মার্ক 13 - Garo New Testament

বন·খামগিবা চাসংনি সালরাং

¹ যীশু থরম নকনি হং·খাতে রি·য়াংমিত্তিংও বিনি সাকসা জা·রিকগিবা বিচা রি·বাএ আগানজক, ‘‘স্খিগিবা, নিবো, বাসিক দা·ল্লা দা·ল্লা রং·থি, আরো নকরাং বাদাকফিল্লে নিথুয়া!’’

² যীশু বিনা আগানজক, ‘‘না·আদে ইন্দাকা দাল·দালগিবা নকরাংখো নিক্কিংআ, ইন্দিবা ইনি রং·থি গি·সানি সাক্কাও রং·থি গি·সাবা দংজানুয়া, গিম্মিকখোন ফি·এ গালনুয়া।’’

³ জা·মানো যীশু থরম নকনি মিকখাংচা জৈতুন হা·ব্রিনি সাক্কাও আসংএ দংমিত্তিংও পিতর, যাকোব, যোহন আরো আন্দ্রিয় বিখো সিউল দাক্কে সিং·জক,

⁴ ‘‘না·আ চিংনা আগানবো, ইরাং বাসোকো হং·নুয়া? বাগিবা চিনখো নিক্কে চিংআ হা·আইনা মা·ন্নুয়া ইরাং চু·সকনা সাল সকবাজক?’’

⁵ যীশু বিসংনা আগানজক, ‘‘নিবো, জেদাক্কে না·সংখো দারাংবা ব্রাংএতনা মান·জা।

⁶ বাং·আন আংনি বিমুংও রি·বাএ আগান্নুয়া, ‘আংআন উয়া’ আরো বাং·আ মান্দিখোন ব্রাংএতনুয়া।

⁷ জেনসালো না·সং দাকগ্রিকানি খু·রাংখো আরো দাকগ্রিকানি খাৎথারাংখো খিন্নানুয়া উনসালো দা·আ জাজ্রেংআবো। ইরাং হং·নুয়ান, ইন্দিবা উনোবা বন·খামানি হং·খুজা।

⁸ জাতসা জাতগিপ্পিনমুং, হা·সংসা হা·সং গিপ্পিনমুং দাকগ্রিকনুয়া। বাং·আ হা·দামরাংচান বাংগুরিনুয়া আরো আকাল হং·নুয়া। ইন্দিবা ইরাংদে দুক মা·ন্না হা·বাচেংআসান।

⁹ ‘‘না·সং আন·থাংথাংনি গিম্মিনো সিমসাকবো। মান্দিরাং না·সংখো বিচাল দাকগিবারাংনি জাক্কো রি·ম্মে হ·ন্নুয়া আরো থম·দাকরামো দকনুয়া। আংনি গিম্মিন না·সংখো হা·সংনি শাসন দাকগিবা আরো রাজারাংনি মিকখাংও চাদেংনা নাংনুয়া। বিসংনি মিকখাংও আংনি গিম্মিনো না·সংনি সাক্ষি হ·ন্না নাংনুয়া।

¹⁰ গিম্মিক জাতরাংচা স্খাং ইসলনি হন·গিবা নাম্মা খাৎথাখো আগানফ্রাকনা নাংনুয়া।

¹¹ জেনসালো না·সংখো বিচাল দাকনা রি·ম্মে রা·আংনুয়া উনসালো মুয়াখো আগান্না নাংনুয়া উখো স্খাংখাংআরি দা·আ চানচিয়াবো। উনসালো জেখো না·সংনা আগানে হ·ন্নুয়া উখোন না·সং আগানবো, মুয়ানা না·সংসান আগান্নুয়া ইয়াদে হং·জা ইন্দিবা গিসিক রংথালগিবান খাৎথা আগান্নুয়া।

¹² ‘‘জংআদা জংআদাখো, ফাগিবা দেগিবাখো স·ওতে গালখানা রি·ম্মে হ·ন্নুয়া। দেদ্রাং আন·থাংথাংনি মা·আ-ফানি সাক্কাও চাখাত্তে বিসংখো স·ওতেতনুয়া।

¹³ আংনি গিম্মিন দিমদাকান না·সংখো মিৎচিনুয়া, ইন্দিবা জে বন·খামাওনা দিপ্পাৎ চাকচিকনুয়া বিয়ান জকনুয়া।

¹⁴ ‘‘বন·গিম্মিকেতগিবা মিৎচিয়ানি বস্তু জেও দংনা খ্রাজা, না·সং জেনসালো উয়ো উখো নিকনুয়া-পড়িগিবা হা·আইখানা-উনোন যিহূদিয়াও দংগিবারাং হা·ব্রিরাংওনা খাত্তাংখানা।

¹⁵ নকনি সাক্কাও দংগিবা মামুংখো রা·না খা·মাচা হং·ওনে নকনিংওনা নাপজাখানা।

¹⁶ হা·বাও দংগিবা আন·থাংনি বে·এননি বা·রাখো রা·না ফি·ল্লাংজাখানা।

¹⁷ উনো হা·ন্নোগ্মাংগিবারাং আরো বি·সানা সক খানগিবারাংনি অবস্থা বাদাকফিল্লেন বিল্লংনুয়া!

