মথিনি চকগিবা নাম্মা খাৎথা 12 - Garo New Testament

মান্দিনি দেফান্থিন নেং·থাকানি সালনি নকগিবা

¹ সালসাও যীশু গমনি দামসা হা·বা গিত্তা রি·য়াংআমিং। উয়া সাল নেং·থাকানি সালমিং। বিনি জা·রিকগিবারাং অকখ্রিয়ানি গিম্মিন গম বিথিখো আক্কে চা·না হা·বাচেংজক।

² উখো নিক্কে ফরীশীরাং যীশুনা আগানজক, ‘‘থরমনি নিয়াম গিত্তা নেং·থাকানি সালো জেখো দাকনা নাংজা, নিবো, নাং·নি জা·রিকগিবারাং উখোন দাক্কিংআ।’’

³ যীশু বিসংনা আগানজক, ‘‘দায়ূদ আরো বিনি রিপ্পেংরাং জেনসালো অকখ্রিয়ামিং উনো বিয়া মুয়াখো দাক্কামিং উখো না·সং পড়িখুজামা? বিয়াদে ইসলনি নক্কো নাপ্পে বিনা চিন·গিবা রুটিখো চা·আমিং।

⁴ দায়ূদ আরো বিনি রিপ্পেংরাংনি উখো চা·না খ্রাজামিং, ইন্দিবা খামালরাংসান উখো চা·না মা·ন্নামিং।

⁵ ইনা আগ্রে না·সং মোশিনি নিয়ামরাংও ইখো পড়িখুজামা, নেং·থাকানি সালো থরম নকনি খামালরাং নেং·থাকানি সালনি নিয়ামখো ফি·ওবা বিসংনি গ্রো নাংজা?

⁶ আংআ না·সংনা আগানিংআ, থরম নকনা বাত্তেবা দাল·বাত্তা ইনো সাকসা দংআ।

⁷ ‘আংআ খা·সাচাক্কাখো নিনা হা·ম্মা, বলি হ·ন্নাখো হং·জা’-ইয়া খাৎথানি অর্থখো না·সং হা·আইওদে গ্রো নাংগিজাগিবারাংখো গ্রো নাংএতজানুয়ামিং।

⁸ হা·আইএ রা·রিকবো, মান্দিনি দেফান্থিন নেং·থাকানি সালনি নকগিবা হং·আ।’’

জাক সিক্রেপগিবা নামজক

⁹ জা·মানো উয়া হা·দামখো ওয়াত্তে যীশু উয়া ফরীশীরাংনি থম·দাকরামচানা রি·য়াংজক।

¹⁰ উনো জাক সিক্রেপগিবা সাকসা মান্দি দংআমিং। যীশুখো গ্র্রো নাংএতনা ইন্নে ফরীশীরাং বিনা আগানজক, ‘‘থরমনি নিয়াম গিত্তা নেং·থাকানি সালো সাগিবাখো নাম্মেতনা খ্রাআমা?’’

¹¹ যীশু বিসংনা আগানজক, ‘‘ইন্দাকে চানচিচিপবো, না·সংনি গিসেপো সাকসানি মাংসা মেষ দংআ। উয়া মেষ নেং·থাকানি সালো হা·খলো গা·আকোদে বিয়া উখো রি·ম্মে সালদোজানোমা?

¹² আরো মেষনা বাত্তে মান্দিনি দাম নাম্মেন বাং·বাত্তা। ইন্দাকোদে ইখোন নিকনা মা·ন্নিংআ, নেং·থাকানি সালো নাম্মা কামখো দাক্কা খ্রাআ।’’

¹³ জা·মানো বিয়া উয়া মান্দিনা আগানজক, ‘‘নাং·নি জাকখো সিল্লেতবো।’’ বিয়া আন·থাংনি জাকখো সিল্লেতোন উয়া জাক বিনি জাক সামসা গিত্তান নাম্মাংজক।

