মথিনি চকগিবা নাম্মা খাৎথা 21 - Garo New Testament

যিরূশালেমো নাপ্পা

¹ যীশু আরো বিনি জা·রিকগিবারাং যিরূশালেমনি সেফাংচানা সক্কাংএ জৈতুন হা·ব্রিনি সাক্কাও বৈৎফগী সংনি কেচ্চিচা রি·বাজক। উনোন যীশু সাকগ্মি জা·রিকগিবাখো ইন্দাকে আগানে ওয়াত্তেতজক,

² “না·সং উয়া মিকখাংনি সংচানা রি·য়াংবো। উয়োনা রি·য়াংজকোন গাধা মাংসা খায় দন্নাখো নিকনা মা·ন্নুয়া আরো উমুং মাংসা বি·সাখোবা নিকনুয়া। উয়া মাংগ্মিখো এংএ আংচানা রা·বাবো।

³ সাবা মামুংখো ইন্নোদে আগানবো, ‘গিত্তেলনা নাংআ।’ উনোন বিয়া উরাংখো ওয়াত্তেতনুয়া।”

⁴ ইরাং হং·জক জেদাক্কে আগানসোগিবানি আগানসোগিবা ইয়া খাৎথা চু·সকা:

⁵ “না·সং সিয়োন দেমিচিকনা আগানবো, নাং·নি রাজা নাং·চা রি·বাংজক। বিয়া সনথল। বিয়া গাধানি সাক্কাও, গাধীনি বি·সানি সাক্কাও গাখাতে রি·বাংজক।”

⁶ উয়া জা·রিকগিবারাং রি·য়াংএ যীশুনি গি·য়েতা গিত্তান দাকজক।

⁷ বিসং উয়া গাধা আরো গাধীনি বি·সাখো রা·বাএ উরাংনি সাক্কাও আন·থাংথাংনি বা·রাখো আনদাপানি জা·মানো যীশু আসংজক।

⁸ বাং·বিয়া মান্দি রামা সাক্কাও আন·থাংথাংনি বে·এননি বা·রারাংখো আনদাপে হন·জক। সাকগিপ্পিনরাং বল বিফাংনি ডালারাংখো দে·ন্নে রামা সাক্কাও আনদাপজক।

⁹ যীশুনি মিকখাংও আরো জা·মানও রি·ফাগিবারাং চ্রিকে আগান্না হা·বাচেংজক, “হোশান্না, দায়ূদনি দেফান্থি! গিত্তেলনি বিমুংও রি·বাগিবানি রাসং হং·খানা। সালগিওবা হোশান্না!”

¹⁰ যীশু যিরূশালেমো নাপমানো সংজিলমা গিম্মিক জেকজাকফিলজক। গিম্মিকান সিং·না হা·বাচেংজক, “ইয়া সা?”

¹¹ মান্দিরাং আগানজক, “বিয়া গালীলনি নাসরত সংনি আগানসোগিবা যীশু।”

থরম নক্কো গিত্তেল যীশু

¹² জা·মানো যীশু থরম নক্কো নাপজক আরো উয়ো দিমদাক ব্রিগিবা আরো ফালগিবারাংখো হা·রিকেতজক। বিয়া থাংখা স্রিগিবারাংনি দনচাকানিরাংখো আরো কইতর ফালগিবারাংনি আসংচাকানিরাংখো ফাংফ্লেকেতে আগানজক,

¹³ “রংথালগিবা শাস্ত্রও ইসল আগানা, ‘আংনি নকখো বি·আনি নক মিংনুয়া,’ ইন্দিবা না·সং ইখো ডাকাতনি হা·খল দাক্কে রা·জক।”

¹⁴ উনি জা·মানো মিকগ্রি আরো খরা মান্দিরাং থরম নক্কো যীশুচা রি·বাজক, আরো বিয়া বিসংখো নাম্মেতজক।

¹⁵ খামাল দাল·গিবারাং আরো শাস্ত্র স্খিগিবারাং বিনি দাক্কা আইয়াও ইনমানগিবা কামরাংখো নিকজক। থরম নক্কো বি·সারাংনি ইন্দাকে চ্রিকে আগানাখো খিন্নানা মান·জক, “হোশান্না, দায়ূদনি দেফান্থি!”

