ফারাকগিবা খাৎথা 21 - Garo New Testament

গিত্তাল যিরূশালেম

¹ জা·মানো আংআ গি·সা গিত্তাল সিলগা আরো গি·সা গিত্তাল হা·গিলসাকখো নিকজক। স্খাংগিবা সিলগা আরো স্খাংগিবা হা·গিলসাক বন·নাংজকমিং আরো সাগালবা দংজামিং।

² জা·মানো আংআ উয়া রংথালগিবা সংজিলমাখো, আগানস্খাওদে গিত্তাল যিরূশালেমখো সিলগাওনি আরো ইসলওনি হং·খাতে রি·বাখো নিকজক। মিচিকখো জেগিত্তা বিনি চাওয়ারিনা থারিয়ে দন্না, ইয়া সংজিলমাখোবা উগিত্তান থারিয়ামিং।

³ জা·মানো আংআ সাকসাখো উয়া সিংহাসনওনি রাক্কে ইয়া খাৎথাখো আগানাখো খিন্নাজক, “দা·আও মান্দিও ইসলনি দংআনি হা·দাম হং·জক। বিয়া মান্দিমিংআন দংনুয়া আরো বিসং বিনিন মান্দি হং·নুয়া। বিয়া আন·থাংআন মান্দিমিং দংনুয়া আরো বিসংনিন ইসল হং·নুয়া।

⁴ বিয়া বিসংনি মিকচিখো রিপ্পাকে হন·নুয়া। সিজানাজক; দুক, গ্রাপা আরো সা·দিকা আর দংজানাজক, মুয়ানা স্খাংনি গিম্মিক বন·জক।”

⁵ জেআন উয়া সিংহাসনও আসংএ দংআমিং বিয়া আগানজক, “নিবো, আংআ গিম্মিকখোন গিত্তাল দাক্কে থারিংজক।” জা·মানো বিয়া দা·আবা আগানজক, “ইয়া খাৎথাখো লিক্ষিবো, মুয়ানা ইয়া খাৎথারাং বিবিরা·না খ্রাগিবা আরো বিবি হং·আ।”

⁶ বিয়া আংনা আরোবা আগানজক, “বন·জক। আংআ আলফা আরো ওমিগা- হা·বাচেংআনি আরো বন·নানি। জেআন চি রিংনা হা·সিকা বিনা আংআ জাংগিনি চিমিকওনি দামগ্রি চি রিংনা হন·নুয়া।

⁷ জেআন হামনুয়া বিয়া ইরাংখো মান·রিকগিবা হং·নুয়া। আংআ বিনি ইসল হং·নুয়া আরো বিয়া আংনি দেফান্থি হং·নুয়া।

⁸ ইন্দিবা চিং·গিবা ওয়া·আল আরো গন্ধকনি চিমিকও দংআন হং·নুয়া খেনগিবা, বিবিরা·গিজাগিবা, মিৎচিনা খ্রাগিবা, স·ওতগিবা, থিল·লেকগিবা, মনতল দাকগিবা, বিমাংখো অলাখিগিবা আরো গিম্মিক বু·এ চা·গিবারাংনি বন·চতগিবা অবস্থা। ইয়ান হং·জক গ্মিগিবা সিয়া।”

⁹ জে সাকস্নি সা·গ্রেনি জাক্কো বন·চতগিবা সাবিসি গাপ্পা গি·স্নি দনচাক্রা দংআমিং বিসংওনি সাকসা আংচা রি·বাএ আগানজক, “রি·বা, আংআ নাং·না মিচিক, আগানস্খাওদে মেষ-বি·সানি জিকগিবাখো ফিন্নিকনা।”

¹⁰ জা·মানো উয়া সা·গ্রে আংখো গি·সা দাল·লা আরো চু·য়াকা হা·ব্রিচানা রিম্মাংজক। উনো আংআ রংথালগিবা গিসিকনি নিং·আও দংআমিং।

