মার্ক 14 - Garo New Testament

যীশুনি স্খুও সিম্মিলগিবা তেলখো রুদাপা

¹ ওয়াতচাংআনি আরো ওয়ানথিগ্রি রুটি চা·আনি সালনা উনো সালগ্মিসান দংখুআমিং। খামাল দাল·গিবারাং আরো শাস্ত্র স্খিগিবারাং সিউল সিউল যীশুখো রি·ম্মে স·ওতে গালনা চল সান্দিংআমিং।

² বিসং আগানজক, ‘‘ওয়াতচাংআনি সালো হং·জা, মান্দিরাংও গোলমাল হং·নাবা দংআ।’’

³ যীশু উনো বৈথনিয়াচা খনচিরিত্তামগিবা শিমোননি নক্কো দংআমিং। যীশুনি চা·মিত্তিংও মিচিক সাকসা গামচাৎগিবা সিম্মিলগিবা তেলখো গি·সা গিব্বক রং·থিনি দনচাক্রাও দন্নে রা·বাজক। দনচাক্রাখো ফি·এ বিয়া যীশুনি স্খুও উয়া তেলখো রুদাপজক।

⁴ উনো জেরাং দংআমিং বিসংনি গিসেপো মিত্তামরাং নাম্মেন নামনিকজায়ে সাকসা সাকগিপ্পিননা আগানজক, “তেলখো ইন্দাকে মুয়ানা নাসিয়েতজক?

⁵ ইখো ফাল্লোদে দীনার রিৎচাগিত্থামনিবা বাং·এ হং·নুয়ামিং আরো উখো দিলগিবারাংনা হ·ন্না মা·ন্নুয়ামিং।’’ ইখো আগানে বিসং উয়া মিচিকসাখো খা·চাজক।

⁶ উনো যীশু আগানজক, ‘‘স্রক দংবো, মুয়ানা না·সং বিনি গিসিকখো সা·দিকেতিংআ? বিয়াদে আংনা নাম্মা কামখোন দাকজক।

⁷ দিলগিবারাং না·সংমুং ফাংনানান দংখামা, আরো জেনসালো না·সং বিসংনা দাকচাকনা হা·সিকনুয়া উনোন দাকচাকনা মা·ন্নুয়া, ইন্দিবা আংখো না·সং ফাংনানান মান·জানুয়া।

⁸ বিয়া জেখো দাকনা মান·জক উখো দাকজক। আংখো গোপরামচা দন্না বিয়া স্খাংখাংআরি আংনি বে·এনো তেলখো রুদাপজক।

⁹ বিবিন আংআ না·সংনা আগানিংআ, হা·গিলসাকনি জেও জেও ইসলনি হন·গিবা নাম্মা খাৎথাখো আগানফ্রাকনুয়া, উনো ইয়া মিচিকনি খাৎথাখো গিসিক রা·এতনা ইন্নে বিনি ইয়া কামনি খাৎথাখোবা আগানা হং·নুয়া।’’

¹⁰ উনি জা·মানো ইষ্কারিয়োত যিহূদা মিংগিবা উয়া সাকচিগ্মি জা·রিকগিবারাংওনি সাকসা যীশুখো রি·ম্মে হ·ন্না খামাল দাল·গিবারাংচা রি·য়াংজক।

¹¹ যিহূদানি খাৎথাখো খিন্নাএ খামাল দাল·গিবারাং খুসি হং·জক আরো বিনা থাংখা হ·ন্না খু·রাচাকজক। উনোন যিহূদা যীশুখো রি·ম্মে হ·ন্না চল সান্দিনা হা·বাচেংজক।

বন·খামগিবা ওয়াতচাংআনি চা·আ

¹² ওয়ানথিগ্রি রুটি চা·আনি স্খাংগিবা সালো ওয়াতচাংআনি চা·না মেষ বি·সাখো দে·ন্নুয়ামিং। উনি গিম্মিন জা·রিকগিবারাং যীশুখো সিং·জক, ‘‘নাং·না ওয়াতচাংআনি চা·আনিখো বানো রি·য়াংএ থারিনা চিংখো আগানিংআ?’’

