ফারাকগিবা খাৎথা 17 - Garo New Testament

মাৎবুরুংনি সাক্কাও আসংএ দংগিবা মিচিক

¹ জে সাকস্নি সা·গ্রেনি জাক্কো গি·স্নি দনচাক্রা দংআমিং বিসংওনি সাকসা রি·বাএ আংনা আগানজক, “চিনি সাক্কাও জে দাল·গিবা দারি আসংএ দংআ, রি·বা, বিনি শাসিখো আংআ নাং·না ফিন্নিকনা।

² হা·গিলসাকনি রাজারাং বিমিং থিল·লেকামিং, আরো জেরাং ইয়া হা·গিলসাকনি বিসং বিনি থিল·লেকানি আংগুল বিৎচিও চুফেকগিবা হং·আমিং।”

³ জা·মানো উয়া সা·গ্রে আংখো হা·গিসি জওলচানা রিম্মাংজক। উনো আংআ গিসিক রংথালানি নিং·আও দংআমিং। উনো আংআ সাকসা মিচিকখো মাংসা গিচ্চাক রংনি মাৎবুরুংনি সাক্কাও আসংএ দংআখো নিকজক। ইসলখো চন্নিকনা ইন্নে বাং·আ বিমুংরাং উয়া মাৎবুরুংনি সাক্কাও লিক্ষিয়া দংআমিং। উনি দতস্নি স্খু আরো গংচিকখুং গ্রং দংআমিং।

⁴ উয়া মিচিক গিচ্চাক রংনি বা·রাখো গান্নামিং আরো বিনি বে·এনো সোনা, গামচাতা রং·থি আরো মুক্তানি গয়না দংআমিং। নামজাস্রাং আরো বিনি থিল·লেকানি ময়লাও গাপ্পা গি·সা সোনানি দনচাক্রা বিনি জাক্কো দংআমিং।

⁵ বিনি কপালও ইন্দাকা বিমুং লিক্ষিয়া দংআমিং জেনি বিদিংও মিংসা নিং·থুয়া বিবি দংআমিং। উয়া বিমুং হং·জক, “বাবিল, দারি বিমারাংনি আরো হা·গিলসাকনি নামজাস্রাংরাংনি মা·গিবা।”

⁶ আংআ নিকজক, উয়া মিচিক ইসলনি মান্দিরাংনি হান·চিখো আরো জেরাং যীশুনি গিম্মিনো সাক্ষি হন·জক বিসংনি হান·চিখো রিংএ চুফেকগিবা হং·এ দংআ।

⁷ আংআ বিখো নিক্কে নাম্মেন আইয়াও ইনমানজক। উনো উয়া সা·গ্রে আংনা আগানজক, “না·আ মুয়ানা আইয়াও ইনমানিংজক? মিচিকনি আরো জে মাৎবুরুং বিখো রিপ্পিএ রা·আংআ উয়া মাৎবুরুংনি নিং·থুয়া অলথোখো নাং·না আগানে হ·ন্নিংজক। ইয়া উয়া মাৎবুরুং জেনি দৎস্নি স্খু আরো গং·চিকখুং গ্রং দংআমিং।

⁸ জে মাৎবুরুংখো না·আ নিক্কামিং উয়া চেংও দংআমিং ইন্দিবা দা·আও দংজা। জা·মানো বিয়া উয়া থিং·নাপগিবা হা·খলওনি চাখাতে রি·বাএ জ্রিংজ্রৎনা দিপ্পাৎ শাসিখো মান·নুয়া। উনো জেরাং ইয়া হা·গিলসাকনি হং·আ, আগানস্খাওদে হা·গিলসাক হং·চেংআনি সালওনি জেরাংনি বিমিং জাংগিনি খি·তাপও লিক্ষিয়া দংজা বিসং উয়া মাৎবুরুংখো নিক্কে আইয়াও ইনমান্নুয়া; মুয়ানা উয়া মাৎবুরুং স্খাংও দংআমিং, ইন্দিবা দা·আও দংজা, ইন্দাকোবা দা·আবা নিকনুয়া।

