মথিনি চকগিবা নাম্মা খাৎথা 28 - Garo New Testament

যীশু সিয়াওনি চাখাতফিল্লা

¹ নেং·থাকানি সালনি জা·মানো আনথিনি স্খাংগিবা সালো ফ্রিংও মগ্‌দলীনী মরিয়ম আরো উয়া সাকগিপ্পিন মরিয়ম উয়া গোপরামখো নিনা রি·য়াংজক।

² উনোন রাং·গিত্তিক বিল্লংএন বাংগুরিজক, মুয়ানা গিত্তেলনি সাকসা সা·গ্রে সালগিওনি হং·ওনবাজক আরো গোপরামনি মিকখাংনিখো রং·থিখো জিত্তেতি উনি সাক্কাও আসংজক।

³ বিনি মিকখাং মিক্‌খা রিপরাপা গিত্তা দাক্কামিং আরো বিনি বা·রাচলারাং নাম্মেন বকথলথলমিং।

⁴ বিনা খেনবিয়ে নিরকখিগিবারাংনি বে·এন থিল·থিলজক আরো সিবকে গা·আকে দংজক।

⁵ সা·গ্রে মিচিকরাংনা আগানজক, “না·সং দা·আ খেন্নাবো, মুয়ানা আংআ হা·আইয়া, জেখো চিসলো দাৎখাপামিং না·সং উয়া যীশুখো সান্দিংআ।

⁶ বিয়া ইনো দংজা। বিনি আগানা গিত্তা বিয়া থাংচাজক। রি·বা, বিয়া জেও থুয়ে দংআমিং উয়া হা·দামখো নিবো।

⁷ না·সং থেংরি দাক্কে রি·য়াংএ বিনি জা·রিকগিবারাংনা আগানেবো বিয়া সিয়াওনি থাংচাজক আরো বিসংনা স্খাং গালীলচা রি·য়াংইংজক। বিসং বিখো উয়োন নিকনুয়া। নিবো, ইয়া খাৎথাখো আংআ না·সংনা আগানজক।”

⁸ উয়া মিচিকরাং খেনজকমিং, ইন্দিবা বিসং নাম্মেন খুসি হং·এ বিকবিক দাক্কে গোপরামওনি রি·য়াংআরিজক আরো যীশুনি জা·রিকগিবারাংনা উখো আগান্না খাত্তাংজক।

⁹ উনো যীশু উয়া মিচিকরাংনি মিকখাংও রাং·গিত্তিক রি·বাএ আগানজক, “না·সংনি থম·থম হং·খানা।” উনো উয়া মিচিকরাং বিচা রি·য়াংএ বিনি জা·চকখো রি·ম্মে বিখো অলাখিজক।

¹⁰ যীশু বিসংনা আগানজক, “দা·আ খেন্নাবো; না·সং রি·য়াংএ জংআদারাংখো গালীলওনা রি·য়াংখানা আগানবো।”

¹¹ উয়া মিচিকরাংনি রি·য়াংমিত্তিংও উয়া নিরকখিগিবারাংনি মিত্তামরাং সংজিলমাওনা রি·য়াংজক আরো হং·গিবা গিম্মিকখো খামাল দাল·গিবারাংনা আগানজক।

¹² উনো খামালরাং আরো মি·আফারাং থম·দাকে খু·মংগ্রিকজক আরো উয়া সিপাইরাংনা থাংখা বাং·এ হ·ন্নে আগানজক,

¹³ “না·সং আগানবো, ‘ওয়াল্লো চিংনি থুয়ে দংমিত্তিংও বিনি জা·রিকগিবারাং রি·বাএ বিখো চা·ওয়ে রা·আংজক।’

¹⁴ ইয়া খাৎথাখো দাল·বাৎগিবা শাসন দাকগিবা খিন্নানা মা·ন্নোদে চিংআ বিখো থম·থমেৎনুয়া আরো শাস্তিওনি না·সংখো জক্কেৎনুয়া।”

¹⁵ উনোন নিরকখিগিবারাং উয়া থাংখাখো রা·চাকজক আরো বিসংনা আগানা গিত্তান আগানজক। দা·আও রোরোনা দিপ্পাৎ উয়া খাৎথা যিহূদীরাংনি গিসেপো জাংএ দংআ।

বন·খামগিবা গি·য়েতা

¹⁶ যীশু গালীলনি জে হা·ব্রিও জা·রিকগিবারাংখো রি·য়াংখানা আগানামিং উয়া সাকচিসা জা·রিকগিবারাং উনো উয়া হা·ব্রিওনা রি·য়াংজক।

¹⁷ উয়ো যীশুখো নিক্কে বিসং বিখো অলাখিজক, ইন্দিবা মিত্তামরাংদে খেনচাকজক।

¹⁸ উনোন যীশু সেফাংও রি·বাএ বিসংনা ইয়া খাৎথাখো আগানজক, “সালগিনি আরো হা·গিলসাকনি গিম্মিক বিলখো আংনা হন·মানজক।

¹⁹ ইনি গিম্মিন না·সং রি·য়াংএ গিম্মিক জাতরাংনি মান্দিরাংখো আংনি জা·রিকগিবা থারিবো। ফাগিবানি, দেগিবানি আরো গিসিক রংথালগিবানি বিমুংও বিসংখো রিপ্পলেতবো।

²⁰ আংআ জেখো জেখো না·সংনা গি·য়েৎজক উখো মানিখানা বিসংনা স্খিয়ে হন·বো। নিবো, চাসংনি বন·খামাওনা দিপ্পাৎ ফাংনান আংআ না·সংমুং দংআ।”