মথিনি চকগিবা নাম্মা খাৎথা 18 - Garo New Testament

সা দাল·বাত্তা

¹ উয়া সময়ও জা·রিকগিবারাং যীশুচা রি·বাএ আগানজক, “সালগিনি সংনকো গিম্মিকনা বাত্তে সা দাল·বাত্তা?”

² উনো যীশু সাকসা বি·সাখো রিংগামে বিসংনি গিসেপো চাদেংএতে আগানজক,

³ “আংআ না·সংনা বিবিন আগানিংআ, না·সং গিসিক ফি·ল্লে বি·সা চনগিবারাং গিত্তা হং·জাওদে মামুং দাক্কেবা সালগিনি সংনকো নাপনা মান·জানুয়া।

⁴ জে মান্দি ইয়া বি·সা চনগিবারাং গিত্তা আন·থাংখো রিন্নকেতা বিয়ান সালগিনি সংনকো গিম্মিকনা দাল·বাত্তা।

⁵ আরো জে মান্দি ইন্দাকগিবা বি·সা চনগিবা সাকসাখো আংনি বিমুংও রা·চাকা বিয়া আংখোন রা·চাকা।

পাপনি রামাওনা রিম্মাংআ

⁶ “আংখো বিবিরা·গিবা ইয়া চনগিবা বি·সারাংওনি সাকসাখো সাবা পাপনি রামাওনা রিম্মাংওদে উনোদে বিনি গিদ্দকো গি·সা দা·ল্লা রং·থিখো খাদিংদিয়ে বিখো সাগালনি চিও রিপ্পেতান বিনা নামবাত্তা।

⁷ আইয়াও হা·গিলসাক! পাপনি রামাও রিম্মাংনা বাসিক চলরাংআন নাং·চা দংআ! উয়া চলরাংদে রি·বানোন; ইন্দাকোবা হং·সিখানা উয়া মান্দিনা, জেচা উয়া চলরাং রি·বাআ!

⁸ “নাং·নি জাক হং·জাওবা জা·চক নাং·খো পাপনি রামাওনা সাল্লাংওদে উখো দেন·থংএ গাল্লেতবো। জাক সামগ্মি আরো জা·চক সামগ্মিখো রা·এ ফাংনাজলনি ওয়া·আলো গা·আকানা বাত্তে জাকখরা বা জা·খরা হং·এ জাংগিও নাপ্পান নাং·না নামবাত্তা।

⁹ নাং·নি মিক্রোন নাং·খো পাপনি রামাওনা সাল্লাংওদে উখো ওত্তে গাল্লেতবো। মিক্রোন সামগ্মিখো রা·এ নরকনি ওয়া·আলো গা·আকনা বাত্তে মিকগ্রি হং·এ জাংগিও নাপ্পান নাং·না নামবাত্তা।

¹⁰ “নিবো, ইয়া চনগিবারাংওনি সাকসাখোবা না·সং জেদাক্কে চন্নিকজা। আংআ না·সংনা আগানিংআ, সালগিও বিসংনি সা·গ্রেরাং ফাংনান সালগিও দংগিবা আংনি ফানি মিকখাংখো নিক্কিংআ।

¹¹ “ব্রাংগিবাখো জক্কেৎনা মান্দিনি দেফান্থি রি·বাআ। না·সং বাদিকে চানচিয়া?

¹² সাকসা মান্দিনি মাংরিৎচাসা মেষ দংআনা। উরাংনি গিসেপো মাংসা ব্রাংএ গিপ্পিন রামাচা রি·য়াংওদে বিয়া মাংসতস্খু স্খুখো হা·ব্রি রিক্কামো দন্নে উয়া গিম্মাগিবা মেষখো সান্দিনা রি·য়াংজামা?

¹³ আংআ না·সংনা বিবিন আগানিংআ, বিয়া উখো সান্দি মা·ন্নোদে উয়া ব্রাংগিজাগিবা মাংসতস্খু স্খুনা বাত্তে উয়া গিম্মাগিবানান বিয়া খুসি হং·বাত্তা।

¹⁴ উয়ানদাক্কেন, ইয়া চনগিবারাংওনি সাকসা গিম্মাখানা ইন্দাকে না·সংনি সালগিও দংগিবা ফানি হা·সিকা হং·জা।

জে জংআদা পাপ দাক্কা

¹⁵ “নাং·নি জংআদা নাং·নি সাক্কাও পাপখো দাক্কোদে, জে সময়ও বিনি সেফাংও দারাংবা দংজানুয়া উনো বিচা রি·য়াংএ বিনি পাপখো ফিন্নিকেতবো। বিয়া নাং·নি খাৎথাখো খিন্নাওদে না·আ নাং·নি জংআদাখো মানফিল·জক।

¹⁶ ইন্দিবা বিয়া খিন্নাচাকজাওদে সাকগিপ্পিনখো নাং·মুং রা·আংবো, জেদাক্কে সাকগ্মি বা সাকগিত্থাম সাক্ষিরাংনি খাৎথাচা ইয়া গিম্মিকান বিবি হং·আ ইন্নে ফিন্নিকনা মা·ন্না।