¹⁸ বি·বো জেদাক্কে ইন্দাকারাং সিন·খারিও হং·জাখানা,

¹⁹ মুয়ানা উয়া সালরাংও ইন্দাকফিল্লে দুক হং·নুয়া, হা·গিলসাকখো দাকচেংওনি দা·আওনা দিপ্পাৎ ইন্দাকে হং·খুজা আরো উনি জা·মানোবা হং·জানুয়া।

²⁰ গিত্তেল উয়া সালরাংখো খান·দকেতজাওদে সাকসাবা থাংজানুয়ামিং। ইন্দিবা ইসল বিনি বাচ্ছিগিবা মান্দিরাংনা উয়া সালরাংখো খান·দকেতজক।

²¹ উনো সাবা না·সংখো, ‘নিবো, খ্রীষ্ট ইনো,’ বা ‘নিবো, খ্রীষ্ট হাইওয়ানো,’ ইন্নে আগানোদে না·সং দা·আ বিবিরা·বো;

²² মুয়ানা খ্রীষ্ট দাক্কে বু·এ চা·গিবারাং আরো আগানসোগিবা দাক্কে বু·এ চা·গিবারাং রি·বানুয়া আরো বাং·এ আইয়াও ইনমানানি কামরাংখো দাকনুয়া, জেদাক্কে ইসলনি বাচ্ছিগিবা মান্দিরাংখো মা·ন্নোদে ব্রাংএতনা মা·ন্না।

²³ ইন্দিবা না·সং সিমসাকে দংবো। আংআ না·সংনা দিমদাকখোন স্খাংখাংআরি আগানে দন্নিংজক।

²⁴ ‘‘উয়া সালনি দুক মা·ন্নানি জা·মানোন সাল আন্দালনুয়া, জাজংবা থেং·সুুজানুয়া,

²⁵ আস্কিরাংবা সিলগা সাক্কাচানি থাকওয়াতে গা·আকবানুয়া আরো জাজং-সাল-আস্কি ইরাং থম·থমে দংজানুয়া।

²⁶ উনোন মান্দিরাং মান্দিনি দেফান্থিখো বাং·আ বিল আরো রাসংখো রা·এ গাদিলাও দাক্কে হা·গিলসাকোনা রি·বাখো নিকনা মা·ন্নুয়া।

²⁷ বিয়া আন·থাংনি সা·গ্রেরাংখো হা·গিলসাকনি খি·থিকোনা ওয়াত্তেতি হা·গিম্মিকচানিখো ইসলনি গিম্মিক বাচ্ছিগিবা মান্দিরাংখো থম·চিম্মংনুয়া।

²⁸ ‘‘ডুমুর বিফাংওনিখো স্খিয়ে রা·বো। জেনসালো উনি ডালারাং বিজাক সকসলে ওয়াতবাআ উনোন দিং·খারি সকবাজক ইন্নে না·সং হা·আইনা মা·ন্না।

²⁹ উয়ানদাক্কে জেনসালো না·সং ইরাং হং·আখো নিকনুয়া উনোন হা·আইনা মা·ন্নুয়া, মান্দিনি দেফান্থি সেফাংও রি·বাজক, আরোবা দ·গাচিলোনা সকবাজক।

³⁰ আংআ বিবিন না·সংনা আগানিংআ, জেনসালো ইরাং হং·নুয়া ইয়া চাসংনি মিত্তাম মান্দিরাং উনোবা থাংএ দংখুনুয়া।

³¹ সিলগা আরো হা·গিলসাক ব·ন্নাংনুয়া ইন্দিবা আংনি খাৎথারাং ফাংনাজলনা দংনুয়া।

মান্দিনি দেফান্থি বাসোকো রি·বানুয়া?

³² ‘‘উয়া সাল আরো উয়া সময়নি খাৎথাখো দারাংবা হা·আইজা-সালগিনি সা·গ্রেরাংবা হা·আইজা, দেফান্থিবা হা·আইজা, ফাগিবাসান হা·আইয়া।

³³ না·সং সিমসাকবো, মিকরাকবো আরো বি·বো, মুয়ানা উয়া সাল বাসোকো রি·বানুয়া উখো না·সং হা·আইজা।’’

³⁴ উয়া সাল সকবানুয়া ইন্দাকগিবা মান্দি গিত্তা জে মান্দি আন·থাংনি নকখো দন্নে হা·সং গিপ্পিনচা রি·য়াংজক। নকখো ওয়াত্তে রি·য়াংনা স্খাং নকখলরাংচা বিয়া নকখো রাক্ষিনা দন্নাংজক। নকখল সাকফ্রাক ফ্রাকনা বিয়া কামরাংখো দন্নাংজক আরো দ·গাচিলো দংখামগিবাখো মিকরাকে দংখানা আগানাংজক।

³⁵ ‘‘না·সংবা ইন্দাকে মিকরাকে দংবো, মুয়ানা নকগিবা হান·থামও, বা ওয়ালজাৎচিও, বা ওয়াল সেং·না হা·ম্মো, বা ফ্রিংওন রি·বানুয়ামা উখো না·সং হা·আইজা।

³⁶ জেদাক্কে বিয়া রাং·গিত্তিক রি·বাএ না·সংনি থুয়ে দংআখো নিকনা মান·জা।

³⁷ আরো আংআ জেখো না·সংনা আগানিংআ উখো গিম্মিকনান আগানিংআ, মিকরাকে দংবো।’’