লূকনি চকগিবা নাম্মা খাৎথা 13 - Garo New Testament

গিসিক ফি·ল্লানি গিম্মিনো স্খিয়ারাং

¹ উয়া সময়ও উনো দংগিবা মিত্তাম মান্দিরাং গালীল হা·দকনি মিত্তাম মান্দিরাংনি গিম্মিন যীশুনা আগানজক। বিসং ইন্দাকে আগানজক, রোমখো শাসন দাকগিবা পীলাত ইয়া গালীলীরাংখো দেন·থংএ বিসংনি বলিরাংনি হান·চিমুং বিসংনি হান·চিখোবা ব্রিনামিং।

² ইয়া খাৎথাখো খিন্নাএ যীশু আগানজক, “উয়া গালীলীরাং উয়ানদাক্কে দুক মা·ন্নানি গিম্মিন বিসং গিপ্পিন গালীলীরাংনা বাত্তে পাপীবাৎগিবারাং হং·আ ইন্নে না·সং চানচিয়ামা?

³ আংআ না·সংনা আগানিংআ, ইন্দাকে হং·জা, ইন্দিবা পাপওনি গিসিক ফিল·জাওদে না·সংবা বন·গিম্মিকনুয়া।

⁴ শীলোহনি চুবাৎগিবা নক গা·আকদাপে সাকচিচেৎ মান্দিরাং সিয়ামিং, ইনি গিম্মিন যিরূশালেমনি মিত্তাম মান্দিরাংনা বাত্তে বিসংনি দোস বাং·আমিং ইন্নে না·সং চানচিয়ামা?

⁵ আংআ না·সংনা আগানিংআ, ইন্দাকে হং·জা, ইন্দিবা পাপওনি গিসিক ফিল·জাওদে না·সংবা বন·গিম্মিকনুয়া।”

⁶ জা·মানো স্খিয়েতনা ইন্নে যীশু ইয়া খাৎথাখো আগানজকঃ “সাকসা মান্দিনি বাগানও ডুমুর বিফাং ফাংসা গি·আ দংআমিং। রাং·সাও বিয়া রি·বাএ বিথিখো সান্দিজক ইন্দিবা মান·জাজক।

⁷ উনো বিয়া বাগানখো নিরক্ষিগিবানা আগানজক, ‘নিবো, বিলসি গিত্থাম হং·ইংজক ইয়া ডুমুর বিফাংও আংআ বিথিখো সান্দিংজক ইন্দিবা মামুংখোন মান·জাংজক। ইনি গিম্মিন না·আ ফাংখো দেন·ফিএ গালবো। মুয়ানা ইগিবা ইন্দাকারি হা·বাখো নাসিয়েতনুয়া?’

⁸ বাগানখো নিরক্ষিগিবা আগানচাকজক, ‘গিত্তেল, ইয়া বিলসিওবা উয়া দংখুখানা। আংআ উখো উইলউইলে বাকবিবিতে উয়ো হা·সাল হ·ন্নুয়া।

⁹ উনি জা·মানো বিথি নাংওদে নামজোকান হং·জাওদে না·আ উখো দে·ন্নে গালবো।’ ”

গিত্তেল যীশু খম·সিকগিবা মিচিকখো নাম্মেতজক

¹⁰ সালসাও যীশু নেং·থাকানি সালো থম·দাকরাম গি·সাও স্খিয়ে হ·ন্নিংআমিং।

¹¹ উয়ো ইন্দাকগিবা সাকসা মান্দি দংআমিং জেখো গিসিক নামগিজাগিবা সাকসা রি·ম্মানি গিম্মিন বিয়া বিলসি চি·চেৎ সাএ দংআমিং। বিয়া খম·সিকগিবামিং আরো অকখিসাবা স্রংএ দংনা মান·জানুয়ামিং।

¹² যীশু বিচাখো নিএতজক আরো বিখো সেফাংচা রিংগামে আগানজক, “মা·আ, নাং·নি সাআনিখো না·আ জকজক।”

¹³ ইখো আগানে যীশু বিনি সাক্কাও জাক দনদাপজক, আরো উনোন বিয়া স্রংএ চাদেংজক আরো ইসলনি রাসং দাকনা হা·বাচেংজক।

¹⁴ যীশু নেং·থাকানি সালো নাম্মেতজক ইন্নে থম·দাকরামনি দাল·গিবা খা·আওনাংএ মান্দিরাংনা আগানজক, “কাম দাকনাদে সালদক দংআন। উনি গিম্মিন নেং·থাকানি সালো রি·বাগিজা উয়া সালদকরাংও রি·বাএ নামস্রাংবো।”

¹⁵ উনো গিত্তেল উয়া দাল·গিবানা আগানজক, “না·সং বু·এ চা·গিবারাং! নেং·থাকানি সালো না·সং দিমদাকান না·সংনি মা·সু আরো গাধাখো চি খান্না গোয়ালি নকনিখো এংএ রা·আংজামা?

¹⁶ ইন্দাকোবা অব্রাহামনি মা·চংনি ইয়া মিচিকখো শয়তান বিলসি চি·চেৎ খাএ দন্নামিং, উয়া খাআনিখো নেং·থাকানি সালো বিখো জক্কেৎনা খ্রাজামা?”

¹⁷ বিনি ইন্দাকে আগানানি গিম্মিন বিখো জিচাকগিবারাং গিম্মিকান খ্রাচা·আ মান·জক। ইন্দিবা গিপ্পিন মান্দিরাং বিনি ইন্দাকা বিল্লাকা কামরাংখো নিক্কে খুসি হং·বিজক।

সুলসু বিৎচ্রি আরো ওয়ানথিনি গল্প

¹⁸ উনি জা·মানো যীশু আগানজক, “ইসলনি সংনক মুয়া গিত্তা হং·আ? মুয়ামুং আংআ ইখো থনুয়া?

