মার্ক 12 - Garo New Testament

আংগুর বাগাননি গামগিবারাংনি গল্প

¹ উনি জা·মানো যীশু গল্পচা থয়ে স্খিনা হা·বাচেংজক। বিয়া আগানজক, ‘‘সাকসা মান্দি আংগুর বাগানখো দাক্কে উনি দিমদাক গিত্তা বেড়া দিম·জক। জা·মানো আংগুর বিৎচিখো চিম্মংএ রা·রিকনা হা·খল খলসা খিতজক আরো উখো রাক্ষিনা গি·সা চুয়াকগিবা বরাং নকখো রিকজক। জা·মানো বিয়া মিত্তাম গামগিবাচা উয়া বাগানখো নিরকখিনা দন্নে হা·সং গিপ্পিনচা রি·য়াংজক।

² বিথি মিন্‌খারিও বিয়া আন·থাংনি ফালনি বিথিরাংখো মান·ফানা নকখল সাকসাখো উয়া গামগিবারাংচা ওয়াত্তেতজক।

³ ইন্দিবা উয়া গামগিবারাং উয়া নকখলখো রি·ম্মে দকজক আরো জাকরারা ওয়াত্তেতজক।

⁴ উনো নকগিবা দা·আও সাকসা নকখলখো বিসংচা ওয়াত্তেতজক। গামগিবারাং বিনি স্খুখো দক্কে মাত্তেতজক আরো চন্নিকে মান্দি রা·গিজা দাকজক।

⁵ ইন্দাকোবা বিয়া দা·আও সাকসাখো ওয়াত্তেতজক। গামগিবারাং বিখো স·ওতে গালজক। জা·মানো বিয়া আরোবা বাং·আরাংখোন ওয়াত্তেতজক, ইন্দিবা বিসংনি গিসেপো মিত্তামরাংখো দকজক আরো মিত্তামরাংখোদে স·ওতেন গালজক।

⁶ ‘‘উচা ওয়াত্তেতনা গিত্তা নকগিবানি দা·আও সাকসাসান দংআমিং। উয়াদে বিনি খা·সাগিবা দেফান্থিমিং। জা·মানচাবাক্কা বিয়া বিনি দেফান্থিখোন ওয়াত্তেতজক, বিয়া ইন্দাকে চানচিজক, ‘জেদাক্কেবা হং·খানা, বিসং আংনি দেফান্থিখোদে মান্দিরা·নুয়া।’

⁷ ইন্দিবা উয়া গামগিবারাং আন·থাংথাং আগানগ্রিকজক, ‘ইয়ান জা·মানো গামজিনরাংনি নকগিবা হং·নুয়া। হাই, আনচিং বিখো স·ওতে গালনা, উনোদে আনচিংআন গামজিনরাংনি নকগিবা হং·না মা·ন্নুয়া।’

⁸ বিসং দেফান্থিখো রি·ম্মে স·ওতে গালজক আরো আংগুর বাগাননি হা·ফালচা গাল্লেতজক।

⁹ ‘‘ইন্দাকোদে দে আগানে নি, আংগুর বাগাননি নকগিবা মুয়াখো দাকনুয়া? বিয়া রি·বাএ উয়া গামগিবারাংখো স·ওতে গালনুয়া আরো আংগুর বাগানখো গিপ্পিনরাংচা হ·ন্নুয়া।

¹⁰ না·সং রংথালগিবা শাস্ত্রও পড়িখুজামা, ‘জে রং·থিখো রিকগিবারাং জেগালে গাল্লামিং উয়ান দা·আও নাংবাৎগিবা রং·থি হং·জক;

¹¹ গিত্তেলান ইখো দাকজক, আরো ইয়া আনচিংনা বাদাকফিল্লে আইয়াও ইনমানানি হং·আ?’ ’’

¹² উনো থরমনি উয়া দাল·গিবারং যীশুখো রিম·না হাম·জক, মুয়ানা যীশু বিসংনি গিম্মিনান ইখো আগানজক ইন্নে বিসং হা·আইনা মান·জকমিং। ইন্দিবা বিসং মান্দিরাংনা খেন্নি যীশুখো ওয়াত্তে রি·য়াংআরিজক।

খাজিনা হ·ন্নানি বিদিংও

¹³ জা·মানো থরমনি উয়া দাল·গিবারাং যীশুখো বিনি খাৎথাচা রিম·না ইন্নে মিত্তাম ফরীশী আরো হেরোদনি মান্দিরাংখো ওয়াত্তেতজক।

¹⁴ বিসং যীশুচা রি·বাএ আগানজক, ‘‘স্খিগিবা, চিংআ হা·আইয়া না·আ সাকসা বিবিগিবা মান্দি হং·আ, নাং·ও মামুং দাকমিকানি দংজা। মান্দিরাং মুয়াখো চানচিনুয়া বা চানচিজানুয়া উনা না·আ খেনজা, মুয়ানা না·আ দারাংনি মিকখাংখো নিএ মামুং দাকজাংআ। ইন্দিবা না·আ বিবি দাক্কে ইসলনি রামাখো স্খিয়ে হ·ন্না। দা·আও না·আ আগানবো, মোশিনি নিয়াম গিত্তা রোমনি রাজানা খাজিনাখো হ·ন্না খ্রাআমা?

