ফারাকগিবা খাৎথা 22 - Garo New Testament

জাংগিনি-চি

^1-2 জা·মানো উয়া সা·গ্রে জাংগিনি চিনি চিবিমাখো আংনা ফিন্নিকজক। উয়া ক্রিস্টাল গিত্তা গ্রিকামিং আরো ইসলনি আরো মেষ-বি·সানি সিংহাসনওনি হং·খাতে সংজিলমানি রামা জাংচিও চিবিমা দংআমিং। উয়া চিবিমানি সামগ্মি রিক্কামওন বলজাংগি দংআমিং। উয়ো চি·গ্মি বিথি নাংআ। জা রিক্ষিতান উয়ো বিথি নাংআ আরো উনি বিজাকচা গিম্মিক জাতনি মান্দি নাম্মিংআ। সাও আরবা দংজানুয়া।

³ ইসলনি আরো মেষ-বি·সানি সিংহাসন উয়া সংজিলমাও দংনুয়া আরো বিনি নকখলরাং বিনা দাংদিকে হন·নুয়া।

⁴ বিসং বিনি মিকখাংখো নিকনা মান·নুয়া আরো বিনি বিমিং বিনি কপালও লিক্ষিয়া দংনুয়া।

⁵ ওয়াল দংজানাজক আরো বিসংনি চাক্কিনি বা সালনি সেং·আ নাংজানাজক, মুয়ানা গিত্তেল ইসল আন·থাংআন বিসংনি সেং·আ হং·নুয়া। বিসং জ্রিংজ্রৎনা শাসন দাকনুয়া।

থেংরিন যীশু রি·বাংজক

⁶ জা·মানো উয়া সা·গ্রে আংনা আগানজক, “ইয়া খাৎথারাং বিবিরা·না খ্রাগিবা আরো বিবি হং·আ। গিত্তেল ইসল, জেআন আগানসোগিবারাংনি গিসেপো খাৎথা আগানামিং বিয়া বিনি সা·গ্রেখো ওয়াত্তেতজক, জেদাক্কে মিত্তাম সালনি গিসেপো জেরাং হং·না রি·য়াংইংজক উখো উয়া সা·গ্রে বিনি নকখলরাংনা ফিন্নিকনা মান·না।”

⁷ যীশু আগানজক, “নিবো, আংআ থেংরিন রি·বাংজক। ইয়া খি·তাপনি গিম্মিক খাৎথা, আগানস্খাওদে ইসলনি খাৎথাখো জে মানিয়া বিয়া ফাত্তিয়াখো মান·গিবা হং·আ।”

⁸ আংআ যোহন ইরাংখো খিন্নাজক আরো নিকজক। গিম্মিকখো খিন্নানি আরো নিক্কানি জা·মানো, জে সা·গ্রে আংনা ইরাংখো ফিন্নিকজক আংআ বিখো সালাম দাকনা বিনি জা·চকও থুচিকপজক।

⁹ ইন্দিবা বিয়া আংনা আগানজক, “দনবো, আংআ নাং·নি আরো নাং·নি বিবিরা·গিবা জংআদারাংনি, আগানস্খাওদে আগানসোগিবারাংনি আরো জেরাং ইয়া খি·তাপনি গিম্মিক খাৎথাখো মানিয়া বিসংমিং নকখল হং·ফা। ইসলখোন অলাখিবো।”

¹⁰ জা·মানো বিয়া আংনা আগানজক, “ইয়া খি·তাপনি গিম্মিক খাৎথা, আগানস্খাওদে ইসলনি খাৎথাখো না·আ দা·আ থুম্মুয়ে দন্নাবো, মুয়ানা সাল সকবাজক। অন্যায় দাকগিবা, ইনি জা·মানোবা বিয়া অন্যায় দাকখানা;

¹¹ নামজাস্রাংগিবা, ইনি জা·মানোবা বিয়া নামজাস্রাং দংখানা। খাকখেৎ মান্দি ইনি জা·মানোবা খাকখেৎ কামখো দাকখানা আরো জে মান্দি রংথালগিবা, বিয়া ইনি জা·মানোবা রংথালে দংখানা।”

¹² যীশু আগানিংজক, “নিবো, আংআ থেংরিন রি·বাংজক আরো গিম্মিকনা বিনি কামনি খ্রি হন·নানি বকসিস আংচান দংআ।

¹³ আংআ আলফা আরো ওমিগা, স্খাং আরো বন·চতা, হা·বাচেংআনি আরো বন·নানি।

¹⁴ “ফাত্তিয়া মান·গিবা, জেরাং বিসংনি বা·রাখো সু·গালে গাল্লা জেদাক্কে বিসং জাংগিনি বিফাংনি বিথিখো চা·না মান·না আরো দ·গা গিত্তা সংজিলমাও নাপনা মান·না।

¹⁵ আচাক গিত্তা নামজাস্রাং মান্দি, মনতল দাকগিবা, থিল·লেকগিবা, স·ওতগিবা, বিমাংখো অলাখিগিবা, আরে জেরাং বুআখো নামনিকা আরো বু·আও রি·আ বিসং গিম্মিকান হা·ফালচা গা·আকে দংআ।

¹⁶ “আংআ যীশু আংনি সা·গ্রেখো ওয়াত্তেতজক জেদাক্কে বিয়া না·সংচা মন্ডলীরাংনা ইরাংনি বিদিংও সাক্ষি হন·না মান·না। আংআ দায়দনি জা·দিল আরো মা·চং, ফ্রিংনি চিং·গিবা আস্কি হং·আ।”

¹⁷ রংথালগিবা গিসিক আরো মিচিক আগানিংআ, “রি·বাবো।” আরো জেআন ইয়া খাৎথাখো খিন্নাংজক বিয়াবা আগানখানা, “রি·বাবো।” জেনি চি রিংনা হা·সিকা বিয়া রি·বাখানা আরো জেআন চি রিংনা হাম·মা বিয়া দামগ্রি জাংগিনি চিখো রিংখানা।

¹⁸ জে মান্দি ইয়া খি·তাপনি গিম্মিক খাৎথাখো, আগানস্খাওদে ইসলনি খাৎথাখো খিন্নাআ আংআ বিচা ইয়া সাক্ষিখো হ·ন্নিংজক, সাওবা ইমিং মামিংখো জুরাওদে ইন্দিদে ইসলবা ইয়া খি·তাপও লিক্ষিগিবা গিম্মিক সাবিসিরাংখো বিনি জাংগিও জুরাএতনুয়া।

¹⁹ আরো ইয়া খি·তাপনি গিম্মিক খাৎথা, আগানস্খাওদে ইসলনি খাৎথাওনি সাওবা মামিংখো দনগালোদে ইন্দিদে ইসলবা ইয়া খি·তাপও লিক্ষিগিবা বলজাংগি আরো রংথালা সংজিলমানি মান·রিকানি বিলখো বিনি জাংগিওনি দনগালনুয়া।

²⁰ জেআন ইরাংনি বিদিংও সাক্ষি হ·ন্নিংজক বিয়া আগানিংজক, “বিবিন আংআ থেংরিন রি·বাংজক।” আমেন। গিত্তেল যীশু, রি·বাবো।

²¹ গিত্তেল যীশুনি ফাত্তিয়া ইসলনি গিম্মিক মান্দিরাংমুং দংখানা। আমেন।