ফারাকগিবা খাৎথা 5 - Garo New Testament

খি·তাপ আরো মেষ বি·সা

¹ জেআন উয়া সিংহাসননি সাক্কাও আসংএ দংআমিং বিনি জাক্রা জাক্কো আংআ গি·সা খি·তাপখো নিকজক। খি·তাপনি নিং·আচা আরো হা·ফালচা চক্কা দংআমিং আরো গি·স্নি মোহরচা সীলমোহর সু·আ দংআমিং।

² জা·মানো আংআ সাকসা বিল্লাকগিবা সা·গ্রেখো রাক্কে ইয়া খাৎথাখো আগানাখো খিন্নাজক, “সা ইয়া সীলমোহররাংখো ফি·এ খি·তাপখো এংনা খ্রাগিবা হং·আ?”

³ ইন্দিবা সালগিও বা হা·গিলসাকো বা হা·নিংআও সাকসাবা উয়া খি·তাপখো এংনা মান·জাজক, নিং·আনিখো নিনাবা মান·জাজক।

⁴ উনো আংআ নাম্মেন গ্রাপিংজকমিং, মুয়ানা ইন্দাকগিবা সাকসাখো মান·জাজক জেআন উয়া খি·তাপখো এংনা বা নিনা খ্রাগিবা হং·আ।

⁵ জা·মানো মি·আফারাংওনি সাকসা আংনা আগানজক, “দা·আ গ্রাপাবো। যিহূদা মা·চংনি সিংহ, জেআন দায়ূদনি দেরিচ্ছু-সু·রিচ্ছু হং·আ, বিয়া হামজক। বিয়ান উয়া খানস্নি সীলমোহরখো ফি·এ খি·তাপখো এংনা মা·ন্না।”

⁶ সাকব্রি জাংগিগ্মাংগিবা আরো মি·আফারাংনি জাংচিও দংগিবা সিংহাসননি সাক্কাও সাকসা মেষ বি·সাখো আংআ চাদেংএ দংআখো নিকজক। উয়া মেষ বি·সাখো স·ওতে গালজকমিংখোন ইন্নে আংআ চানচিংআমিং। উয়া মেষ বি·সানি গ্রং গং·স্নি আরো মিক্রোন রং·স্নি দংআমিং। ইসলনি জে সাকস্নি গিসিকখো হা·গিলসাকনি হা·দাম দিমদাকচা ওয়াত্তেতিংআ ইয়া মিক্রোনরাং হং·জক উয়া সাকস্নি গিসিক।

⁷ জা·মানো উয়া মেষ বি·সা রি·বাএ সিংহাসনও আসংএ দংগিবানি জাক্রা জাকনিখো খি·তাপখো রা·জক।

⁸ খি·তাপখো রা·আনি জা·মানো উয়া সাকব্রি জাংগিগ্মাংগিবা আরো সাক খলগ্রিকব্রি মি·আফারাং মেষ বি·সানি মিকখাংও থুচিকপজক। বিসংনি দিমদাকনি জাক্কো গি·সা দাক্কে বীণা আরো গি·সা দাক্কে ধূপও গাপ্পা সোনানি দনচাক্রা দংআমিং। উয়া ধূপও গাপ্পা দনচাক্রারাং হং·জক ইসলনি মান্দিরাংনি বি·আ।

⁹ বিসং ইয়া গিত্তাল গীতখো রিং·আমিং: “না·আন উয়া খি·তাপখো রা·এ উনি সীলমোহররাংখো এংনা খ্রাগিবা, মুয়ানা নাং·খো স·ওতে গাল্লা হং·জকমিং। না·আন নাং·নি হান·চিচা গিম্মিক মা·চং, খু·সুক, হা·সং আরো জাতরাংওনি মান্দিরাংখো ইসলনা ব্রিজক।

¹⁰ না·আ বিসংখো রা·এ গি·সা সংনক রিক্কে রা·জক আরো আনচিংনি ইসলনা দাকচাকে হ·ন্না ইন্নে খামাল দাকজক। হা·গিলসাকো বিসংআন শাসন দাকনুয়া।”

¹¹ জা·মানো আংআ নিয়েতজক; আরো আংআ উয়া সিংহাসন, জাংগিগ্মাংগিবা আরো মি·আফারাংনি সামব্রিও বাং·আ সা·গ্রেরাংনি খু·রাংখো খিন্নাজক। উয়া সা·গ্রেরাং দংআমিং হাজাল হাজাল, কোটি কোটি।

¹² বিসং রাক্কে রাক্কে ইয়া খাৎথাখো আগানিংআমিং: “জে মেষ বি·সাখো স·ওতে গাল্লা হং·জকমিং, বিয়ান বিলখো, গামখো, হা·আইয়াখো, বিল্লাকাখো, মান্দিরা·আখো, রাসংখো আরো মিৎথেলাখো মা·ন্না খ্রাগিবা।”

¹³ জা·মানো সালগিও, হা·গিলসাকো, হা·নিংআও আরো সাগালও জাংগিগ্মাংগিবা জেরাং দংআ, আরোবা, উরাংনি গিসেপো আরো জেরাং দংআ দিমদাকখো আংআ ইয়া খাৎথাখো আগানাখো খিন্নাজক: “সিংহাসননি সাক্কাও জেআন আসংএ দংআ বিনি আরো উয়া মেষ বি·সানি মিৎথেলা, মান্দিরা·আ, রাসং আরো বিল ফাংনাজলনা দংখানা।”

¹⁴ উয়া সাকব্রি জাংগিগ্মাংগিবারাং আগানজক, “আমেন।” জা·মানো উয়া মি·আফারাং থুচিকপে অলাখিজক।