ফারাকগিবা খাৎথা 19 - Garo New Testament

ইসলখো মিৎথেলা

¹ উনি জা·মানো আংআ সালগিও মান্দি জিলমানি মুক্কুয়াখো খিন্নাজক। বিসং আগানিংআমিং, “হাল্লেলূয়া! জক্কেতা, রাসং আরো বিল, গিম্মিকান আনচিংনি ইসলনি,

² মুয়ানা বিনি বিচাল বিবি আরো খাকখেৎ হং·আ। জেআন বিনি থিল·লেকাচা হা·গিলসাক গিম্মিকখো মারাং নাংএতামিং উয়া দাল·গিবা দারিখো ইসল শাসি হন·জক আরো বিনি নকখলরাংনি হান·চিনি দাকস্খাখো বিয়া বিনি সাক্কাও রা·জক।”

³ বিসং গ্মিগিবাও আগানজক, “হাল্লেলূয়া! বিওনি জ্রিংজ্রৎনা ওয়াল·খু হং·খাতনুয়া।

⁴ ইসল, জেআন সিংহাসনও আসংএ দংআ বিখো উয়া খলগ্রিকব্রি মি·আফারাং আরো উয়া সাকব্রি জাংগিগ্মাংগিবা থুচিকোপে অলাখিয়ে আগানজক, “আমেন। হাল্লেলূয়া!”

⁵ উনো সিংহাসনওনি সাকসা আগানজক, “ইসলনি নকখলরাং আরো না·সং জেরাং ইসলনা খা·ফাকে খেন্না, না·সং চন্না-দাল·লা গিম্মিকান আনচিংনি ইসলখো রাসং দাকবো।”

⁶ জা·মানো আংআ মান্দি জিলমানি মিক্কুয়া, রাক্কে চিনি মিক্কুয়া আরো রাক্কে মিকখা খিমপ্রেতানি খু·রাং গিত্তা দাক্কে আগানা ইয়া খাৎথাখো খিন্নাজক, “হাল্লেলূয়া! আনচিংনি বিল্লাকস্রাংগিবা গিত্তেল ইসল সংনকখো শাসন দাকনা হা·বাচেংজক।

⁷ রি·বাবো, আনচিং গিসিকো খুসি হং·এ নাম্মেন হান·সেংনা আরো বিখো রাসং দাকনা, মুয়ানা মেষ বি·সানি বিয়ানি সাল সকজক আরো বিনি নামচিক আন·থাংখো থারিজক।

⁸ চিং·গিবা, চি·রংআ আরো সেন·চিপচিপা মদিনানি বা·রাখো বিনা গান্না হন·জক। উয়া বা·রা ইসলনি মান্দিরাংনি বাম্মানি হং·আ।”

⁹ জা·মানো উয়া সা·গ্রে আংনা আগানজক, “ইয়া খাৎথাখো লিক্ষিবো, ‘মেষ-বি·সানি বিয়ানি চা·আও জেরাংনা আগানা বিসং ফাত্তিয়াখো মান·গিবা হং·আ।’ ” বিয়া ইয়া খাৎথাখোবা আগানজক, “ইরাং ইসলনিন খাৎথা আরো ইয়া বিবি হং·আ।”

¹⁰ উনো আংআ উয়া সা·গ্রেনি জা·চকও থুচিকোপে বিখো ইসল চাচাএ মান্দিরা·এ অলাখিজক। ইন্দিবা বিয়া আংনা আগানজক, “ইয়া মুয়াখো দাক্কিংআ? আংআ নাং·নি গিত্তা নকখল হং·ফা। ইসলখোন অলাখিবো। নাং·নি বিবিরা·গিবা জংআদারাং, জেরাং যীশুনি স্খিয়াখো রিম·মে রা·রিকা/মানিয়া, আংআ বিসংনিন সাকসা হং·আ। যীশুনি স্খিয়ান আগানসোগিবারাংনি স্খিয়ানি চং·মত হং·আ।”

রাজারাংনি রাজা, গিত্তেলরাংনি গিত্তেল

¹¹ জা·মানো আংআ নিকজক সালগি এংআন দংআ, আরো উয়ো মাংসা গিব্বক ঘোড়া দংআ। জেআন উয়া ঘোড়ানি সাক্কাও আসংএ দংআ বিনি বিমিং হং·আ বিবিরা·না খ্রাগিবা আরো বিবি। বিয়া খাকখেৎ বিচালখো দাক্কা আরো দাকগ্রিকা।

