ফারাকগিবা খাৎথা 15 - Garo New Testament

সাকস্নি সা·গ্রে আরো মিংস্নি সাবিসি

¹ জা·মানো সালগিও আংআ দা·আও গি·সা দাল·গিবা আরো আইয়াও ইনমানগিবা চিনখো নিকজক। নিকজক, সাকস্নি সা·গ্রে আরো বিসংনি জাক্কো বন·চতগিবা মিংস্নি সাবিসি। ইরাংখো বন·চতগিবা সাবিসি ইন্নে আগানিংআ, মুয়ানা ইরাংচা ইসলনি খা·আও নাংআবা বন·নুয়া।

² জা·মানো আংআ ওয়া·আলমিং ব্রিনগিবা জানিরানি গি·সা সাগাল গিত্তা দাক্কাখো নিকজক, আরো জেরাং উয়া মাৎবুরুং আরো বিনি বিমাং আরো বিনি বিমুংনি নম্বলনি সাক্কাও হামজক বিসংখোবা নিকজক। ইসলনি হন·গিবা বীণাখো জাক্কো রা·এ বিসং উয়া জানিরানি সাগালনি রিক্কামচা চাদেংএ দংআমিং।

³ বিসং ইসলনি নকখল মোশিনি আরো উয়া মেষ বি·সানি ইয়া গীতখো রিং·আমিং: “বিল্লাকস্রাংগিবা গিত্তেল ইসল, বাসিক দাল·লা আরো আইয়াও ইনমানা নাং·নি কাম! ও গিম্মিক জাতনি রাজা, নাং·নি রামা বাসিক খাকখেৎ আরো বিবি হং·আ!

⁴ গিত্তেল, সা নাং·না খেনজানুয়া? সা নাং·নি বিমুংখো রাসং চাএতজানুয়া? না·আসান রংথালা। গিম্মিক জাত নাং·চা রি·বানুয়া, গিম্মিকান নাং·খো অলাখিনুয়া; মুয়ানা নাং·নি খাকখেৎ বিচাল ফারাকজক।”

⁵ উনি জা·মানো আংআ নিকজক, সালগিও উয়া থরম নকখো, আগানস্খাওদে সাক্ষি তাম্বুখো এংআ হং·জক।

⁶ উনো উয়া সাকস্নি সা·গ্রে মিংস্নি সাবিসিখো রা·এ থরম নকচানি হং·খাতে রি·বাজক। বিসং চি·রংরং বা·রাখো গান্নামিং আরো চেলও সোনাচা খাথংআ দংআমিং।

⁷ উয়া সাকব্রি জাংগিগ্মাংগিবাওনি সাকসা উয়া সাকস্নি সা·গ্রেনা খানস্নি সোনানি দনচাক্রাখো হন·জক। ইসল, জেআন চাসংওনি চাসংওনা জ্রিংজ্রৎনা থাংএ দংআ, উয়া দনচাক্রারাং বিনি খা·আও নাংআও গাপ্পামিং।

⁸ ইসলনি রাসং আরো বিল্লাকাওনি জে ওয়াল·খু হং·খাতিংআমিং উয়া ওয়াল·খু থরম নক্কো গাপজক। উয়া সাকস্নি সা·গ্রেনি মিংস্নি সাবিসি বন·গিজা দিপ্পাৎ দারাংবা উয়া থরম নক্কো নাপনা মান·জাজক।