¹⁵ বিনা আনচিং খাজিনা হ·ন্না নাংনুয়ামা নাংজানুয়া?’’ বিসংনি বু·এ চা·আখো হা·আইনা মা·ন্নে যীশু আগানজক, ‘‘না·সং মুয়ানা আংখো পরীক্ষা দাক্কিংআ? আংনা দীনার গং·সাখো রা·বাএ ফিন্নিকবো।’’

¹⁶ বিসং দীনার গং·সাখো রা·বাএ হ·ন্নানি জা·মানো যীশু বিসংখো সিং·জক, ‘‘ইনি সাক্কাও দংগিবা মিকখাং আরো বিমুং সানি?’’ বিসং আগানজক, ‘‘রোম রাজানি।’’

¹⁷ যীশু বিসংনা আগানজক, ‘‘বাগিবা রাজানি উখো রাজানা হন·বো, আরো বাগিবা ইসলনি উখো ইসলনা হন·বো।’’ যীশুনি ইয়া খাৎথানা বিসং আইয়াও ইনমানজক।

চাখাতফিল্লানি বিদিংও

¹⁸ মিত্তাম সদ্দূকীরাং যীশুচা রি·বাজক। সদ্দূকীরাংনি চানচিয়া গিত্তা সিগিবারাংদে চাখাতফিলজানুয়া। ইনি গিম্মিন বিসং যীশুচা সিং·জক,

¹⁹ ‘‘স্খিগিবা, মোশি চিংনা ইয়া খাৎথাখো চক্কে দন্নাংজক, ‘সানিবা আদাথাং বি·সাগ্রি দাক্কে বিনি জিকখো দন্নে সিয়াংওদে বিনি জংগিবা বিনি জিকখো দংনুয়া আরো আদাথাংনি হং·এ বিৎচ্রিখো রা·রিকনা নাংনুয়া।’

²⁰ নাম্মেন নাম্মা, বিসং আদাসা সাকস্নি দংআমিং। দাল·বাৎগিবা জিক খিম্মে দেগ্রি দাক্কেন সিজক।

²¹ উনো গ্মিগিবা জংগিবা আদাথাংনি উয়া রান্দি জিকখো খিমজক, ইন্দিবা বিয়াবা দেগ্রি দাক্কেন সিজক। গিত্থামগিবানি অবস্থাবা উয়ানদাক্কেন হং·জক।

²² ইন্দাকে সাকস্নিনি গিসেপো সাকসানিবা বি·সা-আংদি হং·জাজক। দিমদাকনি জা·মানো উয়া মিচিকবা সিজক।

²³ ইন্দাকোদে সিগিবারাং জেনসালো চাখাতফিলনুয়া উনসালো উয়া মিচিক সানি জিকগিবা হং·নুয়া? মুয়ানা সাকস্নিনি দিমদাকান বিখো খিম্মামিং।’’

²⁴ যীশু আগানচাকজক, ‘‘না·সং ব্রাংইংজক, মুয়ানা না·সং শাস্ত্রখোবা হা·আইজা আরো ইসলনি বিলখোবা হা·আইজা।

²⁵ সিগিবারাং জেনসালো চাখাতফিলনুয়া উনো বিসং জিক-সে খিমজানুয়া আরো বিসংখো জিক-সে খিমনাবা হন·জানুয়া; উনো বিসং সালগিও দংগিবা সা·গ্রেরাং গিত্তা হং·নুয়া।

²⁶ সিগিবারাংনি চাখাতফিল্লানি গিম্মিনো মোশিনি খি·তাপো ওয়া·আল চিং·গিবা বলনি খাৎথাখো না·সং পড়িখুজামা, ইসল মোশিখো ইন্না, ‘আংআ অব্রাহামনি ইসল,

²⁷ ইস্‌হাকনি ইসল আরো যাকোবনি ইসল’? ইসলদে সিগিবারাংনি ইসল হং·জা, বিয়া থাংগিবারাংনিন ইসল হং·আ। না·সং নাম্মেন ব্রাংইংজক।’’

দাল·বাৎগিবা গি·য়েতা

²⁸ শাস্ত্র স্খিগিবা সাকসা উনো রি·বাএ বিসংনি জিগ্রিকাখো খিন্নানা মান·জক। যীশু বিসংনা নাম্মেদাক্কেন আগানচাকজক ইখো নিক্কে বিয়া যীশুচা সিং·জক, ‘‘মোশিনি হন·গিবা দিমদাক গি·য়েতারাংনি গিসেপো বাগিবা গি·য়েতা দাল·বাত্তা?’’

