লূকনি চকগিবা নাম্মা খাৎথা 3 - Garo New Testament

রিপ্পলেতগিবা যোহননি আগানফ্রাকা

¹ তিবিরিয় কৈসর রোমনি সম্রাট হং·আনি চি·বংআগিবা বিলসিও পন্তীয় পীলাত যিহূদিয়া হা·দকনি দাল·গিবা শাসন দাকগিবা হং·আমিং। হেরোদ উনো গালীল হা·দকখো আরো বিনি জংগিবা ফিলিপ যিতুরিয়া হা·দকখো আরো ত্রাখোনীতিয়াখো শাসন দাক্কিংআমিং। লুষানিয়া অবিলীনীনি শাসন দাকগিবা হং·আমিং,

² আরো হানন আরো কাইয়াফা যিহূদীরাংনি খামাল দাল·বাৎগিবা দংআমিং। উয়া সময়ওন হা·গিসি জওলো সখরিয়নি দেফান্থি যোহনচা ইসল আন·থাংনি খাৎথাখো ফারাকজক।

³ উনোন যোহন যর্দন চিবিমানি সামবারাংনি হা·দাম গিম্মিকচা রি·য়াংএ আগানফ্রাকনা হা·বাচেংজক জেদাক্কে মান্দিরাং পাপওনি ক্ষেমা মা·ন্না পাপওনি গিসিক ফি·ল্লা আরো উনি চিন গিত্তা রিপ্পলা।

⁴ আগানসোগিবা যিশাইয়নি খি·তাপও জেদাক্কে চক্কা দংআ উয়ানদাক্কেন ইয়ারাং হং·জক। চক্কা দংআ, “হা·গিসি জওলো সাকসানি খু·রাং চ্রিকে আগানসোংআ, ‘না·সং গিত্তেলনি রামাখো থারিসোবো, বিনি রি·য়ানি রামাখো স্রংএ থারিবো।

⁵ গিম্মিক হা·খংখো গাপ্পেতনুয়া, হা·ব্রিরাংখো হনদিমেতনুয়া। গংগিয়া রামাখো স্রংএতনুয়া, গা·নাংগিজা রামাখো গা·নাংএতনুয়া।

⁶ মান্দিখো পাপওনি জক্কেৎনা ইন্নে ইসল জেখো দাকজক, গিম্মিক মান্দিরাংআন উখো নিকনা মা·ন্নুয়া।’ ”

⁷ উনোন বাং·আ মান্দি রিপ্পলনা ইন্নে যোহনচা রি·বানা হা·বাচেংজক। যোহন বিসংনা আগানজক, “চিপ্পুনি দেদ্রাং! ইসলচানি রি·বাগিবা শাস্তিওনি খাত্তে জকনা ইয়া বুদ্ধিখো সা না·সংনা হন·জক?

⁸ না·সংনি পাপওনি গিসিক ফি·ল্লানি খ্রাখ্রা বিথিখো না·সংনি জাংগি থাংআনিও ফিন্নিকবো। না·সং অব্রাহামনি মা·চংনি মান্দি ইখো গিসিকথাংও দা·আ চানচিয়াবো। আংআ না·সংনা আগানিংআ, ইয়া রং·থিরাংনিখো ইসল অব্রাহামনি দেদ্রাংখো আৎচিয়েতনা মা·ন্না।

⁹ ফাংনি জা·থিংও রুয়াখো দন্নান দংআ। জে বিফাংও নাম্মা বিথি নাংজা উখো দেন·ফাকেন ওয়া·আলো গাল্লেতনুয়া।”

¹⁰ উনোন মান্দিরাং যোহনচা সিং·জক, “ইন্দাকোদে চিংআ মুয়াখো দাকনুয়া?”