¹⁷ বিসংনি খাৎথাখো খিন্নাচাকজাওদে মন্ডলিনা আগানবো। মন্ডলিনি খাৎথাখোবা খিন্নাজাওদে উনোদে নাং·চা বিয়া গিপ্পিন জাত বা খাজিনা গিলগিবা গিত্তা হং·খানা।

¹⁸ “আংআ না·সংনা বিবিন আগানিংআ, না·সং হা·গিলসাকো জেখো খানুয়া সালগিওবা উখো খানুয়া, আরো জেখো এংনুয়া উখো সালগিওবা এংএ হ·ন্নুয়া।

¹⁹ “আংআ না·সংনা আরোবা আগানিংআ, না·সংনি গিসেপো সাকগ্মি মান্দি মামুংনা আপসান হং·গ্রিকে বি·ওদে সালগিও দংগিবা আংনি আপফা না·সংনি গিম্মিন উখো দাকচাকনুয়া,

²⁰ মুয়ানা জেও সাকগ্মি বা সাকগিত্থাম আংনি বিমুংও থ·ম্মা উয়োন আংআ বিসংনি গিসেপো দংআ।”

জে নকখল ক্ষেমা দাকজা

²¹ উনোন পিতর রি·বাএ যীশুনা আগানজক, “গিত্তেল, আংনি জংআদা আংনি সাক্কাও পাপ দাক্কোদে আংআ বিখো বাসিক রাং·সা ক্ষেমা দাকনুয়া? চাংস্নিনা দিপ্পাৎমা?”

²² যীশু বিনা আগানজক, “চাংস্নিনাসান হং·জা, ইন্দিবা স্নি চাংসৎস্নিনা দিপ্পাৎ ক্ষেমা দাকনা আগানা।

²³ “নিবো, সালগিনি সংনক ইন্দাকগিবা রাজা গিত্তা হং·আ জে আন·থাংনি নকখলরাংচা হিসাব হাম·জক।

²⁴ বিয়া হিসাব রা·না হা·বাচেংও নকখলরাংনি গিসেপো ইন্দাকগিবা সাকসা নকখলখো রা·বাজক, জে নকখলনি রাজানা বাং·এ জিন্নাং চতনা দংআমিং।

²⁵ জিন্নাং চত্‌না বিনি বিল দংজামিং। উনোন উয়া নকগিবা উয়া মান্দিখো আরো বিনি জিকগিবা আরো দেদ্রাংখো আরো বিচা দংগিবা গিম্মিকখো ফাল্লে জিন্নাংখো চত্‌না গি·য়েৎজক।

²⁶ উনি গিম্মিন উয়া নকখল হা·আও গা·আকে নকগিবানি জা·চকখো রি·ম্মে আগানজক, ‘ও গিত্তেল, আংনা চাকচিকখুবো, নাং·না গিম্মিকখোন আংআ চতনুয়া।’

²⁷ উনো নকগিবা খা·সাচাক্কে উয়া নকখলখো ওয়াত্তেতজক আরো বিনি জিন্নাংখো ক্ষেমা দাকজক।

²⁸ “জা·মানো উয়া নকখল হা·ফালচা রি·য়াংএ বিমুং রিম·ফাগিবা সাকসা নকখলখো নিকনা মান·জক। বিচা উয়া নকখল রিপ্পেংনি রিৎচাসা থাংখা জিন্নাং দংআমিং। উয়া নকখল বিনি রিপ্পেংনি গিত্তকখো রিম·সত্তে আগানজক, ‘নাং·নি জিন্নাংখো চতবো।’

²⁹ “নকখল উনো বিনি জা·চকো গা·আকে বিখো মল·মলে আগানজক, ‘আংনা চাকচিকখুবো, আংআ গিম্মিকখো চতনুয়া।’

³⁰ ইন্দিবা বিয়া গং·জাজক বাত্তেসা জিন্নাং চতখুজানা দিপ্পাৎ বিখো ফাতোকো দনজক।

³¹ “ইন্দাকারাংখো নিক্কে বিমুং রিম·ফাগিবা গিপ্পিন নকখলরাং নাম্মেন গিসিক সা·দিকজক। বিসং রি·য়াংএ বিসংনি নকগিবানা গিম্মিক খাৎথাখো হা·আইএতজক।

³² নকগিবা উনোন উয়া নকখলখো রিংগামে আগানজক, ‘নামগিজাগিবা নকখল! না·আ আংখো মল·মলে আগানানা আংআ নাং·নি জিন্নাং গিম্মিকখো ক্ষেমা দাকজকমিং।

³³ জেদাক্কে আংআ নাং·না খা·সাচাক্কামিং উয়ানদাক্কেন না·আবা বিনা খা·সাচাকনা নাংজামিংমা?’

³⁴ জা·মানো নকগিবা খা·আওনাংএ বিনি জিন্নাং গিম্মিকখো চতখুজানা দিপ্পাৎ বিখো শাস্তি হ·ন্না ফাতকনি মান্দিরাংনি জাক্কো হন·জক।

³⁵ “উয়ানদাক্কেন, না·সং গিম্মিকান না·সংনি জংআদাখো খা·থংও ক্ষেমা দাকজাওদে সালগিও দংগিবা আংনি ফাবা না·সংনি সাক্কাও ইন্দাকে দাকনুয়া।”