¹¹ উয়া সংজিলমানি নাম্মেন রং·থি চিং·ব্র্রাপা গিত্তা জানিরা গিত্তা হীরা গিত্তা।

¹² উয়া সংজিলমানি গি·সা দাল·লা চু·য়াকা দেয়াল দংআমিং আরো উয়ো চি·গ্মি দ·গা দংআমিং, আরো উয়া দ·গাও চি·গ্মি সা·গ্রে দংআমিং।

¹³ দগারাংনি গিগিত্থাম সালারামচাবাকা, গিগিত্থাম, গিগিত্থাম আরো গিগিত্থাম সালগ্রোচাবাকা দংআমিং।

¹⁴ উয়া সংজিলমানি দেয়ালনি চিগ্মি ফাংচাকা দংআমিং আরো উরাংনি সাক্কাও মেষবিসানি চিগ্মি ওয়াত্তেতানি চিগ্মি বিমিং দংআমিং।

¹⁵ জেআন আংমিং খাৎথা আগানিংআমিং বিনি জাক্কো গিসা সোনানি থোসুসাগিবা গলদিক দংআমিং, জেদাক্কে বিয়া উয়া সংজিলমা, উনি দগারাংখো আরো দেয়ালরাংখো থোনা মান্না।

¹⁶ সংজিলমা রো·আ আরো আপসান। জামানো বিয়া উয়া গলদিকচা সংজিলমাখো থোআনি জামানো নিকজক উয়া রো·আ, চুয়াকাও হাজালগ্মি রিতচাব্রি কিলোমিটার হং·আ।

¹⁷ জামানো বিয়া দেয়ালখো থোআনি জামানো উয়া রিতচাসা হংজক। মান্দি জেগিত্তা থোআ উয়া সা·গ্রে উগিত্তান থোআমিং।

¹⁸ উয়া দেয়ালখো হীরাচা থারিয়ামিং আরো সংজিলমা চিরংআ কাচ গিত্তা সোনাচা থারিয়া।

¹⁹ উয়া সংজিলমানি দেয়ালনি ফাংচাকারাংও বাংআ গামচাতগিবা রং·থি হননা দংআমিং। স্খাংগিবা হীরানি, গ্মিগিা নীলকানমনিনি, গিত্থামগিবা তামামনিনি, ব্রিগিবা পান্নানি,

²⁰ বংআগিবা সূর্যকান্তমনিনি, দকগিবা সার্দীয়মণিনি, স্নিগিবা পোখরাজনি, চেতগিবা বৈদুর্যমণিনি, স্খুগিবা পীতমণিনি, চিকখুংগিবা উপলনি, চিসাগিবা ফিরোজামণিনি আরো চি·গ্নিগিবা পদ্মরাগনি।

²¹ চি·গ্মি দগা হংজক চি·গ্মি মুক্তা। গিম্মিক দ·গা গিফ্রাকফ্রাক মুক্তাচা থারিয়ামিং। সংজিলমানি রামা চিরংআ কাচ গিত্তা খাকখেৎ।

²² আংআ উয়া সংজিলমাও থরম নকখো নিকজাজক, মুয়ানা গিত্তেল ইসল আরো মেষ-বিসান উয়া সংজিলমানি থরম নক হংআমিং।

²³ উযা সংজিলমাও থেংসুখাননা সাল বা জাজং নাংজা, মুয়ানা ইসলনি রাসংআন উনো সেংআখো হননা আরো মেষ বিসান উনি চাক্কি;

²⁴ আরো গিম্মিক জাত উয়া সেংআচা রি·নুয়া। হা·গিলসাকনি রাজারাং বিসংনি রাসংচা উয়া সংজিলমাও রি·বানুয়া।

²⁵ সালো দগারাং চিপ্পা দংজানুয়া আরো উনো ওয়ালবা ওয়ালজানুয়া।

²⁶ গিম্মিক জাতনিন রাসং আরো মান্দিরা·আ উনো রাবানুয়া।

²⁷ মারাং নাংআ বা নামজাস্রাং দাক্কা বা বু·এ আগানা ইন্দাকগিবা মান্দি উনো মামিংসালোবা নাপনা মানজানুয়া; জেরাংনি বিমিং মেষবিসানিন জাংগিনি খিতাপও লিক্ষিয়া দংআ বিসংআন উনো নাপনা মান·না।