⁹ “দা·আও জেখো আগানা হং·নুয়া উখো হা·আইনা সেং·গিবা গিসিক নাংআ। উয়া দৎস্নি স্খু হং·জক দৎস্নি হা·ব্রি জেনি সাক্কাও মিচিক আসংএ দংআ। উয়া দৎস্নি স্খু দা·আবা দৎস্নি রাজাবা হং·আ।

¹⁰ উয়া রাজারাংওনি সাকবংআ স্খাংআন বন·জক, সাকসা দা·আওবা দংখুংআ আরো সাকগিপ্পিনদে দা·আওবা রি·বাখুজা। উয়া রাজা রি·বানি জা·মানো বিখো মিত্তাম সময়না দংনান নাংনুয়া।

¹¹ জে মাৎবুরুং স্খাংও দংআমিং ইন্দিবা দা·আওদে দংজা বিয়া উয়া দৎস্নিওনি সাকসা হং·ওবা বিয়া চেৎগিবা রাজা; বিয়া জ্রিংজ্রৎনা দিপ্পাৎ শাসিখো মান·নুয়া।

¹² “জে গং·চিকখুং গ্রংখো না·আ নিকজক উরাং সাকচিকখুং রাজা হং·আ। বিসং দা·আওবা শাসন দাকচেংখুজা, ইন্দিবা বিসং উয়া মাৎবুরুংনা স্খাং মিত্তাম সময়না রাজা হং·এ শাসন দাক্কানি বিলখো মান·নুয়া।

¹³ ইয়া রাজারাংনি মিকসংআ আপসান হং·আ, আরো বিসং গিম্মিকান বিসংনি বিলখো আরো মান·রিকানি বিলখো উয়া মাৎবুরুংনা হন·নুয়া।

¹⁴ ইরাং মেষ-বি·সানি সাক্কাও দাকগ্রিকনুয়া আরো মেষ-বি·সা বিসংখো হাম্মেতজানুয়া, মুয়ানা বিয়া গিত্তেলরাংনি গিত্তেল আরো রাজারাংনি রাজা হং·আ। জেরাংখো রিক্কামজক আরো বাচ্চিয়ে রা·জক আরো জেরাং বিবিগিবা হং·আ বিসংআন বিমিং দংনুয়া।”

¹⁵ জা·মানো উয়া সা·গ্রে আংনা আগানজক, “না·আ জে চিখো নিকজক, জেনি সাক্কাও উয়া দারি বিমা আসংএ দংআ, উয়া হং·জক বাং·আ হা·সং, বাং·আ মান্দি, বাং·আ জাত আরো বাং·আ খুু·সুক।

¹⁶ না·আ জে গং·চিকখুং গ্রংখো নিকজক উরাং আরো উয়া মাৎবুরুং উয়া দারি বিমাখো মিৎচিনুয়া। বিসং বিখো বন·নেতনুয়া আরো খমলং দাকনুয়া আরো বিনি বে·এনখো চা·নুয়া; জা·মানো বিখো ওয়া·আলচা সো·এ গালনুয়া।

¹⁷ মুয়ানা ইসল বিসংনি খা·থংও ইন্দাকগিবা হা·সিকাখো হন·জক জেদাক্কে বিনি খাৎথা চু·সকা। উনি হা·সেলও বিসং গিসিকচা আপসান হং·এ উয়া মাৎবুরুংচা বিসংনি গিম্মিক বিলখো হন·চাকনুয়া, জেদাক্কে ইসলনি খাৎথা চু·সকগিজা দিপ্পাৎ বিয়া শাসন দাকনা মান·না।

¹⁸ জে মিচিকখো না·আ নিক্কামিং উয়া হং·জক উয়া সংজিলমা, জেআন হা·গিলসাকনি গিম্মিক রাজারাংনি সাক্কাও শাসন দাক্কিংজক।”