¹³ উনো যীশু বিনি সাকগ্মি জা·রিকগিবাখো ইন্দাকে আগানে ওয়াত্তেতজক, ‘‘না·সং সংজিলমাওনা রি·য়াংবো। উনো মি·আসা সাকসাখো গিম্বিও দাক্কে চি রা·আংআখো নিকনা মা·ন্নুয়া। না·সং বিনি জা·মান জা·মান রি·য়াংবো।

¹⁴ বিয়া জে নক্কো নাপনুয়া উয়া নকনি নকগিবানা আগানবো, ‘স্খিগিবা আগানিংআ, জা·রিকগিবারাংমুং জেও আংআ ওয়াতচাংআনি চা·আনিখো চা·না মা·ন্না আংনি উয়া নকদ্রিং বানো?’

¹⁵ বিয়া উনো না·সংনা গাদাং সাক্কানি থারিয়ে দনগিবা দা·ল্লা নকদ্রিংখো ফিন্নিকেতনুয়া। উনোন দিমদাকখো থারিসোবো।’’

¹⁶ উনোন জা·রিকগিবারাং রি·য়াংএ সংজিলমাওনা নাপজক, আরো যীশুনি আগানেতা গিত্তা দিমদাকখো নিকনা মান·জক আরো ওয়াতচাংআনি চা·আনিখো থারিসোজক।

¹⁷ হান·থামানি জা·মানো যীশু উয়া সাকচিগ্মি জা·রিকগিবারাংখো রা·এ উয়োনা রি·য়াংজক।

¹⁸ বিসং আসংএ চা·মিত্তিংও যীশু আগানজক, ‘‘বিবিন আংআ না·সংনা আগানিংআ, না·সংনি গিসেপো সাকসা আংখো বোবিলনি জাক্কো রি·ম্মে হ·ন্নুয়া, আরো বিয়া আংমুং দা·আও চা·ফাংআ।’’

¹⁹ জা·রিকগিবারাং উনি হা·সেলো গিসিকো দুক মান·জক আরো সাকফ্রাক সাকফ্রাক বিচা সিং·না হা·বাচেংজক, ‘‘উয়া আংআনমা, গিত্তেল?’’

²⁰ যীশু বিসংনা আগানজক, ‘‘বিয়া ইয়া সাকচিগ্মিওনি সাকসা, আংমুং চা·চাকানিও রুটিখো সিম·বলগিবা।

²¹ মান্দিনি দেফান্থিনি সিয়ানি গিম্মিনো রংথালগিবা শাস্ত্রও জেদাক্কে চক্কা দংআ উয়ানদাক্কে বিয়া সিনুয়া, ইন্দিবা দা·নাং, উয়া মান্দি, জে মান্দি বিখো বোবিলনা রি·ম্মে হ·ন্না! বিয়া আৎচিজাওন বাত্তেসা বিনা নামবাতনুয়ামিং।’’

²² চা·মিত্তিংও যীশু রুটিখো রা·এ ইসলখো মিৎথেলজক আরো উখো ফি·এ জা·রিকগিবারাংনি জাক্কো হ·ন্নে আগানজক, ‘‘ইয়া রা·বো, ইয়া আংনি বে·এন।’’

²³ উনি জা·মানো বিয়া রিংচাকানিখো রা·এ ইসলখো মিৎথেলজক আরো জা·রিকগিবারাংনা হন·জক। বিসং দিমদাকান উয়া রিংচাকানিখো রিংজক।

²⁴ উনো যীশু বিসংনা আগানজক, ‘‘ইয়া আংনি হান·চি জেখো বাং·আরাংনা হ·ন্নুয়া। আংনি ইয়া হান·চিচান মান্দিনা হন·গিবা ইসলনি গিত্তাল খু·রাচাক্কাখো রা·রিকনুয়া।

²⁵ বিবিন না·সংনা আগানিংআ, ইসলনি সংনক্কো আংগুর বিৎচিখো গিত্তাল দাক্কে দা·আবা রিংখুজানা দিপ্পাৎ আংআ উখো রিংজানুয়া।

²⁶ উনি জা·মানো মিংসা গীতখো রিং·এমুং জৈতুন হা·ব্রিওনা রি·য়াংজক।

পিতরনি জিচাকাখো আগানসোআ

²⁷ যীশু বিনি জা·রিকগিবারাংনা আগানজক, ‘‘আংখো রা·এ না·সংনি দিমদাকনি গিসিকো জাব্রাংনুয়া। রংথালগিবা শাস্ত্রও চক্কা দংআ, ‘আংআ রাক্ষুয়ালখো স·ওতে গালনুয়া, উনোন মেষরাং বিলদিং বিলদাং হং·নুয়া।’

²⁸ ইন্দাকোবা আংআ সিয়াওনি থাংচাফিল্লানি জা·মানো না·সংনা স্খাংআন গালীলচানা রি·য়াংনুয়া।’’

