মথিনি চকগিবা নাম্মা খাৎথা 17 - Garo New Testament

গিত্তেল যীশুনি মিকখাং থেং·সুয়া

¹ উনি সালদকনি জা·মানো যীশু পিতর, যাকোব আরো যাকোবনি জংগিবা যোহনখোসান রিমবিত্তে চুয়াকগিবা হা·ব্রি গি·সাওনা রি·য়াংজক।

² বিসংনি মিকখাংও যীশুনি মিকখাং বিমাং দিংথাং হং·জক। বিনি মিকখাং সাল গিত্তা থেং·সুজক আরো

³ বিনি বা·রারাংবা সেং·আ গিত্তা বকজক। বিসং এলিয় আরো মোশিখো যীশুমুং খাৎথা আগানাখো নিকনা মান·জক।

⁴ উনো পিতর যীশুনা আগানজক, “গিত্তেল, ইনো চিংআ দংআ, ইয়ান নামজক। না·আ হা·ম্মোদে ইনো আংআ নকথুপ গি·গিত্থাম রিকনুয়া- নাং·না গি·সা, মোশিনা গি·সা আরো এলিয়না গি·সা।”

⁵ পিতরনি খাৎথা আগানমিত্তিংও চিং·গিবা গাদিলা খানসা রি·বাএ বিসংখো সালাখিমদাপজক। উয়া গাদিলাওনি ইয়া খু·রাংখো খিন্নানা মান·জক, ‘‘ইয়ান আংনি খা·সাগিবা দেফান্থি, জেও আংআ খুসি হং·বিয়া। না·সং বিনি খাৎথাখো খিন্নাচাকবো।’’

⁶ ইখো খিন্নাএ জা·রিকগিবারাং নাম্মেন খেনচাকে হা·আও থুগপজক।

⁷ যীশু উনো রি·বাএ বিসংখো দাংথাপেতে আগানজক, “চাখাতবো, দা·আ খেন্নাবো।”

⁸ উনো বিসং সাক্কাচানা নিগদোয়ে যীশুনি আগ্রে দারাংখোবা নিকজাজক।

⁹ বিসং হা·ব্রিওনি হং·খাতমিত্তিংও যীশু বিসংনা ইন্দাকে গি·য়েৎজক, “না·সং জেখো নিকজক, উখো মান্দিনি দেফান্থি সিয়াওনি চাখাতখুজানা দিপ্পাৎ দারাংনাবা দা·আ আগানাবো।”

¹⁰ জা·রিকগিবারাং বিচা সিং·জক, “ইন্দাকোদে স্খাং এলিয়নি রি·বানা নাংআ ইন্নে শাস্ত্র স্খিগিবারাং মুয়ানা আগানিংআ?”

¹¹ যীশু বিসংনা আগানচাকজক, “এলিয় বিবিন রি·বানুয়া আরো গিম্মিকখোন স্খাংনি অবস্থাও রা·বাফিলনুয়া।

¹² ইন্দিবা আংআ না·সংনা আগানিংআ, এলিয় রি·বামিং আরো মান্দিরাং বিখো হা·আইনা মান·জাজক। মান্দিরাং হা·সিকা গিত্তা বিনি সাক্কাও নামগিজাখো দাকজক। মান্দিনি দেফান্থিখোবা ইন্দাকেন মান্দিরাংনি জাক্কো দুক চাকনা নাংনুয়া।”

¹³ উনোন জা·রিকগিবারাং হা·আইনা মান·জক, বিয়া বিসংচা রিপ্পলেতগিবা যোহনখো আগানিংআ।

গিসিক নামগিজাগিবা মান·গিবা মি·আসা বি·সা নামজক

¹⁴ যীশু আরো বিনি জা·রিকগিবারাং মান্দিরাংচা রি·বাফিলো মান্দি সাকসা রি·বাএ যীশুনি মিকখাংও জা·স্খু দে·ম্মে আসংএ আগানজক,

¹⁵ “না·আ আংনি দেফান্থিনা খা·সাচাকবো। বিয়া মির্‌কা হং·এ নাম্মেন দুক মা·ন্নিংজক। ফিল·নিফিল বিয়া ওয়া·আলো আরো চিও গা·আকা।

