ফারাকগিবা খাৎথা 7 - Garo New Testament

সীলমোহর সু·আ রিৎচাসা সৎব্রিব্রি হাজাল ইস্রায়েল

¹ উনি জা·মানো আংআ সাকব্রি সা·গ্রেখো হা·গিলসাকনি সামব্রি খি·থিকওনা চাদেংএ দংআখো নিকজক। বিসং হা·গিলসাকনি খি·থিকব্রিনি বালওয়াখো ফেং·এ রা·রিকিংআমিং, জেদাক্কে হা·গিলসাক, সাগাল বা বলবিফাংও বালওয়া বালজা।

² জা·মানো আংআ দা·আও সাকসা সা·গ্রেখো সালারামচানি চাখাতে রি·বাখো নিকজক। বিচা থাংগিবা ইসলনি সীলমোহর দংআমিং। জে সাকব্রি সা·গ্রেনা হা·গিলসাক আরো সাগালনি নামগিজাখো দাক্কানি বিল হ·ন্নামিং উয়া সাকব্রি সা·গ্রেখো বিয়া নাম্মেন রাক্কে চ্রিকে আগানজক,

³ “আনচিংনি ইসলনি নকখলরাংনি কপালও সীলমোহর সু·খুজানা দিপ্পাৎ হা·গিলসাক, সাগাল বা বলফাংরাংখো দা·আ নাসিয়েতাবো।”

⁴ জা·মানো আংআ উয়া সীলমোহর সু·আ মান্দিরাংনি নম্বলখো খিন্নাজক। ইস্রায়েলরাংনি গিম্মিক মা·চংওনি রিৎচাসা সৎব্রিব্রি হাজাল মান্দিখো সীলমোহর সু·আমিং:

⁵ যিহূদানি মা·চংওনি হাজাল চি·গ্মি। রূবেণনি মা·চংওনি হাজাল চি·গ্মি। গাদনি মা·চংওনি হাজাল চি·গ্মি।

⁶ আশেরনি মা·চংওনি হাজাল চি·গ্মি। নপ্তালিনি মা·চংওনি হাজাল চি·গ্মি। মনঃশিনি মা·চংওনি হাজাল চি·গ্মি।

⁷ শিমিয়োননি মা·চংওনি হাজাল চি·গ্মি। লেবিনি মা·চংওনি হাজাল চি·গ্মি। ইষাখরনি মা·চংওনি হাজাল চি·গ্মি।

⁸ সবূলূননি মা·চংওনি হাজাল চি·গ্মি। যোষেফনি মা·চংওনি হাজাল চি·গ্মি। বিন্যামীননি মা·চংওনি হাজাল চি·গ্মি।

গিব্বক চলাখো চিনগিবা মান্দি জিলমা

⁹ উনি জা·মানো আংআ গিম্মিক জাত, মা·চং, হা·সং আরো খু·সুকওনি ইন্দাকফিল্লে মান্দি জিলমাখো নিকজক, দারাংবা বিসংখো চান্না মান·জাজক। গিব্বক চলাখো চিন্নে বিসং উয়া সিংহাসন আরো মেষ বি·সানি মিকখাংও খেজুর বিজাকখো জাক্কো রা·এ চাদেংএ দংআমিং।

¹⁰ বিসং রাক্কে চ্রিকে আগানিংআমিং: “জেআন সিংহাসনও আসংএ দংআ, আনচিংনি উয়া ইসল আরো মেষ বি·সানি জাক্কোন পাপওনি জক্কানি দংআ।”

¹¹ জা·মানো সা·গ্রেরাং গিম্মিকান উয়া সিংহাসনখো, মি·আফারাংখো আরো সাকব্রি থাংগিবা জাংগিগ্মাংগিবারাংখো উইলউইলে চাদেংজক। বিসং সিংহাসননি মিকখাংও থুচিকপে ইসলখো অলাখিয়ে আগানজক,

¹² “আমেন। রাসং, হা·আইয়ানি, মিৎথেলা, মান্দিরা·আ, বিল আরো বিল্লাকা ফাংনাজলনা আনচিংনি ইসলনিন হং·খানা। আমেন।”

¹³ উনো সাকসা মি·আফাআ আংনা আগানজক, “গিব্বক চলাখো চিনগিবা ইয়া মান্দিরাং সা? আরো বাচ্চানিবা ইরাং রি·বাজক?”

¹⁴ আংআ বিনা আগানজক, “নিবো, উখো না·আন হা·আইয়া।” বিয়া আংনা আগানজক, “উয়া বিল্লংআ দুকওনি জেরাং রি·বাজক ইরাং বিসংআন। ইরাং আন·থাংনি চলাখো মেষ বি·সানি হান·চিও সু·গালে গিব্বকেতজক।

¹⁵ উনি গিম্মিন ইরাং ইসলনি সিংহাসননি মিকখাংও দংআ আরো সালগিনি থরম নক্কো ইরাং সাল-ওয়াল বিনা দাকচাকে হ·ন্নিংআ। জেআন সিংহাসনও আসংএ দংআ বিয়ান ইরাংনি সাক্কাও বিনি তাম্বুখো রিকনুয়া।

¹⁶ ইরাং আরবা অকখ্রিজানাজক, চি রিংনাবা হা·সিকজানাজক; সালনি দিং·আ ইরাংনি বে·এনো আরবা নাংজানাজক, দিংআবা দিংজানুয়া,

¹⁷ মুয়ানা উয়া মেষ বি·সা জেআন সিংহাসননি সাক্কাও দংআ বিয়ান ইরাংনি রাকখুয়াল হং·নুয়া। থাংগিবা চিমিকনি সেফাংও বিয়া বিসংখো রা·আংনুয়া, আরো ইসল ইরাংনি মিকচিখো রিপ্পাকেতনুয়া।”