¹¹ যোহন বিসংনা আগানচাকজক, “সানিবা চলা ফাৎগ্মি দংওদে বিয়া চলাগ্রি দংগিবানা চলা ফাৎসা হন·খানা। চা·আ দংগিবাবা উয়ানদাক্কেন দাকখানা।”

¹² মিত্তাম খাজিনা গিলগিবারাং রিপ্পলনা রি·বাএ যোহননা আগানজক, “স্খিগিবা, চিংআ মুয়াখো দাকনুয়া?”

¹³ বিয়া বিসংনা আগানজক, “নিয়ামও দংগিবানা বাত্তে দা·আ বাং·এ রা·আবো।”

¹⁴ মিত্তাম সিপাইরাংবা বিখো সিং·জক, “চিংআ আরবা মুয়াখো দাকনুয়া?” বিয়া উয়া সিপাইরাংনা আগানজক, “দ্রাএ বা অন্যায় দাক্কে সাকসানিখোবা দা·আ মামুংখো সেক্কি রা·আবো আরো না·সংনি বেতনচান খুসি হং·এ দংবো।”

¹⁵ মান্দিরাং গিসিকথাংও নাম্মেন খা·দংএ চানচিংআমিং যোহনআন খ্রীষ্টখোন।

¹⁶ উনোন যোহন বিসং দিমদাকনান আগানজক, “আংআ না·সংখো চিও রিপ্পলেতিংআ, ইন্দিবা আংনা বাত্তে বিল্লাকবাৎগিবা রি·বাংজক। আংআ বিনি জা·খপনি ফিতাখো এংনাবা খ্রাজা। বিয়া গিসিক রংথালগিবাও আরো ওয়া·আলো না·সংখো রিপ্পলেতনুয়া।

¹⁷ বিনি জাক্কোন রুয়ান দংআ; উচা বিয়া আন·থাংনি মি মাড়াইগিবা হা·দামখো রংথালেতি মিখো জামও চিম্মংনুয়া, ইন্দিবা বিবুখোদে খিম্মিতনা মান·গিজাগিবা ওয়া·আলো সো·এ গালনুয়া।”

¹⁸ যোহন আরোবা বাং·আ খাৎথারাংচা মান্দিরাংখো খা·দংএতে ইসলনি হন·গিবা নাম্মা খাৎথাখো আগানফ্রাকজক।

¹⁹ শাসন দাকগিবা হেরোদ আদাথাংনি জিকগিবা হেরোদিয়াখো খিম্মানি গিম্মিন আরো বিনি বাং·আ নামগিজা কামরাংনি গিম্মিন যোহন বিনি গ্রোখো ফিন্নিকে হ·ন্নামিং।

²⁰ উয়ারাংনি গিম্মিন যোহনখো বিয়া জেলো দনজক। ইন্দাকেসা বিনি গিপ্পিন নামগিজা কামরাংমুং ইয়া নামগিজা কামবা আপসান হং·রিমজক।

গিত্তেল যীশুনি রিপ্পলা

²¹ যোহনচা রি·বাগিবা মান্দিরাংনি রিপ্পলমিত্তিংও যীশুবা রিপ্পলজক। রিপ্পলানি জা·মানো যীশুনি বি·মিত্তিংও সিলগা ফ্রাকাংজক।

²² উনোন গিসিক রংথালগিবা কইতর গিত্তা বিনি সাক্কাও হং·ওনবাজক, আরো সালগিনি ইয়া খাৎথাখো খিন্নানা মান·জক, “না·আন আংনি খা·সাগিবা দেফান্থি, নাং·খোন আংআ নামনিকবিয়া।”

গিত্তেল যীশুনি ফাগিৎচামরাং

²³ খলাৎচিমাং বিলসিও যীশু বিনি কামরাংখো দাকনা হা·বাচেংজক। বিয়া যোষেফনি দেফান্থি ইন্নে মান্দিরাং চানচিনুয়ামিং। যোষেফ এলিনি দেফান্থি;

²⁴ এলি মত্ততনি দেফান্থি, মত্তত লেবিনি দেফান্থি, লেবি মল্কিনি দেফান্থি, মল্কি যান্নায়নি দেফান্থি, যান্নায় যোষেফনি দেফান্থি;