¹⁶ ইয়ারাংখো নিক্কে বিসং খা·আওনাংএ যীশুনা আগানজক, “বিসং জেখো আগানিংআ না·আ উখো খিন্নাংআমা?” যীশু বিসংনা আগানজক, “হো·এ, খিন্নাংআ। শাস্ত্রও না·সং মামুং সালোবা পড়িখুজামা: বি·সারাং আরো সকচা·গিবারাংনি খু·সুকচা না·আ আন·থাংনি গিম্মিন রাসংখো চু·সকেতজক?”

¹⁷ উনি জা·মানো যীশু বিসংখো ওয়াত্তে সংজিলমানি হা·ফালচা বৈথনিয়া সংচা রি·য়াংজক আরো উয়োন ওয়ালথুজক।

উয়া ডুমুর বিফাং

¹⁸ ফ্রিংও সংজিলমাচা রি·বামিত্তিংও যীশু অকখ্রিয়ানা দাকজক।

¹⁹ রামা সামবাও গি·সা ডুমুর বিফাং নিক্কে বিয়া উয়া ফাংনি সেফাংও রি·য়াংজক, ইন্দিবা বিজাকনি আগ্রে উয়ো মামুংখোবা নিকনা মান·জাজক। উনোন বিয়া উয়া বিফাংখো আগানজক, “মামুং সালোবা নাং·ও বিথি নাংজাখানা।” আরো উনোন ডুমুর বিফাং সিক্রেপাংজক।

²⁰ জা·রিকগিবারাং উখো নিক্কে আইয়াও ইনমানে আগানজক, “ডুমুর বিফাং বাদিকে দাক্কে থেংরিন সিক্রেপাংজক?”

²¹ যীশু বিসংনা আগানচাকে ইনজক, “আংআ না·সংনা বিবিন আগানিংআ, না·সং গিসিকো খেনচাকগিজা বিবিরা·আওদে ডুমুর বিফাংনি সাক্কাও আংআ জেখো দাকজক না·সংবা উখো দাকনা মা·ন্নুয়া। ইন্দাকেসান হং·জা, ইন্দিবা ইয়া হা·ব্রিখো আগানোদে, ‘চাখাত্তে সাগালচা রি·য়াংএ গা·আকেবো,’ ইন্দাকোদে উয়াবান হং·নুয়া।

²² না·সং বিবিরা·এ বি·ওদে জেখো না·সং হাম·নুয়া উখোন মা·ন্নুয়া।”

গিত্তেল যীশু আরো থরমনি দাল·গিবারাং

²³ জা·মানো যীশু দা·আবা থরম নক্কোনা রি·য়াংজক। বিনি স্খিমিত্তিংও খামাল দাল·গিবারাং আরো যিহূদীরাংনি মি·আফারাং বিচা রি·বাএ আগানজক, “না·আ বাগিবা বিলচা ইয়ারাংখো দাক্কিংআ? ইয়া বিলখো নাং·না সা হ·ন্না?”

²⁴ যীশু বিসংনা আগানজক, “আংআবা না·সংচা মিংসা খাৎথাখো সিং·নুয়া। না·সং আগানচাকনা মা·ন্নোদে আংআবা না·সংনা আগান্নুয়া আংআ বাগিবা বিলচা ইয়ারাংখো দাক্কিংআ।

²⁵ আগানে নিবোদা, রিপ্পলেতানি বিলখো যোহন বানিখো মা·ন্নামিং? ইসলোনিখোমা মান্দিওনিখো?” উনো বিসং আন·থাংথাংও ইন্দাকে আগানগ্রিকজক, “আনচিং ‘ইসলোনিখো’ ইন্নে আগানোদে, বিয়া আনচিংনা আগান্নুয়া, ‘ইন্দাকোদে না·সং মুয়ানা যোহনখো বিবিরা·জাজক?’

