লূকনি চকগিবা নাম্মা খাৎথা 19 - Garo New Testament

সক্কেয়নি গিসিক ফি·ল্লানি গিম্মিনো

¹ যীশু যিরীহো সংজিলমা গিত্তা রি·য়াংআমিং।

² উনো সক্কেয় মিংগিবা সাকসা মান্দি দংআমিং। বিয়া খাজিনা গিলগিবারাংনি দাল·বাৎগিবা আরো মা·ন্নে চা·বাৎগিবা হং·আমিং।

³ যীশু সা, উখো বিয়া নিনা হা·ম্মিংআমিং, ইন্দিবা খামবি খান·দামা ইন্নে মান্দি বাং·আনি গিম্মিন বিখো নিকনা মান·জাংআমিং।

⁴ উনি গিম্মিন বিয়া যীশুখো নিনা ইন্নে মিকখাংচা খাত্তাংএ ডুমুর বিফাং ফাংসাও গাদোজক, মুয়ানা যীশু উয়া রামা গিত্তান রি·য়াংআমিং।

⁵ যীশু উয়া ডুমুর বিফাংনি কেচ্চিও রি·বাএ সাক্কাচানা নিগোদোজক আরো সক্কেয়খো আগানজক, “সক্কেয়, হং·খাতগালবো, মুয়ানা দা·আলো আংআ নাং·নি নক্কো দংনা নাংনুয়া।”

⁶ সক্কেয় বাকবাক হং·খাতবাজক আরো খুসি হং·এ যীশুখো রা·চাকজক।

⁷ উখো নিক্কে গিম্মিকান খা·চাএ খা·চাএ ইনজক, “বিয়া সাকসা পাপী মান্দিনি চাচ্চি হং·না রি·য়াংজক।”

⁸ সক্কেয় উনো চাদেংএ গিত্তেলনা আগানজক, “গিত্তেল, আংআ আংনি গামজিননি ফাকসামসাখো দিল্লা-চন্নারাংনা হ·ন্নেতিংজক আরো সাচাখোবা থগিয়ে রা·মানোদে উনি চাংব্রি বাত্তে হন·ফিল্লিংজক।”

⁹ উনোন যীশু আগানজক, “ইয়া নক্কো দা·আলো পাপওনি জক্কা সকজক, মুয়ানা ইয়াবা অব্রাহামনি দেফান্থি হং·আ।

¹⁰ গিম্মাগিবারাংখো সান্দিনা আরো পাপনিখো জক্কেৎনান মান্দিনি দেফান্থি রি·বাজক।”

রাজা আরো বিনি সাকচিখুং নকখলরাং

¹¹ যীশু জেও দংআমিং উনোনি যিরূশালেম বাং·এ চেল·জামিং, আরো জেরাং বিনি খাৎথাখো খিন্নাংআমিং বিসং, ইসলনি সংনক থেংরিন ফারাকনুয়া ইন্নে চানচিয়ামিং। উনি গিম্মিন যীশু বিসংনা স্খিনা ইন্নে ইয়া খাৎথাখো আগানজকঃ

¹² “দাল·গিবা মা·চংনি সাকসা মান্দি রাজা হং·আনি বিলখো রা·এ রি·বাফিলনা হা·সং চে·ল্লাচা রি·য়াংজক।

¹³ রি·য়াংনা স্খাং বিয়া বিনি সাকচিখুং নকখলরাংখো রিক্কামজক আরো সাকফ্রাকফ্রাকনা রিৎচাসা দীনার হ·ন্নে আগানজক, ‘আংনি ফিল·বাখুজানা দিপ্পাৎ ইখো রা·এ বাদিংবো।’

¹⁴ “ইন্দিবা বিনি হা·সংনি মান্দিরাং বিখো মিৎচিনুয়ামিং। ইনি গিম্মিন বিসং বিনি জা·মানো মান্দি ওয়াত্তেতি আগানেতজক, ‘চিংনি সাক্কাও ইয়া মান্দিনি রাজা হং·আখো চিংআ হাম·জা।’

¹⁵ “ইন্দাকোবা বিয়া রাজা হং·আনি বিলখো মা·ন্নে রি·বাফিলজক আরো জেরাংনা থাংখা হ·ন্নামিং উয়া সাকচিখুং নকখলরাংখো রিংগামে রা·বাখানা গি·য়েৎজক। বিসং বাদিংএমিংনা সা বাসিক মান·দাপজক উখো বিয়া হা·আইনা হাম·জক।

