ফারাকগিবা খাৎথা 11 - Garo New Testament

সাকগ্মি সাক্ষি

¹ জা·মানো থয়ে নিগিবা গল·দিক গিত্তা দাক্কা গি·সা গল·দিকখো আংনা হন·জক আরো আগানজক, “থরম নকখো আরো গানচিখো থবো আরো জেরাং উনো ইসলখো অলাখিয়া বিসংখো চানবো।

² ইন্দিবা থরম নকনি হা·ফালও জে হা·থিলা দংআ, উখো দা·আ থোয়াবো, মুয়ানা উখো গিপ্পিন জাতরাংনা হন·জক। বিসং জাসৎব্রিগ্মি জারাং দিপ্পাৎ রংথালগিবা সংজিলমাখো জা·চকচা গা·বেলবেলনুয়া।

³ ইন্দিবা আংআ আংনি সাকগ্মি সাক্ষিনা ইন্দাকা বিলখো হ·ন্নুয়া জেনি গিম্মিনো বিসং সালা চটখো গান্নে হাজালসা রিৎচাগ্মি সৎদক সালনা দিপ্পাৎ আগানসোগিবা হং·এ খাৎথা আগান্নুয়া।”

⁴ উয়া সাকগ্মি সাক্ষি হং·জক জলপই বিফাং ফাংগ্মি আরো গাসা বলগ্মি, জেরাং হা·গিলসাকনি গিত্তেলনি মিকখাংও চাদেংএ দংআ।

⁵ সাবা বিসংনি নামগিজাখো দাকনা হা·ম্মোদে ইন্দিদে বিসংনি খু·সুকওনি ওয়া·আল হং·খাতে উয়া বোবিলরাংখো সো·এ গালনুয়া। জেআন বিসংখো নামগিজাখো দাকনা হাম·নুয়া বিখো ইন্দাকে সিনা নাংনুয়া।

⁶ ইয়া মান্দিরাং জে সালওনা দিপ্পাৎ আগানসোগিবা গিত্তা খাৎথা আগান্নুয়া উনোনা দিপ্পাৎ মিকখা ওয়াজাখানা উনি গিম্মিন সিলগাখো চিপচাংএ দন্নানি বিল বিসংনি দংনুয়া। চিখো হান·চি দাক্কানি আরো হা·সিক রামরাম শাস্তিরাংচা হা·গিলসাকনি নামগিজাখো দাক্কানি বিলবা বিসংনি দংনুয়া।

⁷ বিসংনি সাক্ষি হ·ন্না ব·ন্নানি জামানো উয়া থিং·নাপগিবা হা·খলওনি মাংসা মাৎবুরুং হং·খাতে রি·বাএ বিসংমুং দাকগ্রিকনুয়া আরো বিসংখো হাম্মে দকথাত্তে গালনুয়া।

⁸ বিসংনি গিত্তেলখো জে সংজিলমাও চিসলও দাৎখাপামিং উয়া দাল·বাৎগিবা সংজিলমানি রামাও বিসংনি মাংগিসি গা·আকে দংনুয়া। উয়া সংজিলমানি বিমুং চং·মতদে সদোম আরো মিসর হং·জা, ইন্দাকোবা উগিত্তান দাক্কা ইন্নে উয়া সংজিলমাখো সদোম আরো মিসর ইন্না।

⁹ উনো হা·সং গিম্মিক, মা·চং, খু·সুক আরো জাতওনি মান্দিরাং সাল গিত্থাম সাল ফাকসা দিপ্পাৎ উয়া মাংগিসিরাংখো নিনুয়া।

¹⁰ বিসং বিসংনি বে·এনরাংখো গোপনা হন·জানুয়া। বিসং সিজক ইন্নে জেরাং ইয়া হা·গিলসাকনি হং·আ বিসং খুসি হং·নুয়া আরো হান·সেংনুয়া। মান্দিরাং সাকসা সাকগিপ্পিননা বকসিস ওয়াত্তেতনুয়া, মুয়ানা জেরাং ইয়া হা·গিলসাকনি বিসং ইয়া সাকগ্মি আগানসোগিবারাংনি হা·সেল দুক মা·ন্নামিং।

