মথিনি চকগিবা নাম্মা খাৎথা 7 - Garo New Testament

গ্রো রি·ম্মানি বিদিংও স্খিয়া

¹ “না·সং দা·আ গিপ্পিনরাংনি গ্রোখো রি·ম্মাবো জেদাক্কে না·সংনি গ্রোখোবা রি·ম্মা হং·জা,

² মুয়ানা জেদাক্কে না·সং গিপ্পিনরাংনি গ্রোখো রি·ম্মা, উয়ানদাক্কে না·সংনি গ্রোখোবা রিম·নুয়া, আরো জেদাক্কে না·সং থয়ে হ·ন্না উয়ানদাক্কেন না·সংখোবা থনুয়া।

³ “নাং·নি জংআদানি মিক্রোনও দংগিবা বিসেমসেমখোন নিক্কিংআ, ইন্দিবা আন·থাংনি মিক্রোনও দংগিবা বলথংখো মুয়ানা নিকজাংআ?

⁴ আন·থাংনি মিক্রোনোন বলথং দংওদে বাদিকে নাং·নি জংআদাখো ইন্দাকে আগানজক, ‘রি·বাবো, নাং·নি মিক্রোননি বিগিনচিখো ওত্তে গাল্লেতনা? বু·এ চা·গিবা!

⁵ স্খাং নাং·নি মিক্রোননিখো বলথংখো ওত্তে গালবো, উনোদে নাং·নি জংআদানি মিক্রোননিখো বিগিনচিখো গালনা না·আ নিকসেংনুয়া।

⁶ “জেআন রংথালা উখো আচাকনা দা·আ হ·ন্না। না·সংনি মুক্তাখো ওয়াকনি মিকখাংও দা·আ গাল্লাবো। মুয়ানা উরাং আন·থাংনি জা·চকচা উরাংখো গা·ফিন্নেকনা আরো না·সংখো চিকফিলনাবা দংআ।

বি·আনি গিম্মিনো খু·রাচাক্কা

⁷ “বি·বো, উনোন না·সংনা হ·ন্নুয়া; সান্দিবো, উনোন না·সং নিকনুয়া; দ·গাও দকথাকবো, উনোন না·সংনা এংএ হ·ন্নুয়া।

⁸ বি·গিবা মা·ন্না; সান্দিগিবা নিক্কা; আরো দ·গাও দকথাকগিবানা দ·গা এংএ হ·ন্না।

⁹ না·সংনি গিসেপো আন·থাংনি দেফান্থি রুটিখো হা·ম্মোদে বিনা রং·থিখো হ·ন্না, ইন্দাকগিবা মান্দি দংআমা?

¹⁰ বা না·থকখো হা·ম্মোদে চিপ্পুখো হন·গিবা সা দংআ?

¹¹ না·সং নামগিজা হং·এবা আন·থাংনি দেদ্রাংনা নাম্মাখো হ·ন্না হা·আইওদে, ইন্দাকোদে সালগিও দংগিবা না·সংনি ফাচা জেরাং বি·আ বিসংনা বিয়া নাম্মাখোন হ·ন্নুয়া, ইয়াদে খাকখেতান!

¹² গিপ্পিন মান্দিরাংচানিখো নাম্মা বেওয়ালখো মা·ন্না হা·ম্মোদে না·সংবা বিসংমুং উয়ানদাক্কে দাকবো। ইয়ান মোশিনি নিয়াম আরো আগানসোগিবারাংনি স্খিয়ানি মিংসংগিবা খাৎথা।

আপচনা আরো আপদালা দ·গাচল

¹³ “আপচনগিবা দ·গাচল গিত্তা নাপবো, মুয়ানা নামগিজাচানা রা·আংগিবা রামানি দ·গা দা·ল্লা আরো উনি রামাবা আপদালা। উগিত্তা বাং·আ মান্দিরাংআন নাপ্পা।

¹⁴ ইন্দিবা জাংগিচানা রা·আংগিবা দ·গা আপচনা, উনি রামাবা আপচনা। উখো বাং·গিজা মান্দিরাংআন সান্দিয়ে মা·ন্না।

