ফারাকগিবা খাৎথা 1 - Garo New Testament

¹ ইয়া খি·তাপও জেরাংখো চক্কা হং·জক উরাংখো যীশু খ্রীষ্টআন ফারাকজক। ইয়া বিদিংরাংখো ইসল খ্রীষ্টচা ফারাকামিং, জেদাক্কে বাং·গিজা সালরাংনি গিসেপোন জেরাং হং·না রি·য়াংইংজক উখো বিয়া বিনি নকখলরাংনা আগানা। খ্রীষ্ট বিনি সা·গ্রেখো ওয়াত্তেতি বিনি নকখল যোহননা ইয়া বিদিংরাংখো আগানামিং।

² ইসলনি খাৎথা আরো যীশু খ্রীষ্টনি সাক্ষিনি গিম্মিনো যোহন জেখো নিক্কামিং, উনি বিদিংওন বিয়া ইনো সাক্ষি হন·জক।

³ ইসলনি খাৎথা জেখো ইনো চক্কা হং·জক, জেআন উখো পড়িয়া বিয়া ফাত্তিয়া মান·গিবা হং·আ আরো জেরাং উখো খিন্নাআ আরো মানিয়া বিসংবা ফাত্তিয়া মান·গিবা হং·আ, মুয়ানা সাল সেফাংজক।

সালাম হ·ন্না

^4-5 আংআ যোহন এশিয়া হা·দকনি গি·স্নি মন্ডলীচা চক্কিংজক। জেআন দংআ, জেআন দংআমিং আরো জেআন রি·বাংজক বিয়া আরো বিনি সিংহাসননি মিকখাংও জে সাকস্নি গিসিক দংআ বিসং আরো যীশু খ্রীষ্ট না·সংনা খা·সাচাকখানা আরো থম·থমাখো হন·খানা। যীশুআন বিবিগিবা সাক্ষি আরো সিয়াওনি বিয়ান স্খাং থাংচামিং আরো বিয়ান হা·গিলসাকনি রাজারাংখো শাসন দাকগিবা হং·আ। বিয়া আনচিংনা খা·সা আরো আন·থাংনি হান·চিচা পাপওনি আনচিংখো জক্কেৎজক।

⁶ বিয়া আনচিংখো রা·এ গি·সা সংনক থারিজক আরো বিনি ফাগিবা আরো ইসলনা দাকচাকে হ·ন্না খামাল দাকজক। ফাংনাজলনা যীশু খ্রীষ্টনি রাসং হং·খানা আরো ফাংনাজলনা বিনি বিল দংখানা। আমেন।

⁷ নিবো, বিয়া গাদিলাও দাক্কে রি·বাংজক। গিম্মিক মিক্রোন বিখো নিকনুয়া; জেরাং বিখো সু·আমিং বিসংবা নিকনুয়া আরো হা·গিলসাকনি গিম্মিক জাত বিনা রাক্কে রাক্কে গ্রাপনুয়া। ইন্দাকেন হং·খানা, আমেন।

⁸ গিত্তেল ইসল আগানিংজক, “আংআন উয়া আল্‌ফা আরো ওমিগা জেআন দংআ, জেআন দংআমিং আরো জেআন রি·বাংজক। আংআন বিল্লাকস্রাংগিবা।”

যোহন খ্রীষ্টখো নিকজক

⁹ আংআ না·সংনি জংআদা যোহন; যীশুমুং নাংরিমে আংআ না·সংমুং আপসান দুকখো, আপসান সংনকখো আরো আপসান চাকচিকানি বাকখো মান·ফাগিবা হং·জক। ইসলনি খাৎথা আরো যীশুনি সাক্ষিনি বিদিংও আগানফ্রাকামিং ইন্নে আংখো পাট্‌ম চিচাংচা রা·আংএ দন্নামিং।

¹⁰ গিত্তেলনি সালও আংআ মংসংএ গিসিক রংথালগিবানি নিং·আও দংআমিং। ইন্দাকমিত্তিংও আংনি খি·সাংচা সিংগানি গা·ম্মা গিত্তা সাকসানি গাম·বিয়া খু·রাংখো খিন্নাজক।

¹¹ বিয়া আংনা আগানজক, “জেখো নিকনুয়া উখো গি·সা খি·তাপও চকবো, আরো উখো ইফিষ, স্মূর্ণা, পর্গাম, থুয়াতীরা, সার্দ্দি, ফিলাদিল্‌ফিয়া আরো লায়দিকেয়া- ইয়া দামস্নি সংজিলমানি গি·স্নি মন্ডলীরাংচা ওয়াত্তেতবো।”

¹² খাৎথা আগানগিবাখো নিনা ইন্নে আংআ হান·ফিলজক আরো সোনানি বলস্নি গাসাখো নিকজক।

¹³ উয়া গাসারাংনি জাংচিও মান্দিনি দেফান্থি গিত্তা দাক্কা সাবা সাকসা দংআমিং। বিয়া জা·ফাওনা সক্কা রো·আ চলাখো গান্নামিং আরো বিনি চেলও সোনানি খাথংআ খাআ দংআমিং।

¹⁴ বিনি স্খুনি খিন্নি মেষনি খিম্মিল গিত্তা আরো বরফ গিত্তা বক্কামিং আরো বিনি মিক্রোন ওয়াল·স্রি গিত্তা দাক্কামিং।

¹⁵ বিনি জা·চক ওয়া·আলো সো·এ চি·রংএতগিবা নাম্মেন চিং·ব্রাপা পিতল গিত্তা দাক্কা, আরো বিনি খু·রাং থারাকে চি বালজকানি গা·ম্মা গিত্তা দাক্কামিং।

¹⁶ বিয়া বিনি জাক্রানি জাক্কো রংস্নি আস্কিখো রি·ম্মে রা·রিকামিং আরো বিনি খু·সুকোনি গি·সা মি·ল্লাম হং·খাতে রি·বাংআমিং জেনি সামগ্মিওন মাত্তা দংআমিং। বিনি মিকখাং-বিমাং সাল গিত্তান দাক্কামিং।

¹⁷ বিখো নিক্কে আংআ সিয়া গিত্তা বিনি জা·চকনি কেচ্চিও গা·আকাংআরিজক। উনো বিয়া বিনি জাক্রা জাকখো আংনি সাক্কাও দন্নে আগানজক, “দা·আ খেন্নাবো। আংআন স্খাংগিবা আরো বন·চতগিবা,

¹⁸ আংআন ফাংনাজলনা থাংগিবা। আংআ সিয়ামিং, আরো নিবো, দা·আও আংআ চাসংওনি চাসংওনা ফাংনাজলনা থাংএ দংআ। আংচা সিয়ানি আরো সিগিবা হা·দামনি চাবি দংআ।

¹⁹ ইনি গিম্মিন না·আ জেখো নিকজক, দা·আও জেরাং হং·ইংজক আরো ইরাংনি জা·মানো জেরাং হং·নুয়া উরাংখো চক্কে দনবো।

²⁰ জে বলস্নি সোনানি গাসাখো আরো আংনি জাক্রা জাক্কো জে রংস্নি আস্কিখো না·আ নিকজক উনি নিং·থুয়া অর্থ ইয়ান- উয়া রংস্নি আস্কি হং·জক গি·স্নি মন্ডলীনি সাকস্নি সা·গ্রে আরো বলস্নি গাসা হং·জক উয়া গি·স্নি মন্ডলী।