²⁹ উনো পিতর আগানজক, “গিম্মিকনি গিসিকো জাব্রাংওবা আংনি গিসিকো জাব্রাংজানুয়া।’’

³⁰ যীশু বিনা আগানজক, ‘‘আংআ নাং·না বিবিন আগানিংআ, দা·আল ফ্রিংওয়াল্লো দো·ও রাং·গ্মি গিসিকনা স্খাংআন না·আ রাং·গিত্থাম আংখো হা·আইজা ইন্নে জিচাকনুয়া।’’

³¹ ইন্দিবা পিতর আরোসা রাক্কেন আগানজক, ‘‘আংখো নাং·মুং সিফানা নাংওবা আংআ নাং·খো হা·আইজা, ইন্নে মামুং সালোবা জিচাকজানুয়া।’’ জা·রিকগিবারাং গিম্মিকান উয়ানদাক্কে আগানজক।

গেৎশিমানী বাগানো যীশু

³² উনি জা·মানো যীশু আরো বিনি জা·রিকগিবারাং গেৎশিমানী মিংগিবা হা·দামওনা রি·য়াংজক। উয়োনা যীশু বিনি জা·রিকগিবারাংনা আগানজক, ‘‘আংনি বি·মিত্তিংও না·সং ইনো আসংএ দংবো।’’

³³ ইখো আগানে বিয়া পিতর, যাকোব আরো যোহনখো আন·থাংমুং রিম্মাংজক আরো গিসিকো নাম্মেন সা·দিকা আরো দুক মা·ন্না হা·বাচেংজক।

³⁴ বিয়া বিসংনা আগানজক, ‘‘দুকনি গিম্মিন আংনি জাংগি হং·খাতাংনা গিত্তিক দাক্কিংজক। না·সং ইনো মিকরাকে দংবো।’’

³⁵ উনি জা·মানো বিয়া অকখিসা চে·ল্লাওনা রি·য়াংএ হা·আও থুগপে বি·জক জেদাক্কে মা·ন্নোদে ইয়া দুকনি সাল বিচানি চে·ল্লাংআ।

³⁶ বিয়া আগানজক, ‘‘আব্বা, আপফা, না·আ গিম্মিকখোন হা·ম্মা। আংচানিখো দুকনি ইয়া রিংচাকানিখো রা·আংবো। ইন্দাকোবা আংনি হা·সিকা গিত্তা হং·জা, ইন্দিবা নাং·নি হা·সিকা গিত্তা হং·খানা।’’

³⁷ উনি জা·মানো বিয়া জা·রিকগিবারাংচা রি·বাফিল্লে বিসংনি থুয়ে দংআখো নিকজক। পিতরনা বিয়া আগানজক, ‘‘শিমোন, না·আ থুংআমা? ঘণ্টাসা মা·মাংবা না·আ মিকরাকে দংনা মান·জাজকমা?

³⁸ মিকরাকে দংবো আরো বি·বো জেদাক্কে না·সং রুরাও গা·আকজা। গিসিকোদে হা·সিকবিবিয়া, ইন্দিবা বে·এন বিলগ্রি।”

³⁹ জা·মানো যীশু রি·য়াংফিল্লে উয়া আপসান খাৎথাখোন আগানে বি·জক।

⁴⁰ ফিল·বায়ে বিয়া দা·আবা বিসংনি থুয়ে দংআখো নিকনা মান·জক, মুয়ানা বিসংনি মিক্রোন জ্রিমবিয়ামিং। জা·রিকগিবারাং যীশুনা বাদিকে আগানচাকনুয়া উখো হা·আইজাজক।

⁴¹ রাং·গিত্থামগিবাও রি·বাএ বিয়া বিসংনা আগানজক, ‘‘দা·আওবা না·সং থুয়ে দংআ আরো নেং·থাকিংআ? বাং·এন হং·জক। সাল সকবাজক। নিবো, মান্দিনি দেফান্থিখো দা·আও পাপীরাংনি জাক্কো রি·ম্মে হ·ন্নিংজক।

⁴² চাখাতবো, আনচিং রি·নাজক। আংখো বোবিলনি জাক্কো রি·ম্মে হন·গিবা সেফাংও রি·বাজক।’’