¹⁹ ইসলনি সংনক ইন্দাকগিবা রংসা সুলসু বিৎচ্রি গিত্তা হং·আ জেখো সাকসা মান্দি রা·এ আন·থাংনি বাগানও গোজক। জা·মানো বিৎচ্রি দাল·বাএ ফাংসা বিফাং হং·জক। উনো সাক্কানি দো·দ্রাং রি·বাএ উনি ডালারাংও বিথিপ সা·জক।”

²⁰ যীশু দা·আবা আগানজক, “মুয়ামুং আংআ ইসলনি সংনকখো থনুয়া?

²¹ ইসলনি সংনক ওয়ানথি গিত্তা হং·আ। মিচিক সাকসা উখো রা·এ পায়লা গিত্থাম ফুরাও ব্রিনজক, উনি গিম্মিন ফুরা গিম্মিক ফিংজক।”

পাপওনি জক্কাখো মা·ন্নানি বিদিংও স্খিয়ারাং

²² গিত্থিমসাওনি গিত্থিমসাওনা আরো সংজিলমা দামসাওনি দামসাওনা স্খিফ্রাক্কে যীশু যিরূশালেমচানা রি·য়াংজক।

²³ সাকসা মান্দি বিখো সিং·জক, “স্খিগিবা, পাপওনি জক্কাখো মিত্তাম মান্দিরাংসান মা·ন্নুয়ামা?” উনোন যীশু মান্দিরাংনা আগানজক,

²⁴ “আপচনা দ·গা গিত্তা নাপনা জাংগি গাল্লে খ্রেংবো। আংআ না·সংনা আগানিংআ, বাং·এন নাপনা খ্রেংনুয়া ইন্দিবা মান·জানুয়া।

²⁵ জেনসালো নকগিবা চাখাত্তে দ·গাখো চিপ্পেতনুয়া উনো না·সং হা·ফালও চাদেংএ দ·গাখো দকথিকথিকে আগান্নুয়া, ‘গিত্তেল, চিংনা দ·গাখো এংএতবো।’ ইন্দিবা বিয়া না·সংনা ইন্দাকে আগানচাকনুয়া, ‘না·সং বাওনি রি·বাআ আংআদে হা·আইজা।’

²⁶ উনোন না·সং আগান্নুয়া, ‘চিংআ নাং·মুং চা·জক রিংজক, আরো না·আ চিংনা রামারাংও স্খিয়ে হন·জক।’

²⁷ উনোন বিয়া আগান্নুয়া, ‘না·সং বাচ্চানি রি·বাআ আংআ হা·আইজা। নামগিজা মান্দিরাং, না·সং গিম্মিকান আংওনি রি·য়াংবো।’

²⁸ “জেনসালো না·সং অব্রাহাম, ইস্‌হাক, যাকোব আরো গিম্মিক আগানসোগিবারাংখো ইসলনি সংনক্কো দংআখো আরো না·সংখো হা·ফালচা গাল্লেতাখো নিকনুয়া, উনসালো না·সং গ্রাপনুয়া আরো সা·দিকানা ওয়াগাম চিকক্রতনুয়া।

²⁹ সালারাম, সালিরাম, সালগ্রো আরো সালগিপেংচানি মান্দিরাং রি·বাএ ইসলনি সংনক্কো চা·না আসংনুয়া।

³⁰ জা·মানচাকগিবারাংনি গিসেপো সাবা সাবা স্খাং হং·নুয়া, আরো স্খাংচাকগিবারাংনি গিসেপো সাবা সাবা জা·মানচাকনুয়া।”

যিরূশালেমনি গিম্মিন দুক দাক্কা

³¹ উয়া সময়ও মিত্তাম ফরীশীরাং যীশুচা রি·বাএ আগানজক, “না·আ ইয়োনি রি·য়াংবো, মুয়ানা হেরোদ নাং·খো স·ওতে গালনা হা·ম্মিংজক।”

³² যীশু বিসংনা আগানজক, “না·সং রি·য়াংএ উয়া সি·ওলনা আগানেবো, ‘বাং·গিজা সালরাংনা আংআ গিসিক নামগিজাগিবারাংখো হা·রিকনুয়া আরো সাগিবারাংখো নাম্মেতনুয়া আরো উনি জা·মানো আংনি কামরাংখো ব·ন্নেতনুয়া।

³³ ইন্দাকোবা বাং·গিজা সালরাংনি জা·মানোন আংনি রি·য়াংনা নাংনুয়া, মুয়ানা যিরূশালেমনি আগ্রে মামুংচাবা আগানসোগিবা সিনা মা·ন্নামা?

³⁴ “যিরূশালেম, আইয়াও যিরূশালেম! আগানসোগিবারাংখো না·আ স·ওতে গাল্লা আরো নাং·চা ওয়াত্তেতগিবারাংখো রং·থিচা গোথাত্তে গাল্লা। দো·বিমা জেদাক্কে আন·থাংনি বি·সারাংখো গ্রাংনিং·আও থ·ম্মে দন্না উয়ানদাক্কে আংআবা বাসিক নাং·নি মান্দিরাংখো আংচা থম·না হাম·জক, ইন্দিবা না·সং গং·জাজক।

³⁵ নিবো, না·সংনি নক না·সংনি মিকখাংও বাংবাং দাক্কে গা·আকে দংনুয়া। আংআ না·সংনা আগানিংআ, ‘গিত্তেলনি বিমুংও রি·বাগিবানি রাসং হং·খানা,’ ইন্দাকে না·সংনি ইনখুজানা দিপ্পাৎ না·সং আংখো নিকজানুয়া।”