²⁶ দা·আবা ‘মান্দিওনিখো’ ইন্নে আগানোদে, ইন্দাকোদে মান্দিরাংনা খেনচাকানি দংআ, মুয়ানা যোহনখো দিমদাকান আগানসোগিবা ইন্নে চানচিয়া।”

²⁷ উনি গিম্মিন বিসং যীশুনা আগানচাকে ইনজক, “চিংআদে হা·আইজা।” উনো যীশু বিসংনা আগানজক, “ইন্দাকোদে আংআবা না·সংনা আগানজানুয়া আংআ বাগিবা বিলচা ইয়ারাংখো দাক্কিংআ।”

দেফান্থি সাকগ্মিনি গল্প

²⁸ জা·মানো যীশু আগানজক, “না·সং বাদিকে চানচিয়া? ইন্দাকে চানচিচিপবো, সাকসা মান্দিনি দেফান্থি সাকগ্মি দংআমিং। উয়া মান্দি বিনি দাল·গিবা দেফান্থিচা রি·য়াংএ আগানজক, ‘দা·আল না·আ আংগুর বাগানচা রি·য়াংএ কাম রিম·বো।’

²⁹ দেফান্থি আগানচাকজক, ‘আংআ রি·য়াংজানুয়া।’ ইন্দিবা জা·মানো গিসিক ফি·ল্লে কাম রিম·না রি·য়াংজক।

³⁰ উয়া মান্দি জা·মানো গিপ্পিন দেফান্থিচাবা রি·য়াংএ উয়া খাৎথাখোন আগানজক। বিয়াবা আগানচাকজক, ‘আংআ রি·য়াংইংজক,’ ইন্দিবা রি·য়াংজাজক।

³¹ ইয়া সাকগ্মিনি গিসেপো সা ফাগিবানি হা·সিকাখো দাকজক?” উনো থরমনি দাল·গিবারাং আগানচাকজক, “স্খাংগিবা।” যীশু বিসংনা আগানজক, “আংআ না·সংনা বিবিন আগানিংআ, না·সংনা স্খাং খাজিনা গিলগিবারাং আরো দারিরাং ইসলনি সংনক্কো নাপ্পিংজক,

³² মুয়ানা যোহন ইসলনি নামনিকা গিত্তা রি·য়ানি রামাখো ফিন্নিকনা না·সংচা রি·বামিং, আরো না·সং বিখো বিবিরা·জাজক। ইন্দিবা খাজিনা গিলগিবা আরো দারিরাং বিখো বিবিরা·আমিং। ইখো নিক্কেবা না·সং গিসিক ফি·ল্লে বিখো বিবিরা·জাজক।

আংগুর বাগাননি গামগিবারাংনি গল্প

³³ “দা·আও গি·সা গল্পখো আগান্না, খিন্নাবো। সাকসা নকগিবা গি·সা আংগুর বাগান দাক্কে উনি দিমদাক গিত্তা বেড়া দিমফেংজক। জা·মানো উয়া বাগানও আংগুর বিৎচিখো চিম্মংএ রা·রিকনা হা·খল খিতজক আরো উখো রাক্ষিনা গি·সা চুগিবা নকখো রিকজক। উনি জা·মানো মিত্তাম গামগিবারাংচা উয়া বাগানখো নিরকখিনা দন্নে হা·সং গিপ্পিনচা রি·য়াংজক।

³⁴ বিথি মিনখারিও বিয়া আন·থাংনি বাকখো মান·ফানা বিনি নকখলরাংখো উয়া গামগিবারাংচা ওয়াত্তেতজক।

