মার্ক 11 - Garo New Testament

যীশু যিরূশালেমো রাসং চাএ নাপ্পা

¹ বিসং যিরূশালেমনি সেফাংওনা সক্কাংএ জৈতুন হা·ব্রিনি জা·রেকো দংগিবা বৈৎফগী আরো বৈথনিয়া সংচানা রি·বাজক। উনো সক্কে যীশু বিনি সাকগ্মি জা·রিকগিবারাংখো ইন্দাকে আগানে ওয়াত্তেতজক,

² ‘‘না·সং উয়া মিকখাংনি সংচানা রি·য়াংবো। সংও নাপমিত্তিংও উনো খায় দনগিবা মাংসা গাধা বি·সাখো নিকনা মা·ন্নুয়া। উনি সাক্কাও দারাংবা মামুং সাল্লোবা গাখাতখুজা।

³ না·সং উখো এংএ ইয়োনা রা·বাবো। সাবা না·সংখো ‘না·সং মুয়াখো দাক্কিংআ?’ ইন্নে সিং·ওদে ‘গিত্তেলনা নাংআ, আরোবা বিয়া থেংরিন ইখো ইয়োনা ওয়াত্তেতফিলনুয়া’ ইন্নে আগানবো।”

⁴ উনোন বিসং রি·য়াংএ রামা সাক্কাও নকনি দ·গাচিলও গাধা বি·সাখো খায়ে দন্নাখো নিক্কেজক। বিসং উখো এংমিত্তিংও,

⁵ উনো চাদেংএ দংগিবারাং সিং·জক, ‘‘না·সং মুয়াখো দাক্কিংআ? গাধা বি·সাখো মুয়ানা এংআ?’’

⁶ বিসং যীশুনি আগানেতা গিত্তান আগানচাকজক। উনোন মান্দিরাং বিসংখো উখো রা·আংখানা হন·জক।

⁷ বিসং উয়া গাধা বি·সাখো যীশুচা রা·বাএ উনি সাক্কাও আন·থাংথাংনি চিন্নানি বা·রারাংখো আনদাপজক। আরো যীশু উনি সাক্কাও আসংজক।

⁸ বাং·বিয়া মান্দিরাং আন·থাংথাংনি চিন্নানি বা·রারাংখো রামা সাক্কাও আনদাপে হন·জক, আরো গিপ্পিনরাং হা·বাও দংগিবা বিফাংরাংনি ডালারাংখো বিজাক গ্মাং দে·ন্নে রা·বাএ রামা সাক্কাও আনদাপজক।

⁹ যীশুনা স্খাং রি·গিবারাং আরো জা·মান রি·গিবারাং চ্রিকে আগান্না হা·বাচেংজক, ‘‘হোশান্না! গিত্তেলনি বিমুংও রি·বাগিবানি রাসং হং·খানা।

¹⁰ আনচিংনি ফাগিবা দায়ূদনি রি·বাগিবা সংনকনি রাসং হং·খানা। সালগিওবা হোশান্না!’’

¹¹ যিরূশালেমচা রি·য়াংএ যীশু থরম নক্কো নাপ্পেজক আরো গিম্মিকখোন নিউইল উইলে নিজক, ইন্দিবা সাল নাপজক ইন্নে বিনি সাকচিগ্মি জা·রিকগিবারাংখো রা·এ বিয়া বৈথনিয়াচা রি·য়াংআরিজক।

থরম নক্কো গিত্তেল যীশু

¹² উনি সালসা জা·মানো বিসং বৈথনিয়াখো ওয়াত্তে রি·য়াংমিত্তিংও যীশু অকখ্রিয়ানা দাকজক।

¹³ উনো ডুমুর বিথি মিন্‌খারি হং·খুজামিং, ইন্দিবা বিয়া চে·ল্লাচানি বিজাক গাপচিপগিবা ডুমুর বিফাং ফাংসাখো নিক্কে উনো বিথি নাংআমা নাংজা উখো নিনা রি·য়াংজক। সেফাংও রি·য়াংএ বিজাকরারানা আগ্রে মামুংখোবা নিকজাজক।

¹⁴ উনি গিম্মিন বিয়া উয়া বিফাংখো আগানজক, ‘‘নাং·নি বিথিখো দারাংবা মামুং সালোবা চা·জাখানা।’’ জা·রিকগিবারাং যীশুনি ইয়া খাৎথাখো খিন্নানা মান·জক।

¹⁵ যিরূশালেমচা সক্কে যীশু থরম নকচানা নাপজক আরো উনো ফালগিবা আরো ব্রিগিবারাংখো হা·রিকেতজক। বিয়া থাংখা স্রিগিবারাংনি দনচাকানিরাংখো আরো কইতর ফালগিবারাংনি আসংচাকানিরাংখো ফাংফিল্লেতজক।

¹⁶ থরম নকনি হা·থিলা গিত্তা ফাল্লানি-ব্রিয়ানি মামুংখোবা রা·এ রি·য়াংনা হন·জাজক।

¹⁷ জা·মানো স্খিনা হা·বাচেংও বিয়া মান্দিরাংনা আগানজক, ‘‘শাস্ত্রও ইন্দাকে চক্কা দংজামা, ‘আংনি নকখো গিম্মিক জাতরাংনি বি·আনি নক ইন্নে মিংনুয়া’? ইন্দিবা না·সং ইখো রা·সেকগিবারাংনি হা·খল দাক্কে রা·জক!’’

