন্না, ইসলনি খাৎথাখো খিন্নাচাক্কানি গিম্মিনান বিবিরা·আ রি·বাআ, আরো খ্রীষ্টনি গিম্মিন আগানফ্রাকাচা উয়া খাৎথাখো খিন্নানা মা·ন্না।

¹⁸ ইন্দিবা আংআ আগানা, ইস্রায়েলনি মান্দিরাং উয়া খাৎথাখো খিন্নাখুজামা? বিবিন খিন্নাজক। রংথালগিবা শাস্ত্র আগানা, বিসংনি খু·রাং হা·গিলসাক গিম্মিকো গিপ্পাংজক, বিসংনি খাৎথা গিপ্পাংজক হা·গিলসাকনি খি·থিকোনা দিপ্পাৎ।

¹⁹ আংআ দা·আবা আগানিংআ, ইস্রায়েলনি মান্দিরাং উয়া খাৎথাখো হা·আইনা মান·জামা? স্খাং মোশিচা ইসল আগানজক, জে জাত মামুং জাতআন হং·জা, উয়া জাতচান আংআ নাং·নি গিসিক নাংআখো মিকরাকেতনুয়া; গিসিকগ্রি জাত মা·সাচা নাং·খো খা·আওনাংএতনুয়া।

²⁰ উনি জা·মানো যিশাইয়চা ইসল আরোবা রাক্কে আগানজক, “আংআ বিসংচান দংআমিং, ইন্দিবা বিসং আংচা মামুং দাকচাকাখো মা·ন্না রি·বাজাজক। আংআ ইয়া মান্দিরাংখো আংচা মল·মলখানা চল হন·জক, ইন্দিবা বিসং আংচা মামুংখো মল·মলজাজক।”

²¹ ইন্দিবা ইস্রায়েলনি মান্দিরাংনি গিম্মিন বিয়া আগানজক, “বামগিজাগিবা আরো গিত্তক গ্রেং রাকগিবা মান্দিরাংচাবাক্কা সালগিম্মিকো আংআ আংনি জাকখো বাওয়াংএন দংআ।”