³⁵ গামগিবারাং বিনি নকখলরাংনি সাকসাখো রি·ম্মে দকজক, সাকসাখো স·ওতজক আরো সাকগিপ্পিনখো রং·থিচা গোথাতজক।

³⁶ ইনি জা·মানো বিয়া স্খাংনা বাত্তে নকখলরাংখো বাং·এ ওয়াত্তেতজক, ইন্দিবা গামগিবারাং উয়া নকখলরাংমুং উয়ানদাক্কেন দাকজক।

³⁷ আংগুর বাগাননি নকগিবা জা·মানচাবাকা আন·থাংনি দেফান্থিখোন বিসংচা ওয়াত্তেতজক। বিয়া ইন্দাকে চানচিজক, জে দাক্কেবা হং·খানা বিসং বিনি দেফান্থিখোদে মান্দিরা·নুয়া।

³⁸ ইন্দিবা উয়া গামগিবারাং দেফান্থিখো নিক্কে আন·থাংথাংও আগানগ্রিকজক, ‘ইয়ান জা·মানো গামনি নকগিবা হং·নুয়া। হাই, আনচিং বিখো স·ওতে গালনা,

³⁹ উনোদে আনচিংআন গামরাংনি নকগিবা হং·নুয়া।’ ইখো আগানে বিসং উয়া দেফান্থিখো রি·ম্মে আংগুর বাগাননি হা·ফালচানা রা·আংএ স·ওতে গালজক।

⁴⁰ ইন্দাকোদে আগানবোদা, আংগুর বাগাননি নকগিবা জেনসালো আন·থাংআন রি·বানুয়া উনসালো গামগিবারাংখো রা·এ বিয়া মুয়াখো দাকনুয়া?”

⁴¹ থরমনি দাল·গিবারাং যীশুনা আগানজক, “বিয়া উয়া নামগিজা মান্দিরাংখো ব·ন্নেতনুয়া আরো জে গামগিবারাং বিথি মিনখারিও বিনি মানগ্মিখো হ·ন্নুয়া বিসংচান উয়া আংগুর বাগানখো নিরকখিনা হ·ন্নুয়া।”

⁴² উনো যীশু বিসংনা আগানজক, “না·সং রংথালগিবা শাস্ত্রও মামুং সালোবা পড়িখুজামা, ‘জে রং·থিখো নকরিকগিবারাং জেগালে গাল্লামিং, উয়ান দা·আও নাংগিবা রং·থি হং·জক; গিত্তেলান ইখো দাকজক, আরো ইয়া আনচিংনি মিক্রোনও নাম্মেন আইয়াও ইনমানানি হং·আ?’

⁴³ ইনি গিম্মিন না·সংনা আগানিংআ, না·সংচানিখো ইসলনি সংনকখো রা·আংনুয়া আরো জেরাংনি জাংগিও উয়া সংনকনি বিথিখো নিকনুয়া ইন্দাকগিবা মান্দিরাংনা ইসলনি সংনকখো হ·ন্নুয়া।

⁴⁴ উয়া রং·থি সাক্কাও গা·আকগিবা বি·থংথাংনুয়া আরো উয়া রং·থি জে মান্দিনি সাক্কাও গা·আকনুয়া বিয়া গিজেম গিজেম বিন্নেকনুয়া।”

⁴⁵ খামাল দাল·গিবারাং আরো ফরীশীরাং যীশুনি স্খিয়ানি গল্পরাংখো খিন্নাএ হা·আইনা মান·জক বিয়া বিসংখোন আগানিংআ।

⁴⁶ উনো বিসং যীশুখো রিম·না হাম·জক, ইন্দিবা মান্দিরাংনা খেন্নে উখো দাকজাজক, মুয়ানা মান্দিরাং বিখো আগানসোগিবা ইন্নে চানচিনুয়ামিং।