²⁵ যোষেফ মত্তথিয়নি দেফান্থি, মত্তথিয় আমোসনি দেফান্থি, আমোস নহূমনি দেফান্থি, নহূম ইষ্‌লিনি দেফান্থি, ইষ্‌লি নগিনি দেফান্থি;

²⁶ নগি মাটনি দেফান্থি, মাট মত্তথিয়নি দেফান্থি, মত্তথিয় শিমিয়িনি দেফান্থি, শিমিয়ি যোষেখনি দেফান্থি, যোষেখ যুদানি দেফান্থি;

²⁷ যুদা যোহানানি দেফান্থি, যোহানা রীষানি দেফান্থি, রীষা সরুব্বাবিলনি দেফান্থি, সরুব্বাবিল শল্টীয়েলনি দেফান্থি, শল্টীয়েল নেরিনি দেফান্থি;

²⁸ নেরি মল্কিনি দেফান্থি, মল্কি অদ্দীনি দেফান্থি, অদ্দী কোষমনি দেফান্থি, কোষম ইল্‌মাদমনি দেফান্থি, ইল্‌মাদম এরনি দেফান্থি;

²⁹ এর যীশুনি দেফান্থি, যীশু ইলীয়েষরনি দেফান্থি, ইলীয়েষর যোরীমনি দেফান্থি, যোরীম মত্ততনি দেফান্থি, মত্তত লেবিনি দেফান্থি;

³⁰ লেবি শিমিয়োননি দেফান্থি, শিমিয়োন যুদানি দেফান্থি, যুদা যোষেফনি দেফান্থি, যোষেফ যোনানি দেফান্থি, যোনম ইলিয়াকীমনি দেফান্থি;

³¹ ইলিয়াকীম মিলেয়ানি দেফান্থি, মিলেয়া মিন্নানি দেফান্থি, মিন্না মত্তথনি দেফান্থি, মত্তথ নাথননি দেফান্থি, নাথন দায়ূদনি দেফান্থি;

³² দায়ূদ যিশয়নি দেফান্থি, যিশয় ওবেদনি দেফান্থি, ওবেদ বোয়সনি দেফান্থি, বোয়স সল্‌মোননি দেফান্থি, সল্‌মোন নহশোননি দেফান্থি;

³³ নহশোন অম্মীনাদবনি দেফান্থি, অম্মীনাদব অদমাননি দেফান্থি, অদমান অর্ণিনি দেফান্থি, অর্ণি হিষ্রোণনি দেফান্থি, হিষ্রোণ পেরসনি দেফান্থি, পেরস যিহূদানি দেফান্থি;

³⁴ যিহূদা যাকোবনি দেফান্থি, যাকোব ইস্‌হাকনি দেফান্থি, ইস্‌হাক অব্রাহামনি দেফান্থি, অব্রাহাম তেরহনি দেফান্থি, তেরহ নাহোরনি দেফান্থি;

³⁵ নাহোর সরূগনি দেফান্থি, সরূগ রিয়ুনি দেফান্থি, রিয়ু পেলগনি দেফান্থি, পেলগ এবরনি দেফান্থি, এবর শেলহনি দেফান্থি;

³⁶ শেলহ কৈনননি দেফান্থি, কৈনন অর্ফক্‌ষদনি দেফান্থি, অর্ফক্‌ষদ শেমনি দেফান্থি, শেম নোহনি দেফান্থি, নোহ লেমকনি দেফান্থি;

³⁷ লেমক মথুশেলহনি দেফান্থি, মথুশেলহ হনোকনি দেফান্থি, হনোক যেরদনি দেফান্থি, যেরদ মহললেলনি দেফান্থি, মহললেল কৈনননি দেফান্থি;

³⁸ কৈনন ইনোশনি দেফান্থি, ইনোশ শেথনি দেফান্থি, শেথ আদমনি দেফান্থি, আদম ইসলনি দেফান্থি।