ফারাকগিবা খাৎথা 12 - Garo New Testament

উয়া মিচিক আরো দাল·বিয়া চিপ্পু স্খাল

¹ জা·মানো সালগিও মিংসা দাল·গিবা চিনখো নিকনা মান·জক- সাকসা মিচিক, জেনি গানদিংচিনদিং সালমিং আরো জা·চক কক্ষুমাও জাজং দংআমিং। রংচিগ্মি আস্কিচা থারিয়া গি·সা মুকুট বিনি স্খুও দংআমিং।

² বিয়া হা·ন্নোগ্মাংমিং আরো বি·সা বা·আনি সা·দিকানা চ্রিকিংআমিং।

³ জা·মানো সালগিও দা·আও মিংসা চিনখো নিকনা মান·জক- ওয়া·আল গিত্তা গিচ্চাকা মাংসা দাল·বিয়া চিপ্পু স্খাল। উনি দৎস্নি স্খু আরো চিখুং গ্রং, আরো স্খুরাংও গি·স্নি মুকুট দংআমিং।

⁴ বিনি খি·মিচা বিয়া সিলগানি বাক গিত্থামওনি বাকসা আস্কিখো সাল্লে রা·বাএ হা·গিলসাকচানা গোএতজক। জে মিচিকনি বি·সা হং·না হা·ম্মিংআমিং উয়া দাল·বিয়া চিপ্পু স্খাল বিনি মিকখাংও চাদেংআমিং জেদাক্কে বি·সা আৎচিয়ানি জা·মানোন বিয়া মিন্নকে গালনা মা·ন্না।

⁵ মিচিকনি সাকসা দেফান্থি হং·জক। উয়া দেফান্থিন সিলনি গল·দিকখো রা·এ গিম্মিক জাতখো শাসন দাকনুয়া। উয়া বি·সাখো ইসল আরো বিনি সিংহাসনচা দি·এ রা·জক,

⁶ আরো উয়া মিচিক হা·গিসি জওলচানা খাত্তাংজক। ইসল উয়া হা·গিসি জওলচানা বিনা গি·সা হা·দামখো থিক দাক্কে দন্নামিং জেদাক্কে হাজালসা রিৎচাগ্মি সৎদক সাল বিয়া উনো হালদুআখো মা·ন্না।

⁷ জা·মানো সালগিও দাকগ্রিকা হং·জক। মীখায়েল আরো বিনি নিং·আও দংগিবা সা·গ্রেরাং উয়া দাল·বিয়া চিপ্পু স্খাল আরো উনি সা·গ্রেরাংমুং দাকগ্রিকজক।

⁸ উয়া দাল·বিয়া চিপ্পু স্খাল হামজাজক আরো সালগিও বিসংখো দংনাবা হন·জাজক।

⁹ উনো উয়া দাল·বিয়া চিপ্পু স্খাল আরো বিমুং বিনি সা·গ্রেরাংখো হা·গিলসাকোনা গাল্লেতজক। ইয়া দাল·বিয়া চিপ্পু স্খাল হং·জক উয়া গিৎচাম চিপ্পু জেখো দিয়াবল বা শয়তান মিংআ। বিয়া হা·গিলসাকনি গিম্মিক মান্দিরাংখো ব্রাংগিবা রামাচা রা·আংআ।

¹⁰ জা·মানো আংআ সালগিওনি রাক্কে রাক্কে সাকসানি আগানাখো খিন্নাজক, “দা·আও জক্কেতা, বিল আরো আনচিংনি ইসলনি সংনক আরও বিনি খ্রীষ্টনি বিল সকবাজক, মুয়ানা জে আনচিংনি জংরাংখো দোস হ·ন্নুয়ামিং বিখো সালগিচাখো গাল্লেতজক। আনচিংনি ইসলনি মিকখাংও বিয়া সালওয়াল বিসংনি দোসখো ফিন্নিকনুয়ামিং।

¹¹ মেষ বি·সানি হান·চি আরো আন·থাংথাংনি সাক্ষিচা বিসং বিখো হাম্মেতজাজক। বিসং আন·থাংথাংনা বাং·এ খা·সাজানি হা·সেলান বিসংনি জাংগিখো হ·ন্না বিসং গং·আমিং।

¹² “উনি গিম্মিন ও সালগি, হান·সেংবো; না·সং জেরাং উনো দংআ, হান·সেংবো। ইন্দিবা হা·গিলসাক আরো সাগাল, হং·সিখানা না·সংনা! মুয়ানা শয়তান না·সংনি সাক্কাও হং·খাতে রি·বাজক। শয়তান খা·আওনাংজক, মুয়ানা বিয়া হা·আইয়া বিনি সময় বাং·এ দংজাজক।”

¹³ উয়া দাল·বিয়া চিপ্পু স্খাল জে সময়ও নিকজক, বিখো হা·গিলসাকচানা গাল্লেতজক উনো জে মিচিকনি বি·সা হং·আমিং উয়া চিপ্পু স্খাল বিমুং বোবিল দাকনা হা·বাচেংজক।

¹⁴ উনো উয়া মিচিকনা দাল·বিয়া মাংসা দো·রেংনি গি·গ্মি গ্রাংখো হন·জক জেদাক্কে বিয়া হা·গিসি জওলো বিনি হা·দামচা বিল্লে রি·য়াংনা মা·ন্না। উনো উয়া চিপ্পু স্খালনি নিকগিজাও বিলসি গিত্থাম জাদকনা বিয়া হালদুআখো মা·ন্নুয়া।

¹⁵ উনো উয়া দাল·বিয়া চিপ্পু স্খাল উয়া মিচিকনি জা·মানচা দংএ বিখো চিও সাল্লে রা·আংনা ইন্নে বিনি খু·সুকওনি চি রং·খাতে গি·সা চিবিমা থারিজক,

¹⁶ ইন্দিবা হা·গিলসাক উয়া মিচিকনা দাকচাকজক। উয়া চিপ্পু খু·সুকওনি জে চিখো রং·খাত্তেতজক হা·গিলসাক বিনি খু·সুকখো ওয়াংএ উখো রিংএ গালজক।

^17-18 উনো উয়া চিপ্পু মিচিকখো নাম্মেন খা·আওনাংজক; আরো উয়া মিচিকনি দংখুগিবা মান্দিরাং, আগানস্খাওদে জেরাং ইসলনি গি·য়েতাখো মানিয়া আরো যীশুনি স্খিয়াখো রি·ম্মে রা·রিকা বিসংনি সাক্কাও বিয়া দাকগ্রিকনা রি·য়াংজক আরো সাগালনি রিক্কামো চাদেংএ দংজক।