বোবিলরাংনি জাক্কো গিত্তেল যীশু

⁴³ যীশু উনোবা খাৎথা আগানিংআমিং, উয়া সময়ও যিহূদা উয়োনা রি·বাজক। বিয়া উয়া সাকচিগ্মি জা·রিকগিবারাংওনি গিসেপো সাকসামিং। বিমুং বাং·এ মান্দিন মি·ল্লাম আরো মাংগতখো রা·এ রি·বাজক। খামাল দাল·গিবারাং, শাস্ত্র স্খিগিবারাং আরো মি·আফারাং ইয়া মান্দিরাংখো ওয়াত্তেতামিং।

⁴⁴ যীশুখো জে বোবিলনি জাক্কো রি·ম্মে হ·ন্নামিং বিয়া উয়া মান্দিরাংনা গি·সা চিনখো হ·ন্নে দন্নামিং। বিয়া আগানামিং, “জেখো আংআ খু·দিমনুয়া, বিয়ান উয়া মান্দি। না·সং বিখোন রিম·বো আরো নাম্মেদাক্কে নিথিমে রিম্মাংবো।’’

⁴⁵ উনি গিম্মিন যিহুদা বিক্‌বিক্‌ রি·বারিন যীশুখো, ‘‘স্খিগিবা!’’ ইখো আগানে খু·দিমজক।

⁴⁶ উনোন উয়া মান্দিরাং যীশুখো রিম·জক।

⁴⁷ জেরাং যীশুনি সেফাংও চাদেংএ দংআমিং বিসংনি গিসেপো সাকসা বিনি মি·ল্লামখো রং·খাতজক আরো খামাল দাল·বাৎগিবানি নকখলখো দিংএ বিনি নাচিলখো দেন·ফাকজক।

⁴⁸ যীশু উয়া মান্দিরাংনা আগানজক, ‘‘মি·ল্লাম আরো মাংগতখো রা·এ না·সং আংখো রিম·না রি·বাজক, আংআ ডাকাতমা?

⁴⁹ আংআদে ফাংনাজ্রিংআন না·সংমুং দংএ থরম নক্কো না·সংনা স্খিয়ামিং, ইন্দিবা উনোদে না·সং আংখো রিম·জাজক। ইন্দিবা শাস্ত্রনি খাৎথারাং চু·সকনা নাংনুয়া।’’

⁵⁰ উনোন গিম্মিক জা·রিকগিবারাং বিখো ওয়াতগাল্লে খাত্তাংথকজক।

⁵¹ ফান্থি সাকসা বা·রা চাদলখোসান চিনগোপে যীশুনি জা·মান জা·মান রি·য়াংআমিং।

⁵² মান্দিরাং বিখো রি·ম্মোন বিয়া চিনগিবা বা·রা চাদলখো গোগাল্লে খমলং দাক্কে খাত্তাংজক।

দাল·বাৎগিবা খ্রিমানি মিকখাংও যীশু

⁵³ উয়া মান্দিরাং যীশুখো রা·এ খামাল দাল·বাৎগিবাচা রি·য়াংজক। উয়োনা খামাল দাল·গিবারাং, মি·আফারাং আরো শাস্ত্র স্খিগিবারাং উনসান থম·দাকজক।

⁵⁴ পিতর চেল·গ্রিকে দংএ যীশুখো জা·রিকফায়ে খামাল দাল·বাৎগিবানি হা·থিলাচা রি·য়াংএ নাপজক। উয়োনা বিয়া নিথিমগিবারাংমুং আসংএ ওয়া·আল চাকনা হা·বাচেংজক।

⁵⁵ খামাল দাল·গিবারাং আরো দাল·বাৎগিবা খ্রিমানি গিম্মিক মান্দিরাং যীশুখো স·ওতে গালনা ইন্নে বিনা চাকগিজা বিনি সাক্কাও সাক্ষি হ·ন্না সান্দিংআমিং, ইন্দিবা বিসং মামুং সাক্ষিখোন মান·জাজক।

⁵⁶ যীশুনি সাক্কাও বাং·এন বু·এ সাক্ষি হ·ন্নামিং ইন্দিবা বিসংনি সাক্ষিরাং আপসান হং·গ্রিকজাজক।

⁵⁷ উনোন মিত্তামরাং চাখাত্তে বিনি সাক্কাও বু·এ ইয়া সাক্ষিখো হন·জক,

⁵⁸ ‘‘চিংআ বিনি ইন্দাকে আগানাখো খিন্নানা মা·ন্না, ‘মান্দিনি রিকগিবা ইয়া থরম নকখো আংআ ফি·রুরুয়ে গালনুয়া আরো সালগিত্থামনি গিসেপো ইন্দাকগিবা গি·সা থরম নকখো রিকফিলনুয়া জেআন মান্দিনি রিকগিবা হং·জা।’ ’’

⁵⁹ ইন্দিবা বিসংনি সাক্ষি আপসান হং·গ্রিকজাজক।

⁶⁰ উনোন খামাল দাল·বাৎগিবা দিমদাকনি মিকখাংও চাদেংএ যীশুখো সিং·জক, ‘‘না·আ মামুংখোবা আগানচাকজানুয়ামা? নাং·নি সাক্কাও ইয়া মান্দিরাং বাদাকগিবা সাক্ষিখো হ·ন্নিংজক?’’