¹⁶ আংআ বিখো নাং·নি জা·রিকগিবারাংচা রা·বামিং ইন্দিবা বিসং নাম্মেতনা মান·জাজক।”

¹⁷ যীশু আগানচাকে ইনজক, “বিবিরা·গিজাগিবা আরো দেংগু মান্দিরাং! আংআ বাসিক না·সংমুং দংনুয়া? বাসিক না·সংখো চাকচিকনুয়া? মি·আসা বি·সাখো ইনো আংচানা রিমবাবো।”

¹⁸ যীশু উয়া গিসিক নামগিজাগিবাখো ইন্দাতানি জা·মানো উয়া মি·আসা বি·সাওনি হং·খাতে রি·য়াংজক, আরো উনোন মি·আসা বি·সাবা নামজক।

¹⁹ উনি জা·মানো জা·রিকগিবারাং সিউল দাক্কে যীশুচা রি·বাএ আগানজক, “চিংআ মুয়ানা উয়া গিসিক নামগিজাগিবাখো হা·রিকনা মান·জাজক?”

²⁰ যীশু বিসংনা আগানজক, “না·সংনি বিবিরা·ব্রিজানি গান্দা না·সং মান·জাজক। আংআ না·সংনা বিবিন আগানিংআ, সুলসো বিৎচ্রি রংসা গিত্তা না·সংনি বিবিরা·আ দংওদে ইন্দাকোদে না·সং ইয়া হা·ব্রিখো আগানবো, ‘ইনোনি হাইওয়াচা রি·য়াংবো,’ আরো উনোন উয়া রি·য়াংনুয়া। না·সংনি মান·গিজা মামুংবা দংজানুয়া।

²¹ বি·আনি আরো অকগুমুন দংআনি আগ্রে ইন্দাকা গিসিক নামগিজাগিবা মামুং দাক্কেবা হং·খাতজা।

²² জা·মানো গালীল হা·সং গিত্তা রি·য়াংমিত্তিংও যীশু আন·থাংনি জা·রিকগিবারাংনা আগানজক, “মান্দিনি দেফান্থিখো মান্দিরাংনি জাক্কো রি·ম্মে হ·ন্নুয়া।

²³ মান্দিরাং বিখো স·ওতে গালনুয়া, আরো সাল গিত্থামনি সালো বিয়া সিয়াওনি থাংচাফিলনুয়া।” উনি গিম্মিন জা·রিকগিবারাং নাম্মেন দুক মান·থকজক।

থরম নকনি খাজিনা

²⁴ জা·মানো যীশু আরো বিনি জা·রিকগিবারাং কফরনাহূমওনা রি·য়াংমান্নো থরম নকনি খাজিনা গিলগিবারাং পিতরচা রি·বাএ আগানজক, “না·সংনি স্খিগিবা থরম নকনি খাজিনাখো হন·জামা?”

²⁵ পিতর আগানজক, “হো·এ, হ·ন্না।” উনি জা·মানো পিতর নক্কোনা রি·বাএ মামুংখো আগান্না স্খাংআন যীশু বিনা আগানজক, “শিমোন, না·আ বাদিকে চানচিয়া? ইয়া হা·গিলসাকনি রাজারাং সাচানিখো খাজিনা রা·আংআ? হা·সংথাংনি মান্দিরাংচানিখোমা, গিপ্পিন সংনি মান্দিরাংচানিখো?”

²⁶ পিতর আগানজক, “সংগিপ্পিননি মান্দিরাংচানিখো।” উনো যীশু বিনা আগানজক, “ইন্দাকোদে সংথাংনি মান্দিরাং উয়োনি জকজক।

²⁷ ইন্দিবা আনচিং খাজিনা গিলগিবারাংখো চন্নিকেতজানা গিত্তা, না·আ সাগালও রি·য়াংএ বড়শী গোবো, আরো স্খাং গাদুগিবা না·থকনি খু·সুকখো এংএ উনি নিং·আও রূপানি থাংখা গং·সাখো মা·ন্নুয়া। উখো রা·আংএ নাং·নি আরো আংনি খাজিনাখো হন·বো।”