ফারাকগিবা খাৎথা 4 - Garo New Testament

সালগিনি সিংহাসন

¹ উনি জা·মানো আংআ সালগিনি দ·গা গি·সা এংআখো নিকনা মান·জক। সিংগা গা·ম্মা গিত্তা জেনি গিত্তকনি খু·রাংখো আংআ স্খাংও খিন্নামিং বিয়া আংনা আগানজক, “না·আ চাখাতে ইয়োনা রি·বাবো। ইরাংনি জা·মানো জেরাং হং·না হাম·বিবিংজক উখো আংআ নাং·না ফিন্নিকনুয়া।”

² আরো উনোন আংআ গিসিক রংথালগিবানি রি·দিলাও সালগিও গি·সা সিংহাসনখো নিকনা মান·জক। আংআ নিকজক, উয়া সিংহাসনও সাকসা আসংএ দংআ।

³ বিনি মিকখাং হীরা আরো সার্দি মণি গিত্তা দাক্কা। সিংহাসননি সামব্রিও সুনদারে গি·সা দংআমিং; উখো নিনাদে থিক গি·সা পান্না গিত্তা দাক্কে নিক্কা।

⁴ উয়া সিংহাসননি সামব্রিও আরোবা খলগ্রিকব্রি সিংহাসন দংআমিং, আরো উয়া সিংহাসনরাংও সাক খলগ্রিকব্রি মি·আফারাং আসংএ দংআমিং। বিসংনি চলা গিব্বকামিং আরো বিসংনি স্খুও সোনানি মুকুট দংআমিং।

⁵ উয়া সিংহাসনওনি মিকখা রিপরাপা, খু·রাং আরো মিকখা খিম্‌প্রেতানি গা·ম্মা হং·খাতিংআমিং। সিংহাসননি মিকখাংও গি·স্নি চাক্কি চিং·ইংআমিং। উয়া চাক্কিরাং হং·জক ইসলনি সাকস্নি গিসিক।

⁶ উয়া সিংহাসননি মিকখাংও রং·চি গিত্তা গ্রিকগিবা গি·সা জানিরানি সাগাল দংআমিং। উয়া সিংহাসনরাংনি জাংচিও দংগিবা সিংহাসননি সামব্রিও সাকব্রি জাংগিগ্মাংগিবারাং দংআমিং। বিসংনি মিকখাংচা আরো খি·সাংচাবাকা মিক্রোন গাপ্পামিং।

⁷ স্খাংগিবা জাংগিগ্মাংগিবানি মিকখাং সিংহ গিত্তা, গ্মিগিবানি মা·সু বি·সা গিত্তা, গিত্থামগিবানি মান্দি গিত্তা আরো ব্রিগিবানি বিলগিবা দো·রেং গিত্তা দাক্কা।

⁸ ইয়া সাকব্রি জাংগিগ্মাংগিবানি দিমদাকনি গি·দক দাক্কে গ্রাং দংআমিং আরো উনি বে·এন দিমদাকও মিক্রোন গাপ্পামিং। উরাং সালওয়াল ইন্দাকে খাৎথা আগানিংআমিং, “বিল্লাকস্রাংগিবা গিত্তেল ইসল, জেআন দংআমিং, জেআন দংআ আরো জেআন রি·বাংজক, বিয়া রংথালা, রংথালা, রংথালা।”

⁹ ফাংনাজলনা থাংগিবা গিত্তেল ইসল, জেআন সিংহাসনও আসংএ দংআ, ইয়া জাংগিগ্মাংগিবারাং জে সময়ওন বিনা রাসং, মান্দিরা·আ আরো মিৎথেলাখো হ·ন্না,

¹⁰ উনোন উয়া সাক খলগ্রিকব্রি মি·আফারাং সিংহাসনখো মান·রিকগিবা, আগানস্খাওদে জেআন ফাংনাজলনা থাংএ দংআ বিখো থুচিকোপে সালাম দাক্কা। ইয়া মি·আফারাং উনো উয়া সিংহাসননি মিকখাংও বিসংনি মুকুটখো এংএ দন্নে আগানা,

¹¹ “আনচিংনি গিত্তেল আরো ইসল, না·আ রাসং, মান্দিরা·আ আরো বিলখো মা·ন্না খ্রাগিবা, মুয়ানা না·আন দিমদাকখো থারিজক; আরো নাং·নিন হা·সিকাচা উরাং থারিয়া হং·জক আরো দংখুংআ।”