মথিনি চকগিবা নাম্মা খাৎথা 25 - Garo New Testament

মি·থ্রা সাকচিখুংনি গল্প

¹ “উনসালো চাক্কিখো রা·এ চাওয়ারিনা নিচাকসোগিবা সাকচিখুং মি·থ্রা গিত্তা সালগিনি সংনক হং·নুয়া।

² বিসংনি গিসেপো সাকবংআ বুদ্ধিগ্মাং দংআমিং।

³ বুদ্ধিগ্রি মি·থ্রারাং বিসংনি চাক্কিখো রা·জক ইন্দিবা আন·থাংমুং তেলখোদে রা·জাজক।

⁴ বুদ্ধিগ্মাং মি·থ্রারাং বিসংনি চাক্কিমুং রা·চাকানিরাংও তেলখোবা রা·জক।

⁵ চাওয়ারি হারিমে রি·বানি গিম্মিন বিসং দিমদাকান থুথকজক।

⁶ “জা·মানো ওয়ালজাৎচিও চ্রিকে আগানাখো খিন্নানা মান·জক, ‘হাইওয়া নিবো, চাওয়ারি রি·বাংজক! বিখো রি·চাকসোনা হং·খাতবো।’

⁷ উনোন উয়া মি·থ্রারাং চাখাত্তে বিসংনি চাক্কিখো থারিথকজক।

⁸ বুদ্ধিগ্রিরাং বুদ্ধিগ্মাংরাংনা আগানজক, ‘না·সংনি তেলখো চিংনা অকখিসা হন·ফাবো, মুয়ানা চিংনি চাক্কি সিয়াংইংজক।’

⁹ উনোন উয়া বুদ্ধিগ্মাং মি·থ্রারাং আগানচাকজক, ‘হং·জা, তেল দংগিবা চিংনা আরো না·সংনা চু·ওংজানুয়া। না·সং ইনাবাত্তে ফালগিবারাংচা রি·য়াংএ আন·থাংথাংনা তেলখো ব্রিএবো।’

¹⁰ উয়া বুদ্ধিগ্রি মি·থ্রারাং তেলখো ব্রিনা রি·য়াংওন চাওয়ারি সকবাজক। উনোন থারিয়ে দংসোগিবা মি·থ্রারাং চাওয়ারিমুং বিয়া হং·গিবা নকচানা রি·য়াংজক। বিসং গিম্মিক নিং·আচা নাপ্পানি জা·মানো দ·গাখো চিপচাংএতজক।

¹¹ “জা·মানো উয়া বুদ্ধিগ্রি মি·থ্রারাং রি·বাএ আগানজক, ‘নিবো, দ·গাখো এংএতবো।’

¹² চাওয়ারি আগানচাকজক, ‘বিবিন আগানিংআ, আংআ না·সংখো হা·আইজা।’ ”

¹³ গল্পনি বন·চতও যীশু আগানজক, “ইনি গিম্মিন মিকরাকে দংবো, মুয়ানা উয়া সালনি আরো উয়া সময়নি খাৎথাখো না·সং হা·আইজা।

সাকগিত্থাম নকখলনি গল্প

¹⁴ “হা·সংগিপ্পিনচা রি·য়াংনা স্খাং আন·থাংনি নকখলরাংখো রিংগামে বিসংনি জাক্কো আন·থাংনি গিম্মিক গামখো নিরকখিনা হন·গিবা সাকসা মান্দি গিত্তা সালগিনি সংনক হং·আ।

¹⁵ বিয়া উয়া নকখলরাংনি বিলনি খ্রি সাকসানা হাজাল বংআ, সাকসানা হাজালগ্মি আরো সাকসানা হাজালসা থাংখাখো হন·জক।

¹⁶ হাজাল বংআখো মান·গিবা উয়া থাংখাচা বাদিংএ আরোবা হাজাল বংআ থাংখাখো মান·দাপজক।

¹⁷ হাজালগ্মি মান·গিবাবা উয়ানদাক্কে আরোবা হাজালগ্মি থাংখাখো মান·দাপজক।

¹⁸ ইন্দিবা হাজালসা মান·গিবাদে হা·আখো চো·এ বিনি নকগিবানি থাংখাখো থুম্মুয়ে দনজক।

¹⁹ “সাল বাং·এ রি·য়াংআনি জা·মানো উয়া নকগিবা রি·বাএ নকখলরাংচানিখো হিসাব হাম·জক।

²⁰ হাজাল বংআখো মান·গিবা আরোবা হাজাল বংআ থাংখাখো রা·বাএ আগানজক, ‘না·আ আংনা হাজাল বংআ থাংখাখো হ·ন্নামিং।