¹⁴ উনো ফরীশীরাং হা·ফালচা রি·য়াংজক আরো যীশুখো স·ওতে গালনা খু·মংজক।

ইসলনি বাচ্ছিয়ে রা·গিবা মান্দি

¹⁵ বিসংনি খু·মংগ্রিকাখো হা·আইনা মা·ন্নে যীশু উয়োনি হং·খাতে রি·য়াংজক। উনো বাং·আ মান্দিরাং বিখো জা·রিকফাজক।

¹⁶ বিসংনি গিসেপো জম্মা-সা দংগিবারাংখো বিয়া নাম্মেতজক আরো বিনি খাৎথাখো আগানজাখানা বেং·জক।

¹⁷ ইরাং হং·জক জেদাক্কে আগানসোগিবা যিশাইয়নি আগানসোগিবা ইয়া খাৎথা চু·সকা:

¹⁸ নিবো, আংনি নকখল জেখো আংআ বাচ্ছিয়ে রা·জক। ইয়ান আংনি নামনিকগিবা জেনি সাক্কাও আংআ খুসি হং·বিয়া। আংআ বিনি সাক্কাও আংনি গিসিকখো হ·ন্নুয়া, আরো বিয়া গিপ্পিন জাতরাংচা খাকখেৎ বিচালখো আগানফ্রাকনুয়া।

¹⁹ বিয়া নিরিজানুয়া আরো চ্রিকজানুয়া; বিনি খু·রাংখো রামারাংও খিন্নাদিলজানুয়া।

²⁰ খাকখেৎ বিচালখো হাম্মেতজা দিপ্পাৎ বিয়া বি·গপগিবা নলবিফাংখো ফি·জানুয়া আরো দিম্মিত দিম্মিত দাক্কে চিং·গিবা থচ্রিখো খিম্মিতজানুয়া।

²¹ বিনি সাক্কাওন গিপ্পিন জাতরাং খা·দংনুয়া।

গিত্তেল যীশু আরো গিসিক নামগিজাগিবারাংনি রাজা

²² মান্দিরাং জা·মানো গিসিক নামগিজাগিবা মান·গিবা সাকসা মান্দিখো যীশুচা রা·বাজক। উয়া মিকগ্রি আরো আব্রা মান্দিমিং। যীশু বিখো নাম্মেতজক।

²³ উনি গিম্মিন উয়া মান্দি খাৎথা আগান্না আরো নিকনা মান·জক। উনো মান্দিরাং আইয়াও ইনমানে আগানজক, ‘‘ইয়ান দায়ূদনি উয়া দেফান্থিমা?’’

²⁴ ফরীশীরাং ইয়া খাৎথাখো খিন্নাএ আগানজক, ‘‘বিয়াদে গিসিক নামগিজাগিবানি রাজা বেল্‌সবূলো ফাংচাকে গিসিক নামগিজাগিবারাংখো হা·রিকা।’’

²⁵ ফরীশীরাংনি গিসিকথাংও চানচিয়াখো হা·আইনা মা·ন্নে যীশু বিসংনা আগানজক, ‘‘আন·থাংথাংনি গিসেপো বোবিল হং·এ দিংথাং হং·গ্রিকগিবা সংনকদে ব·ন্নাংনুয়া। আরো আন·থাংথাংনি গিসেপো বোবিল হং·এ দিংথাং হং·গ্রিকগিবা সংজিলমা বা নকসানি মান্দিবা আন·থাংথাংও থম·থম দংজা।

²⁶ শয়তান শয়তানখোন হা·রিকজকোদে বিয়া আন·থাংনি গিসেপোন দিংথাং হং·আংআ। উনোদে বিনি সংনক বাদিকে থম·থম দংনুয়া?