¹¹ ইন্দিবা ইয়া সালগিত্থাম সালফাকসানি জা·মানো ইসলনি হন·গিবা বালজাংগি বিসংনি নিং·আও নাপজক। উনি হা·সেল বিসং জা·চকচা গা·চাক্কে চাদেংজক। উনো জেরাং বিসংখো নিকজক বিসং নাম্মেন খেনজক।

¹² জা·মানো উয়া সাকগ্মি সাক্ষি সালগিওনি রাক্কে ইয়া খাৎথাখো আগানাখো খিন্নাজক, “ইয়োনা চাখাতে রি·বাবো।” উনো বিসং বিসংনি বোবিলরাংনি মিক্রোনথাংওন খানসা গাদিলাও দাক্কে সালগিচানা গাদোয়াংজক।

¹³ উয়া সময়ও বিল্লংএ বাংগুরিজক আরো উয়া সংজিলমানি বাক চিকখুংনি বাকসা বি·গ্রপাংজক। উয়া বাংগুরিয়াও হাজালস্নি মান্দি সিথকজক। উনি গিম্মিন উয়ো দংগিবা গিম্মিকান খেন্নে সালগিনি ইসলখো রাসং দাকনা হা·বাচেংজক।

¹⁴ ইন্দাকে গ্মিগিবা হং·সিয়া বন·জক। নিবো, থেংরিন গিত্থামগিবা হং·সিয়া রি·বাংজক।

স্নিগিবা সিংগা

¹⁵ জা·মানো স্নিগিবা সা·গ্রে বিনি সিংগাখো সিকজক। উনো সালগিচা রাক্কে রাক্কে আগানা হং·জক, “হা·গিলসাকনি সংনক দা·আও আনচিংনি গিত্তেল আরো বিনি খ্রীষ্টনি হং·জক।

¹⁶ বিয়া ফাংনাজলনা শাসন দাকনুয়া।” জে সাক খলগ্রিকব্রি মি·আফারাং ইসলনি মিকখাংও বিসংনি সিংহাসননি মিকখাংও আসংএ দংআমিং বিসং থুগোপে ইসলখো অলাখিয়ে আগানজক,

¹⁷ “বিল্লাকস্রাংগিবা গিত্তেল ইসল, না·আ দংআ আরো না·আ দংআমিং। চিংআ নাং·খো মিৎথেলা, মুয়ানা না·আ নাং·নি দাল·গিবা বিলখো জাক্কো রা·এ শাসন দাকনা হা·বাচেংজক।

¹⁸ গিম্মিক জাত খা·আওনাংজক, আরো নাং·নি খা·আওনাংআখো ফিন্নিকানি সাল হং·জক। সিগিবারাংখো বিচাল দাক্কানি সাল সকবাজক, আরো নাং·নি নকখলরাংনি, আগানস্খাওদে আগানসোগিবারাংখো আরো নাং·নি মান্দিরাংখো আরো চন্না-দা·ল্লা গিম্মিকান জেরাং নাং·না খা·ফাকা বিসংনা বকসিস হ·ন্নানি সাল সকবাজক। ইনাআগ্রেবা জেরাং হা·গিলসাকনি নামগিজাখো দাক্কিংআ, বিসংখো ব·ন্নেতানি সালবা সকবাজক।”

¹⁹ জা·মানো সালগিনি থরম নকখো এংআ হং·জক আরো উনো ইসলনি নিয়াম সিন্দুকখো নিকজক। উনো মিকখা রিপরাপা আরো গাম·ফ্রেতা খু·রাং আরো মিকখা খিমফ্রেতা আরো বাংগুরিয়া আরো নাম্মেন স্থিল গা·আকনা হা·বাচেংজক।