²¹ নিবো, আংআ আরোবা হাজাল বংআ থাংখাখো মান·দাপজক।’ উনো বিনি নকগিবা বিনা আগানজক, ‘নাম্মাখো দাকজক। না·আ নামগিবা আরো বিবিগিবা নকখল। অকখিসানি গিম্মিন না·আ বিবি দাকজক ইন্নে আংআ নাং·না বাং·আরাংখো নিরকখিনা হ·ন্নুয়া। রি·বাবো, আংমুং হান·সেংফাবো।’

²² “হাজাল গ্মিখো মান·গিবা রি·বাএ আগানজক, ‘না·আ আংনা হাজাল গ্মি থাংখাখো হ·ন্নামিং। নিবো, আংআ আরোবা হাজাল গ্মি থাংখাখো মান·দাপজক।’

²³ উনো বিনি নকগিবা বিনা আগানজক, ‘নাম্মাখো দাকজক। না·আ নামগিবা আরো বিবিগিবা নকখল। অকখিসানি গিম্মিন না·আ বিবি দাকজক ইন্নে আংআ নাং·না বাং·আরাংখো নিরকখিনা হ·ন্নুয়া। রি·বাবো, আংমুং হান·সেংফাবো।’

²⁴ “ইন্দিবা হাজালসাখো মান·গিবা রি·বাএ আগানজক, ‘নিবো, আংআ হা·আইয়ামিং না·আ নাম্মেন খা·গ্রাক মান্দি। না·আ জেও বিৎচ্রি গোজা উনোনিখো রাত্তা আরো জেও গালজা উনোনিখো চিম্মংআ।

²⁵ ইনি গিম্মিন আংআ খেন্নে হা·ফালচা রি·য়াংএ হা·আও নাং·নি থাংখাখো থুম্মুয়ে দন্নামিং। ইয়া নিবো, নাং·নি গাম নাং·নিন দংআ।’

²⁶ বিনি নকগিবা বিনা আগানচাকজক, ‘নামগিজা আরো হারাতগিবা নকখল! না·আদে হা·আইয়ামিং জেও আংআ গোজা উনোনিখো রাত্তা আরো জেও গালজা উনোনিখো চিম্মংআ।

²⁷ ইন্দাকোদে থাংখা বাদিংগিবারাংচা আংনি থাংখাখো মুয়ানা দনজা? উখো দাক্কোদে আংআ রি·বাএ আংনি থাংখাখোবা মা·ন্নুয়ামিং আরো উমুং সুদখোবা মা·ন্নুয়ামিং।’

²⁸ জা·মানো বিয়া গিপ্পিনরাংনা আগানজক, ‘না·সং বিচানিখো থাংখারাংখো রা·এ জেচা হাজাল চিখুং থাংখা দংআ বিনা হন·বো।

²⁹ জেচা দংআ বিনা আরোবা বাং·এ হ·ন্নুয়া আরো উনোন বিনি বাং·নুয়া। ইন্দিবা জেচা দংজা বিনি অকখিসা দংআখোবা রা·আংনুয়া।

³⁰ উয়া জাদাস্রাং নকখলখো না·সং হা·ফালনি আন্দালাও গাল্লেতবো; উয়ো মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’

গিম্মিক জাতখো বিচাল দাক্কা

³¹ “জেনসালো মান্দিনি দেফান্থি গিম্মিক সা·গ্রেরাংখো রা·এ আন·থাংনি রাসংও রি·বানুয়া উনসালো রাজা হং·এ আন·থাংনি রাসংনি সিংহাসনও আসংনুয়া।

³² উনসালো গিম্মিক জাতনি মান্দিরাংখো বিনি মিকখাংও উনসান চিম্মংনুয়া। রাক্ষুয়াল জেদাক্কে মেষ আরো দ·মকখো দিংথাং দাক্কা উয়ানদাক্কে বিয়া দিমদাক মান্দিরাংখো বাকগ্মি দাক্কে দিংথাং দাকনুয়া।