¹⁶ স্খাংগিবা রি·বাএ ইনজক, ‘গিত্তেল, নাং·নি থাংখাচা আংআ চাংচিখুং মান·দাপজক।’

¹⁷ “রাজা বিনা আগানজক, ‘নাম্মেন দাকজক। না·আ নামগিবা নকখল। না·আ বাং·গিজানি গিম্মিন বিবিগিবা হং·জক ইন্নে আংআ নাং·না সং দামচিখুংখো নিরকখিনা হন·জক।’

¹⁸ “গ্মিগিবা নকখল রি·বাএ আগানজক, ‘গিত্তেল, নাং·নি থাংখাচা আংআ চাংবংআ মান·দাপজক।’

¹⁹ “বিয়া উয়া নকখলনা আগানজক, ‘না·আ সং দামবংআখো নিরকখিনা মা·ন্নুয়া।’

²⁰ “উনি জা·মানো সাকগিপ্পিন নকখল রি·বাএ আগানজক, ‘গিত্তেল, আংআ নাং·নি থাংখাখো রুমালো খাথমে দন্নামিং।

²¹ নাং·নি গিম্মিনো আংআ খেনবিয়ামিং মুয়ানা না·আ খা·গ্রাক মান্দি; না·আ জেখো চিম্মংজা উখো রা·এ দংআ আরো জেখো গি·জা উখো রাত্তা।’

²² “উনোন রাজা আগানজক, ‘ও দেংগু নকখল! নাং·নি খু·সুকচান আংআ নাং·খো বিচাল দাকনুয়া। না·আদে হা·আইয়ান, আংআ খা·গ্রাক মান্দি; জেখো চিম্মংজা উখো রা·এ দংআ আরো জেখো গি·জা উখো রাত্তা।

²³ ইন্দিদে আংনি থাংখাখো না·আ মুয়ানা বাদিংগিবাচা দনজাজক? ইন্দাকোদে আংআ রি·বাএ থাংখাখোবা মা·ন্নুয়ামিং আরো উমুং অকখিসা সুদবা মা·ন্নুয়ামিং।’

²⁴ “জেরাং রাজানি সেফাংও চাদেংএ দংআমিং রাজা বিসংখো আগানজক, ‘বিচাখো উয়া রিৎচাসা দীনারখো রা·রিকবো আরো হাজালসা দীনার দংগিবানা উখো হন·বো।’

²⁵ “উনোন উয়া মান্দিরাং রাজানা আগানজক, ‘গিত্তেল, বিচাদে হাজালসা দীনার দংআন।’

²⁶ “রাজা আগানজক, ‘আংআ না·সংনা আগানিংআ, দংগিবানা আরোবা হন·দাপনুয়া, ইন্দিবা জেচা দংজা বিচা দংগিবাখোবা রা·আংস্রাংনুয়া।

²⁷ আংনি বোবিলরাং জেরাং আংনি রাজা হং·আখো হাম·জা, বিসংখো ইনোনা রিমবাবো আরো আংনি মিকখাংও স·ওতে গালবো।’ ”

যিরূশালেমো রাসং চাএ নাপ্পা

²⁸ ইয়া খাৎথারাংখো আগানানি জা·মানো যীশু বিসংনা স্খাং স্খাং যিরূশালেমচানা রি·য়াংজক।

²⁹ বিয়া জৈতুন হা·ব্রিনি জা·রেকো দংগিবা বৈৎফগী আরো বৈথনিয়া সংওনা সকবাওন বিনি সাকগ্মি জা·রিকগিবাখো ইন্দাকে আগানে ওয়াত্তেতজক,

³⁰ “না·সং মিকখাংনি উয়া সংচা রি·য়াংবো। উনো নাপমিত্তিংও মাংসা গাধা বি·সাখো খায় দন্নাখো নিকনা মা·ন্নুয়া। উনি সাক্কাও দারাংবা মামুং সালোবা গাখাতখুজা। উখো এংএ ইনোনা রা·বাবো।

³¹ ‘মুয়ানা উখো এংআ’ ইন্নে সাবা সিং·ওদে, উনোদে আগানবো, ‘গিত্তেলনা নাংআ।’ ”

³² জা·রিকগিবারাং রি·য়াংএ যীশুনি আগানা গিত্তান গিম্মিকখো নিকনা মান·জক।

³³ বিসং উয়া গাধা বি·সাখো এংমিত্তিংওন বিসংখো নকগিবা সিং·জক, “না·সং বি·সাখো মুয়ানা এংইংআ?”