²⁷ আংআ বেল্‌সবূলো ফাংচাকে গিসিক নামগিজাগিবারাংখো হা·রিকোদে, ইন্দাকোদে না·সংনি মান্দিরাং সাখো ফাংচাকে উরাংখো হা·রিকা? না·সং খাকখেৎ খাৎথাখো আগানামা, উখো না·সংনি মান্দিরাংআন বিচাল দাকনুয়া।

²⁸ ইন্দিবা আংআ ইসলনি গিসিকচা গিসিক নামগিজাগিবাখো হা·রিকোদে ইন্দাকোদে ইসলনি সংনক না·সংওনা সকজক।

²⁹ ‘‘স্খাং বিলগ্মাং মান্দিখো খাজাওদে সা বিনি নক্কো নাপ্পে গামজিনরাংখো রা·সেকনা মা·ন্নুয়া? খাজকোদে বিয়া উখো দাকনা মা·ন্নুয়া।

³⁰ ‘‘আংনা চাকগিজাগিবা আংখো চাংফেংগিবা হং·আ। সাবা আংমুং খল্লামজাওদে বিয়া বিলদিং বিলদাং দাক্কা।

³¹ ইনি গিম্মিন আংআ না·সংনা আগানিংআ, মান্দিনি গিম্মিক পাপরাং আরো ইসলখো রা·এ খাল·স্থাপারাংখো ক্ষেমা দাকনুয়া, ইন্দিবা গিসিক রংথালগিবাখো রা·এ খাল·স্থাপাখো ক্ষেমা দাকজানুয়া।

³² মান্দিনি দেফান্থিখো চাংফেংএ আগানগিবাখো ক্ষেমা দাকনুয়া, ইন্দিবা গিসিক রংথালগিবাখো চাংফেংএ আগানগিবাখো ক্ষেমা দাকজানুয়া-ইয়া চাসংও হং·জা, আম্বুন চাসংওবা হং·জা।

বিথিচান বিফাংখো হা·আইনা মা·ন্না

³³ ‘‘ইয়া খাৎথাখো মানিয়ে রা·বো, বিফাং নাম্মোদে উনি বিথিবা নামনুয়া, দা·আবা বিফাং নামজাওদে উনি বিথিবা নামজানুয়া; মুয়ানা বিথিচান ফাংখো হা·আইনা মা·ন্না।

³⁴ চিপ্পুনি দেদ্রাং! আন·থাংসং নামগিজা হং·এ বাদিকে না·সং নাম্মাখো আগান্না মা·ন্না? মান্দিনি খা·থং জেগিত্তা হং·আ খু·সুকদে উখোন আগানা।

³⁵ নামগিবা মান্দি নামগিবা খা·থংওনি খাৎথা নাম্মাখো আগানা, আরো নামগিজা মান্দি নামগিজা খা·থংওনি খাৎথা নামগিজাখো আগানা।

³⁶ ইন্দিবা আংআ না·সংনা আগানিংআ, মান্দিরাং জে নামগিজা খাৎথারাংখো আগানা, বিচালনি সালো বিসংনি মিংফ্রাকফ্রাক খাৎথানি গিম্মিন হিসাব হ·ন্না নাংনুয়া।

³⁷ নাং·নি খাৎথারাংচান নাং·খো নাম্মা ইন্নুয়া আরো নাং·নি খাৎথারাংচান নাং·খো গ্রো নাংএতনুয়া।’’

ফরীশীরাং চিনখো সান্দিয়া

³⁸ উনি জা·মানো মিত্তাম শাস্ত্র স্খিগিবা আরো ফরীশীরাং যীশুনা আগানজক, ‘‘স্খিগিবা, নাং·চানিখো চিংআ গি·সা চিনখো নিনা হা·ম্মিংআ।’’

³⁹ যীশু বিসংনা আগানজক, ‘‘ইয়া চাসংনি নামগিজাগিবা আরো বিবিরা·গিজাগিবা মান্দিরাং চিনখো হা·ম্মা, ইন্দিবা যোনা আগানসোগিবানি চিননা আগ্রে বিসংনা মামুং চিনখোন ফিন্নিকজানুয়া।