³³ বিয়া আন·থাংনি জাক্রাচা মেষরাংখো আরো জাক্কাসিচা দ·মকরাংখো দন্নুয়া।

³⁴ “উনি জা·মানো রাজা আন·থাংনি জাক্রাচা দংগিবা মান্দিরাংনা আগান্নুয়া, ‘না·সং জেরাং আংনি ফানি ফাত্তিয়াখো মান·জক, রি·বাবো। হা·গিলসাক হা·বাচেংওনি না·সংনা দাকসোগিবা সংনকখো মান·রিকবো।

³⁵ আংনি অকখ্রিয়াও না·সং আংনা চা·না হ·ন্নামিং; রিংআসিও রিংনা হ·ন্নামিং; সকগিবা হং·ও নকচাকামিং;

³⁶ বে·এনো বা·রা দংজাও বা·রা গান্নেতামিং; জম্মে-সাএ দংও আংখো নিরকখিয়ামিং; আরো আংআ ফাতোকো দংও আংখো নিনা রি·য়াংআমিং।’

³⁷ “উনোন ইসলনা খা·ফাকগিবা উয়া মান্দিরাং বিনা আগানচাকনুয়া, ‘গিত্তেল, বাসোকো নাং·নি অকখ্রিয়াখো নিক্কে নাং·না চা·না হ·ন্নামিং বা রিংনা হা·সিকাখো নিক্কে রিংনা হ·ন্নামিং?

³⁸ নাং·নি সকগিবা হং·আখো নিক্কে বাসোকো নাং·খো নকচাকামিং, বা বা·রাগ্রি বে·এনখো নিক্কে বা·রা গান্নেতামিং?

³⁹ আরো বাসোকো নাং·নি জম্মাখো বা ফাতোকো দংআখো হা·আইএ নাং·চা রি·য়াংআমিং?’

⁴⁰ “রাজা উনো বিসংনা আগানচাকনুয়া, ‘আংআ না·সংনা বিবিন আগানিংআ, আংনি ইয়া জংআদারাংওনি চনবাৎগিবা সাকসানা জেনসালো উখো দাক্কামিং উনো আংনান উখো দাক্কামিং।’

⁴¹ “জা·মানো বিয়া জাক্কাসিচা দংগিবা মান্দিরাংনা আগান্নুয়া, ‘ও শাপ মান·গিবা মান্দিরাং, আংচানি না·সং রি·য়াংবো। শয়তান আরো উনি সা·গ্রেরাংনা দাকসোআ ফাংনাজলনি ওয়া·আলোনা রি·য়াংবো।

⁴² আংআ অকখ্রিয়ামিং না·সং আংনা চা·না হন·জাজক; রিংআসিয়ামিং রিংনা হন·জাজক;

⁴³ চাচ্চি সক্কামিং নকচাকজাজক; বে·এনো বা·রা দংজামিং আংনা বা·রা গান্নেতজাজক; জম্মামিং আরো ফাতোকো দংআমিং আংখো নিনা রি·য়াংজাজক।’

⁴⁴ “উনোন বিসং বিনা আগান্নুয়া, ‘গিত্তেল, বাসোকো নাং·নি অকখ্রিয়াখো বা রিংনা হা·সিকাখো নিক্কে, বা চাচ্চি সক্কাখো নিক্কে, বা বা·রাগ্রি বে·এনখো নিক্কে, বা জম্মাখো বা ফাতোকো দংআখো হা·আইএ দাকচাকজাজক?’

⁴⁵ “বিয়া বিসংনা আগানচাকনুয়া, ‘আংআ না·সংনা বিবিন আগানিংআ, জেনসালো না·সং ইয়া চনগিবারাংওনি সাকসানা উখো দাকজাজক উনো আংনান উখো দাকজাজক।’ ”

⁴⁶ জা·মানো যীশু আগানজক, “ইয়া মান্দিরাং ফাংনাজলনা শাস্তিখো মা·ন্না রি·য়াংনুয়া, ইন্দিবা ইসলনা খা·ফাকগিবা উয়া মান্দিরাং ফাংনাজলনি জাংগিখো মান·রিকনুয়া।”