বু·এ চা·গিবা আগানসোগিবারাংখো হা·আইয়ানি চল

¹⁵ “বু·এ চা·গিবা আগানসোগিবারাংনা সিমসাকবো। বিসং মেষনি বিমাংখো রা·এ না·সংচা রি·বাআ, ইন্দিবা নিং·আচাদে বিসং চা·মিন্নকগিবা মাৎচা গিত্তা দাক্কা।

¹⁶ বিসংনি জাংগিনি বিথিচান না·সং বিসংখো হা·আইনা মা·ন্নুয়া। বুসু চাগিপাও আঙ্গুর বিথি বা শিয়ালকাঁটাও ডুমুর বিথি নাংআমা?

¹⁷ উয়ানদাক্কেন গিম্মিক নামগিবা বিফাংও নামগিবা বিথিন নাংআ আরো নামগিজাগিবা বিফাংও নামগিজাগিবা বিথিন নাংআ।

¹⁸ নামগিবা বিফাংও নামগিজা বিথি আরো নামগিজা বিফাংও নামগিবা বিথি নাংনা মান·জাসা।

¹⁹ নামগিবা বিথি নাংগিজাগিবা বিফাংখো দে·ন্নে ওয়া·আলো গাল্লানি হং·আ।

²⁰ উনি গান্দা আগানিংআ, বু·এ চা·গিবা আগানসোগিবারাংনি জাংগিনি বিথিখো নিক্কে না·সং বিসংখো হা·আইনা মা·ন্নুয়া।

সালগিনি সংনকো সা নাপনা মা·ন্নুয়া?

²¹ “আংখো ‘গিত্তেল, গিত্তেল’ ইনগিবা গিম্মিকান সালগিনি সংনকো নাপনা মা·ন্নুয়া ইন্দাকে হং·জা, ইন্দিবা সালগিও দংগিবা আংনি ফানি নামনিকাখো দাকগিবাসা নাপনা মা·ন্নুয়া।

²² উনসালো বাং·আ মান্দিআন আংখো ইন্নুয়া, ‘গিত্তেল, গিত্তেল, চিংআ নাং·নি বিমুংচা আগানসোগিবা গিত্তা খাৎথা আগানজামিংমা? নাং·নি বিমুংচা গিসিক নামগিজাগিবারাংখো হা·রিকজামিংমা? নাং·নি বিমুংচা আইয়াও ইনমানগিবা কামরাংখো বাং·এন দাকজামিংমা?’

²³ উনসালো আংআ বিসংখো আগান্নুয়া, ‘আংআ না·সংখো হা·আইজা। নামগিজাখো দাকগিবারাং! আংনি মিকখাংওনি না·সং রি·য়াংবো।’

রকমগ্মি মান্দি

²⁴ “উনি গান্দা আগানিংআ, আংনি ইয়া খাৎথারাংখো খিন্নাএ উরাংখো মানিগিবাদে রং·থিনি সাক্কাও নক রিকগিবা বুদ্ধিগ্মাং সাকসা মান্দি গিত্তা দাক্কা।

²⁵ জা·মানো মিকখা ওয়াজক, চিরাং দাল·বাজক, বালওয়া রাকজক আরো উয়া নক্কো নাংজক ইন্দিবা উয়া নক গা·আকজাজক মুয়ানা উখো রং·থি সাক্কাও রিক্কামিং।

²⁶ আংনি ইয়া খাৎথারাংখো খিন্নাএ উরাংখো মানিজাগিবাদে হান·চেংনি সাক্কাও রিকগিবা সাকসা জাদা মান্দি গিত্তা দাক্কা।

²⁷ জা·মানো মিকখা ওয়াজক, চিরাং দালবাজক, বালওয়া রাকজক আরো উয়া নক্কো নাংজক; উনোন উয়া নকবা গা·আকজক। নাম্মেদাক্কেন গা·আকাংজক!”

²⁸ যীশুনি খাৎথা আগানা বন·খামও মান্দিরাং বিনি স্খিয়ানা আইয়াও ইনমানজক,

²⁹ মুয়ানা বিয়া থরম স্খিগিবারাং গিত্তা স্খিগিজা ইন্দিবা বিল দংগিবা গিত্তা বিসংনা স্খিজক।