⁴⁰ জেদাক্কে যোনা সাল গিত্থাম ওয়াল গিত্থাম না·থকনি বিকমাও দংআমিং মান্দিনি দেফান্থিবান উয়ানদাক্কে সাল গিত্থাম ওয়াল গিত্থাম হা·আনি নিং·আও দংনুয়া।

⁴¹ বিচালনি সালো নীনবী সংজিলমানি মান্দিরাং চাখাত্তে ইয়া চাসংনি মান্দিরাংনি গ্রোখো ফিন্নিকেতনুয়া, মুয়ানা নীনবীনি মান্দিরাং যোনানি আগানফ্রাকানি গিম্মিন পাপওনি গিসিক ফি·ল্লামিং। আরো নিবো, যোনানা বাতগিবা সাকসা ইনো দংআ।

⁴² বিচালনি সালো সালগিপেংচানি রানী চাখাত্তে ইয়া চাসংনি মান্দিরাংনি গ্রোখো ফিন্নিকেতনুয়া, মুয়ানা শলোমন রাজানি হা·আইয়ানিখো খিন্নাথিমনা বিয়া হা·গিলসাকনি বন·চতগিবা হা·দামওনি রি·বামিং। আরো নিবো, শলোমননা বাতগিবা সাকসা ইনো দংআ।

⁴³ “জেনসালো গিসিক নামগিজাগিবা মান্দিওনি হং·খাতে রি·য়াংআ উনো বিয়া নেং·থাকনা ইন্নে রান·গিবা হা·দামরাংও রওমে দংনা হা·বাচেংআ।

⁴⁴ ইন্দিবা উখো মান·জাএ বিয়া আগানা, ‘জেওনি হং·খাতবামিং আংনি উয়া নক্কোনান আংআ রি·য়াংফিলনুয়া।’ বিয়া রি·বাফিলে উয়া নকখো বাংবাং দাক্কে, চি·রংএ আরো থারিয়ে দন্নাখো নিকনা মা·ন্না।

⁴⁵ জা·মানো উয়া গিসিক নামগিজাগিবা আন·থাংনা বাত্তে আরোবা নামবাৎগিজা গিপ্পিন গিসিক স্নিখো রি·ম্মে রা·বাআ আরো উয়ো নাপ্পে দংখামা। উনি গিম্মিন উয়া মান্দিনি স্খাংনা বাত্তে বন·চতগিবা অবস্থা নামজাবাত্তা।’’ ইয়া চাসংনি নামগিজা মান্দিরাংনি অবস্থাবা উগিত্তান হং·নুয়া।’’

গিত্তেল যীশুনি মা·গিবা আরো জংগিবা সারাং?

⁴⁶ যীশু মান্দিরাংমুং খাৎথা আগানমিত্তিংও বিনি মা·গিবা আরো জংগিবারাং বিমুং খাৎথা আগানগ্রিকনা ইন্নে হা·ফালচা চাদেংএ দংআমিং।

⁴⁷ সাকসা মান্দি বিনা আগানজক, ‘‘নিবো, নাং·নি মা·গিবা আরো জংগিবারাং নাং·মুং আগানগ্রিকনা হা·ফালও চাদেংএ দংআ।’’

⁴⁸ উনো যীশু বিনা আগানজক, ‘‘আংনি মা·গিবা আরো আংনি জংগিবাবা সারাং?’’

⁴⁹ জা·মানো বিয়া আন·থাংনি জা·রিকগিবারাংখো ফিন্নিকে আগানজক, ‘‘ইয়া নিবো, আংনি মা·গিবা আরো জংগিবারাং;

⁵⁰ মুয়ানা সালগিও দংগিবা আংনি ফানি নামনিকাখো দাকগিবান আংনি জংগিবা, নগিবা আরো মা·গিবা হং·আ।’’