³⁴ বিসং আগানজক, “গিত্তেলনা নাংআ।”

³⁵ জা·মানো জা·রিকগিবারাং উয়া গাধা বি·সাখো যীশুচা রা·বাজক আরো উনি সাক্কাও বিসংনি বে·এননি বা·রারাংখো আন্নে যীশুখো আসংএতজক।

³⁶ বিনি রি·য়াংমিত্তিংও মান্দিরাং আন·থাংথাংনি বে·এননি বা·রারাংখো রামাও আনদাপনা হা·বাচেংজক।

³⁷ ইন্দাকে যীশু যিরূশালেমনি সেফাংও রি·বাএ জৈতুন হা·ব্রিওনি হং·ওনবাগিবা রামাওনা রি·বাজক। যীশুমুং বিনি বাং·আ জা·রিকগিবারাং দংআমিং। উয়া জা·রিকগিবারাং বিনি বিল্লাকগিবা কামরাংখো নিক্কানি গিম্মিন খুসি হং·এ চ্রিকে ইসলখো রাসং দাক্কে ইন্না হা·বাচেংজক,

³⁸ “গিত্তেলনি বিমুংও রি·বাগিবা রাজানি রাসং হং·খানা! সালগিওন থম·থমা, আরো উয়ো ইসলনি রাসং ফারাকা।”

³⁹ মান্দি বাং·আওনি মিত্তাম ফরীশীরাং যীশুনা আগানজক, “স্খিগিবা, নাং·নি জা·রিকগিবারাংখো জ্রিপ দংখানা আগানবো।”

⁴⁰ যীশু বিসংনা আগানজক, “আংআ না·সংনা আগানিংআ, ইরাং জ্রিপ দাক্কে দংওদে রং·থিরাং চ্রিকনুয়া।”

⁴¹ বিসং যিরূশালেমনি সেফাংও রি·বাওন যীশু উয়া সংজিলমাখো নিএ গ্রাপজক।

⁴² বিসং আগানজক, “আইয়াও, থম·থমাখো মা·ন্না জেখো দাকনা নাংআ, হো·এ দা·আল না·আ উখো হা·আইচাক্কোদে! ইন্দিবা উয়া দা·আও নাং·নি মিক্রোননি মিৎথিনাও দংআ।

⁴³ নাং·না ইন্দাকগিবা সাল সকবানুয়া জেনসালো বোবিলরাং নাং·নি সাক্কাও চাংফেংনুয়া আরো নাং·খো উইলউইলে দংনুয়া আরো গিম্মিক গিত্তা নাং·খো সিকচেচেপনুয়া।

⁴⁴ বিসং নাং·খো আরো নাং·নি নিং·আও দংগিবা মান্দি গিম্মিকখো রি·ম্মে হা·আও গোস্থাপনুয়া আরো রং·থি গি·সানি সাক্কাও রং·থি গি·সাখো দনজানুয়া, মুয়ানা ইসল জেনসালো নাং·ও গিসিক হ·ন্নামিং উয়া সালখো না·আ হা·আইএ রা·জাজক।”

⁴⁵ উনি জা·মানো যীশু থরম নক্কো নাপ্পে বাদিংগিবারাংখো হা·রিকেতজক।

⁴⁶ বিয়া উয়া বাদিংগিবারাংনা আগানজক, “রংথালগিবা শাস্ত্রও চক্কা দংআ, ‘আংনি নক বি·আনি নক হং·নুয়া,’ ইন্দিবা না·সং উখো রা·সেকগিবারাংনি হা·খল দাক্কে রা·জক।”

⁴⁷ যীশু সালাজ্রিংআন থরম নকচা রি·য়াংএ স্খিনা হা·বাচেংজক। খামাল দাল·গিবারাং, শাস্ত্র স্খিগিবারাং আরো মান্দিরাংনি দাল·গিবারাং বিখো স·ওতে গালনা হাম·জক,

⁴⁸ ইন্দিবা বাদিকে দাক্কে উখো দাকনুয়া উনি গিম্মিনো মামুং চলখো বিসং সান্দিয়ে মান·জাজক, মুয়ানা মান্দিরাং গিসিক নাংএ বিনি খাৎথা গিম্মিকখো খিন্নানুয়ামিং।