¹² বিনি মিক্রোন ওয়া·আল গিত্তা চিং·আ আরো বিনি স্খুও মুকুট বাং·আমিং। বিনি বে·এনও ইন্দাকগিবা মিংসা বিমিং লিক্ষিয়া দংআমিং, জে বিমিংখো বিনি আগ্রে দারাংবা হা·আইজা।

¹³ হান·চিও রিপ্পা বা·রাখো বিয়া গান্নামিং, আরো বিনি বিমিং হং·আ ইসলনি খাৎথা।

¹⁴ সালগিনি সিপাইরাং গিব্বক চি·রংআ সেন·চিপচিপা মদিনানি বা·রাখো গান্নে গিব্বক ঘোড়াও গাখাতে বিখো জা·রিকে রি·য়াংইংআমিং।

¹⁵ বিয়া জেদাক্কে গিম্মিক জাতরাংখো দকনা মান·না উনি গিম্মিনো বিনি খু·সুকওনি গি·সা মাতগিবা মিল্লাম হং·খাতবাংআমিং। বিয়া সিলনি গল·দিকচা গিম্মিক জাতখো শাসন দাকনুয়া আরো আংগুর মাড়াই দাক্কানি হা·খলও বিয়া জা·চকচা আংগুরখো গা·বেকবেকনুয়া। ইয়া আংগুর মাড়াই দাক্কানি হা·খল হং·জক বিল্লাকস্রাংগিবা ইসলনি খা·আও নাংআ।

¹⁶ বিনি বা·রাও আরো জা·ফিংও ইয়া বিমিং লিক্ষিয়া দংআ, “রাজারাংনি রাজা, গিত্তেলরাংনি গিত্তেল।”

¹⁷ জা·মানো আংআ সাকসা সা·গ্রেখো সালও চাদেংএ দংআখো নিকজক। জে দো·ওরাং সিলগাচা বিল্লিংআমিং বিয়া উরাং গিম্মিকখো রাক্কে চ্রিকে আগানজক, “রি·বা, ইসলনি দাল·গিবা মিয়াত্থামখো চা·ফানা থম·বো,

¹⁸ জেদাক্কে না·সং রাজা, কমান্ডার, বিল্লাকগিবা মান্দি, ঘোড়া আরো উয়া ঘোড়াও গাখাতগিবা মান্দিরাংখো, জাক গিত্তেলগিবা আরো নকখলরাংনি আরো দাল·লা-চন্না গিম্মিক মান্দিনি বে·এনখো চা·না মান·না।”

¹⁹ জা·মানো আংআ নিকজক, জেআন উয়া ঘোড়ানি সাক্কাও আসংএ দংআমিং বিনি আরো বিনি সিপাইরাংনি সাক্কাও দাকগ্রিকনা ইন্নে উয়া মাৎবুরুং আরো হা·গিলসাকনি রাজারাং বিসংনি সিপাইরাংখো রা·এ চিম্মংথকজক।

²⁰ উয়া মাৎবুরুংখো রিম·জক আরো জে দাকমিকগিবা আগানসোগিবা বিনি হং·এ আইয়াও ইনমানগিবা কামখো দাকনুয়ামিং বিখোবা রিম·জক। জেরাং উয়া মাৎবুরুংনি চিনখো রা·আমিং আরো বিনি বিমাংখো অলাখিয়ামিং উয়া দাকমিকগিবা আগানসোগিবা উয়া আইয়াও ইনমানানি কামরাংচা বিসংখো ব্রাংএতে দন্নামিং। চিং·গিবা গন্ধকনি ওয়া·আলনি চিও থাংআ অবস্থাও ইয়া সাকগ্মিখো গাল্লেতজক।

²¹ জেআন উয়া গিব্বক ঘোড়ানি সাক্কাও আসংএ দংআমিং বিনি খু·সুকওনি জে মিল্লাম হং·খাতবামিং উচা বিসংনি গিপ্পিন রিপ্পেংরাংখো স·ওতে গাল্লা হং·জক। উনি গিম্মিন দো·ওরাং বিকমা গাপ্পে বিসংনি বে·এনখো চা·জক।