⁶¹ ইন্দিবা যীশু মামুংখো আগানচাকগিজা জ্রিপ্‌জ্রিপ্‌ দংজক। খামাল দাল·বাৎগিবা দা·আবা বিখো সিং·ফিলজক, ‘‘না·আন মিৎথেলা মান·গিবা ইসলনি দেফান্থি খ্রীষ্টমা?’’

⁶² যীশু আগানজক, ‘‘আংআন উয়া। না·সং বিল্লাকবাৎগিবা ইসলনি জাক্রাচা মান্দিনি দেফান্থিখো আসংএ দংআখো নিকনুয়া আরো সিলগানি গাদিলাও দাক্কে রি·বাখো নিকনা মা·ন্নুয়া।’’

⁶³ উনি গিম্মিন খামাল দাল·বাৎগিবা বা·রাথাংখো চিত্তে আগানজক, ‘‘আনচিংনা ইনা আগ্রে আরোবা মুয়া সাক্ষিখো নাংখুনুয়া?

⁶⁴ না·সংদে খিন্নাজকান, বিয়া ইসলখো চন্নিকজক। না·সং বাদিকে চানচিংআ?’’ বিসং গিম্মিকান যীশুনা সিয়ানি শাস্তিখো হ·ন্নান খ্রাআ ইন্নে ইনথকজক।

⁶⁵ উনো মিত্তামরাং বিনি বে·এনো খু·চিদাপজক আরো বিনি মিকখাংখো খাতিপ্পে জাকথমে দক্কে আগানজক, ‘‘না·আন আগানসোগিবামা? মামুংখো আগানবো!’’ উনি জা·মানো নিথিমগিবারাং বিখো রা·আংএ দকনা হা·বাচেংজক।

যীশুখো পিতরনি জিচাকা

⁶⁶ পিতর খা·মানি হা·থিলাও দংমিত্তিংও দাল·বাৎগিবা খামালনি সাকসা নকখল মিচিক উয়োনা রি·বাজক।

⁶⁷ বিয়া পিতরনি ওয়া·আল চাক্কে দংআখো নিকজক আরো নাম্মেদাক্কে বিচা নিএ আগানজক, ‘‘না·আবা উয়া নাসরতনি যীশুমুং দংআমিং।’’

⁶⁸ ইন্দিবা পিতর জিচাকে আগানজক, ‘‘নাং·নি আগানাখো আংআ হা·আইজা, মা·সিজা।’’ ইখো আগানে পিতর হা·ফালনি দ·গাচিলোনা রি·য়াংজক, আরো উনোন দো·ও গিসিকজক।

⁶⁹ উয়া নকখল মিচিক পিতরখো উয়োনা নিক্কে উনো চাদেংএ দংগিবারাংনা আগানজক, ‘‘ইয়া মান্দিবা বিসংনি সাকসা।’’

⁷⁰ পিতর দা·আবা জিচাকজক। সেফাংও চাদেংএ দংগিবারাংবা অকখিসা জা·মানো পিতরখো আগানজক, ‘‘না·আবা বিসংনি সাকসা হং·বিবিআন, মুয়ানা না·আদে গালীলনি মান্দি হং·আ।’’

⁷¹ পিতর উনো আন·থাংখো শাপ হন·জক আরো মিকচেতি আগানজক, ‘‘না·সং জেখো আগানিংআ আংআ বিখো হা·আইজা।’’

⁷² উনোন রাং·গ্মিনা দো·ও গিসিকজক। যীশু আগানামিং, ‘‘দো·ও রাং·গ্মি গিসিকনা স্খাংআন না·আ আংখো রাং·গিত্থাম জিচাকনুয়া,’’ উয়া খাৎথাখো পিতর উনো গিসিক রা·জক। উনি গিম্মিন বিয়া খা·থং বি·এ গ্রাপজক।