¹⁸ ইখো খিন্নাএ খামাল দাল·গিবারাং আরো শাস্ত্র স্খিগিবারাং যীশুখো স·ওতে গালনা ইন্নে চল সান্দিনা হা·বাচেংজক। বিসং যীশুনা খেন্নুয়ামিং, মুয়ানা যীশুনি স্খিয়ানা মান্দিরাং আইয়াও ইনমানামিং।

¹⁹ হান·থামানি জা·মানো বিয়া জা·রিকগিবারাংখো রা·এ সংজিলমাখো ওয়াত্তে রি·য়াংজক।

ডুমুর বিফাংখো থয়ে স্খিয়া

²⁰ ফ্রিংও উয়া রামা গিত্তা রি·বামিত্তিংও জা·রিকগিবারাং নিকনা মান·জক, উয়া ডুমুর বিফাং জা·দিলমাংগ্মাং সিক্রেপাংজক।

²¹ যীশুনি খাৎথাখো গিসিক রা·এ পিতর যীশুনা আগানজক, ‘‘স্খিগিবা, নিবো, না·আ জে ডুমুর বিফাংখো শাপ হ·ন্নামিং উয়া সিক্রেপাংজক।’’

²² উনো যীশু আগানজক, ‘‘ইসলো বিবিরা·বো।

²³ বিবিন আংআ না·সংনা আগানিংআ, জে মান্দি খা·থংও মামুংনা খেনচাকগিজা ইয়া হা·ব্রিখো আগানা, ‘চাখাত্তে সাগালচা রি·য়াংএ গা·আকবো,’ আরো বিয়া জেখো আগানা উয়ান হং·নুয়া ইন্নে বিবিরা·ওদে বিনা উখোন দাক্কানি হং·নুয়া।

²⁴ উনি গিম্মিন আংআ না·সংনা আগানিংআ, বি·আও না·সং জেখো হাম·নুয়া, না·সং উখো মান·জক ইন্নে বিবিরা·বো, আরো না·সংনা উয়ান হং·নুয়া।

^25-26 না·সং জেনসালো বি·আ উয়া সময়ও সানিবা সাক্কাও না·সংনি খা·আওনাংআনি দংওদে, বিখো ক্ষেমা দাকবো, জেদাক্কে না·সংবা না·সংনি সালগিও দংগিবা ফানি ক্ষেমা দাক্কাখো মা·ন্না।’’

গিত্তেল যীশু আরো থরমনি দাল·গিবারাং

²⁷ জা·মানো যীশু আরো বিনি জা·রিকগিবারাং ফি·ল্লে যিরূশালেমচানা রি·য়াংজক। বিয়া থরম নক্কো রি·রুরাএ দংমিত্তিংও খামাল দাল·গিবারাং, শাস্ত্র স্খিগিবারাং আরো মি·আফারাং বিচা রি·বাএ সিং·জক,

²⁸ ‘‘না·আ বাগিবা বিলচা ইরাংখো দাক্কিংআ? সা নাং·না ইয়া বিলখো হন·জক?’’

²⁹ যীশু উনো আগানচাকজক, ‘আংআ না·সংচা মিংসা খাৎথাখো সিং·নুয়া। না·সং আংনা আগানচাকনা মা·ন্নোদে আংআবা না·সংনা আগান্নুয়া, আংআ বাগিবা বিলচা ইরাংখো দাক্কিংআ।

³⁰ দে আগানে নি, রিপ্পলেতানি বিলখো যোহন ইসলোনি মা·ন্নামিংমা, মান্দিওনি মা·ন্নামিং?’’

³¹ উনো আন·থাংথাংও বিসং ইন্দাকে চানচিগ্রিকজক, ‘‘আনচিং ‘ইসলোনি’ ইন্নে আগানোদে, বিয়া আগান্নুয়া, ‘ইন্দাকোদে না·সং বিখো মুয়ানা বিবিরা·জাজক?’

³² দা·আবা ‘মান্দিওনি,’ ইন্নে আগানোদে, ইন্দাকোদে?’’ বিসং মান্দিরাংনা খেন্নুয়ামিং, মুয়ানা গিম্মিকান যোহনখো আগানসোগিবা বিবিন ইন্নে চানচিনুয়ামিং।

³³ উনি গিম্মিন বিসং আগানজক, ‘‘চিংআদে হা·আইজা।’’ উনোন যীশু আগানজক, ‘‘ইন্দাকোদে আংআবা না·সংনা আগানজানুয়া, আংআ বাগিবা বিলচা ইরাংখো দাক্কিংআ।’’