²⁹ যীশু আগানচাকজক, ‘‘দাল·বাৎগিবা গি·য়েতা ইয়ান, ‘ইস্রায়েলনি মান্দিরাং খিন্নাবো, আনচিংনি গিত্তেল ইসল সাকসাসান।

³⁰ না·আ নাং·নি গিম্মিক খা·থংচা, নাং·নি গিম্মিক জাংগিচা, নাং·নি গিম্মিক গিসিকচা আরো নাং·নি গিম্মিক বিলচা নাং·নি ইসলনা খা·সাবো।’

³¹ উনি জা·মাননি গি·য়েতা ইয়ান, ‘নাং·নি সংসুল-নকসুলখো আন·থাংনি গিত্তান খা·সাবো।’ ইয়া গি·গ্মি গি·য়েতারাংনি আগ্রে দাল·বাৎগিবা গি·য়েতা মামুংবা দংজা।’’

³² উনোন উয়া শাস্ত্র স্খিগিবা আগানজক, ‘‘স্খিগিবা, ইয়া খাৎথাদে নাম্মান। নাং·নি আগানা বিবিন হং·আ ইসল সাকসান আরো বিনা আগ্রে গিপ্পিন ইসল দংজা।

³³ আরো খা·থং গিম্মিক, বুদ্ধি গিম্মিক আরো বিল গিম্মিকচা বিখো খা·সাচাক্কা আরো সংসুল-নকসুলখো আন·থাংনি গিত্তা খা·সাচাক্কা মাৎবুরুংরাং আরো গিপ্পিন বলি হ·ন্নারাংনা বাত্তে দাল·বাত্তা।’’

³⁴ যীশু উয়া শাস্ত্র স্খিগিবানি বুদ্ধিগ্মাং গিত্তা আগানচাক্কাখো নিক্কে বিনা আগানজক, ‘‘ইসলনি সংনকনি না·আ বাং·এ চে·ল্লাও দংজা।’’ উনোনি যীশুচা মামুংখোবা সিং·না দারাংবা ফা·জাজক।

শাস্ত্র স্খিগিবারাংচা গিত্তেল যীশুনি সিং·আ

³⁵ থরম নক্কো স্খিমিত্তিংও যীশু সিং·জক, ‘‘খ্রীষ্ট দায়ূদনি দেফান্থি ইখো শাস্ত্র স্খিগিবারাং বাদিকে দাক্কে আগানা?

³⁶ দায়ূদ আন·থাংআন গিসিক রংথালগিবাও আগানা, ‘গিত্তেল আংনি গিত্তেলনা আগানা, জেওনা দিপ্পাৎ আংআ নাং·নি বোবিলরাংখো নাং·নি জা·চক খা·মাও দনজা, উনোনা দিপ্পাৎ না·আ আংনি জাক্রাচা আসংবো।’

³⁷ দায়ূদ আন·থাংআন বিখো গিত্তেল ইন্নে ইনজক, ইন্দাকোদে খ্রীষ্ট বাদিকে বিনি দেফান্থি হং·না মা·ন্না?’’ বাং·বিয়া মান্দিরাং খুসি হং·এ যীশুনি খাৎথাখো খিন্নাংআমিং।

³⁸ স্খিয়ানিরাংও যীশু আগানজক, ‘‘শাস্ত্র স্খিগিবারাংনা সিমসাকবো। বিসংদে চলা রো·আ রো·আরাংখো গান্নে রোমনা আরো বাজালরাংচা মান্দিরা·আখো মা·ন্না হা·ম্মা।

³⁹ বিসং থম·দাকরামো নামবাৎগিবা আসংচাকানিরাংও আরো চা·আ হ·ন্নানি সালো মান্দিরা·আনি নামবাত্তা হা·দামরাংও আসংনা হা·ম্মা।

⁴⁰ বিসং মান্দিনা ফিন্নিকনা ইন্নে রো·এ রো·এ বি·আ, আরো রান্দিরাংনি গামজিনরাংখো রা·সেক্কে রা·আ। ইন্দাকগিবা মান্দিরাং বাং·বাত্তে শাস্তিখো মা·ন্নুয়া।’’

দিলগিবা রান্দি মিচিকনি হ·ন্না

⁴¹ উনি জা·মানো যীশু থরম নক্কো থাংখা দনচাক্রানি সেফাংও আসংএ মান্দিরাংনি পয়সা দন্নাখো নিএ দংআমিং। বাং·বিয়া মা·ন্নে চা·গিবারাং উনো বাং·এন থাংখা দনজক।

⁴² জা·মানো সাকসা দিলগিবা রান্দি মিচিক রি·বাএ উনো গি·গ্মি পয়সাখোসান দনজক।

⁴³ উনো যীশু বিনি জা·রিকগিবারাংখো রিংগামে আগানজক, ‘‘আংআ না·সংনা বিবিন আগানিংআ, ইয়া দিলগিবা রান্দি থাংখা দনচাকানিও দিমদাকনা বাত্তে বাং·বাত্তে দনজক।

⁴⁴ উয়া মান্দিরাং বিসংনি বাং·আ গামজিনরাংনি অকখিসা হন·জক, ইন্দিবা ইয়া মিচিকসা দিল্লোবা বিনি জাংগি থাংনা গিত্তা দংগিবা গিম্মিকখোন হন·জক।’’